پويىزداعى ارپالىس

بۇل شىعارمادا قازىرگى ادامنىڭ ىشكى كۇيزەلىسى, جالعاندىققا تولى ومىر­دەن شارشاۋى جانە رۋحاني داعدارى­سى بەينەلەنەدى. اتال­عان سپەكتاكل – ادامنىڭ بولمىسىن, جا­ناي­قايىن, شى­نايىلىق پەن جاسان­دىلىقتىڭ اراسىن تەرەڭ فيلوسوفيالىق تۇرعىدا اشۋعا باعىتتالعان.

پەساداعى وقيعالار تۇنگى پويىزدا ءوربيدى. جولاۋشىلاردىڭ ارقايسىسى ءوز تاعدىرىمەن بەتپە-بەت كەلەدى. ەڭ قىزىعى, پويىز ساعاتى 21:15 ۋاقىتىنان باسقا ۋاقىتتى كورسەتپەيدى. وسى ورايدا كورەرمەن ىشكى جان تول­عانىستارى مەن پسيحولوگيالىق شيەلىنىستەر ارقىلى ادام تابيعاتىنا ۇڭىلەدى.

قويىلىمدى قويۋشى رەجيسسەر – ميكايل ميكايلوۆ (ازەربايجان), قويۋ­شى سۋرەتشى – مۇستافا مۇستافاەۆ (ازەربايجان), ال جوبا اۆتورى – دۋناي ەسپاەۆ (قازاقستان). رولدەردى ايگەرىم اسانوۆا, دۋناي ەسپاەۆ, باۋىرجان نۇر­ماعامبەتوۆ سىندى اكتەرلەر سومدادى.

قويىلىم سوڭىندا استانا قالاسى اكىمدىگىنىڭ مۋزىكالىق جاس كورەرمەن تەاترىنىڭ ديرەكتورى اسحات ماەميروۆ «DAT» تەاترى ۇجىمىنا العىس ءبىلدى­رىپ, كورەرمەنگە تەرەڭ وي سالعان قويى­لىمنىڭ كوركەمدىك دەڭگەيىن جوعارى باعالادى.

ەۋروپانىڭ ءبىرتالاي تەاتر كەڭىستىگىن زەردەلەپ, باتىس تەاترى ساحناسىندا وتىرعانداي سەزىمدە بولدىق. ءبىز ابدەن ەموتسيونالدى تەاترعا ۇيرەنگەنبىز, ال بۇل ساناعا ىقپال ەتەتىن, ينتەللەكتۋالدى ديالوگ جاساۋعا شاقىراتىن راتسيونالدى تەاتر بولدى», دەدى ول.

ايتا كەتەيىك, سپەكتاكلدى قارا­عاندى وبلىسى مادەنيەت باسقار­ماسىنىڭ باسشىسى عالىمجان وتەباي, باسقا دا ونەر مايتالماندارى كەلىپ كوردى.

بۇعان دەيىن رەجيسسەر دۋ­ناي ەسپاەۆ جەتى جىل بويى قارا­عان­دىداعى ك.ستانيسلاۆسكي اتىن­داعى ورىس دراما تەاترىن باسقارعان. قا­زىر ول بيىل قۇرىلعان تاۋەل­سىز «DAT» تەاترىنىڭ نەگىزىن قالاۋشى ءارى كور­كەمدىك جەتەكشىسى رەتىندە جاڭا شىعار­ماشىلىق باعىتتا ەڭبەك ەتىپ كەلەدى.

جاس تەاتردىڭ تۇساۋكەسەر قويى­لىمى رەتىندە ۇسىنىلعان «پويىز 21:15» دراماسى كورەرمەن ىقىلاسىنا بولە­نىپ, تەاتر ۇجىمىنىڭ الداعى شى­عارماشىلىق جولىن اشقانداي بولدى. قويىلىم – بۇگىنگى قوعامنىڭ رۋحاني احۋالىن كوركەمدىك تۇرعىدا زەردەلەۋگە ۇمتىلعان ءمانى تەرەڭ تۋىندى رەتىندە ەستە قالدى.

نۇرزات امانتاي,

ل.ن.گۋميلەۆ اتىنداعى ەۇۋ-دىڭ 3-كۋرس ستۋدەنتى