27 ناۋرىز – دۇنيەجۇزىلىك تەاتر كۇنى. بۇل كۇن قازاقستاندا تەك تەاتر قىزمەتكەرلەرىنىڭ كاسىبي مەرەكەسى عانا ەمەس, سونىمەن بىرگە تەاتر ونەرىنىڭ جۇيەلى دامۋىن, كورەرمەن سۇرانىسىنىڭ ارتۋىن جانە شىعارماشىلىق ىزدەنىستىڭ كەڭەيۋىن ايقىندايدى. تەاترعا قىزىعۋشىلىقتىڭ ارتىپ كەلە جاتقانىن – بيىلعى 3 اي ىشىندە 170 مىڭ كورەرمەننىڭ قويىلىمداردى تاماشالاعانى ايعاقتايدى, دەپ جازادى Egemen.kz.
مادەنيەت جانە اقپارات مينيسترلىگىنىڭ مالىمەتىنشە, بۇگىندە ەل كولەمىندە 70-تەن استام تەاتر جۇمىس ىستەيدى, ونىڭ ىشىندە 57-ءسى – مەملەكەتتىك تەاترلار. ولاردىڭ 11-ءى رەسپۋبليكالىق, ال 46-سى وڭىرلىك دەڭگەيدە قىزمەت ەتەدى. بۇل دەرەكتەر تەاتردىڭ ۇلتتىق مادەني كەڭىستىكتەگى ورنى ايرىقشا ەكەنىن كورسەتەدى.
سالاداعى سەرپىن وتكەن جىلدىڭ قورىتىندىسىنان دا انىق بايقالادى. 2025 جىلى مەملەكەتتىك تەاترلاردا 410 جاڭا قويىلىم ساحنالاندى. سونىمەن قاتار, تەاتر ۇجىمدارى 539 گاسترولدىك ساپار ۇيىمداستىردى, ونىڭ 495-ءى ەل ىشىندە, ال 44-ءى شەتەلدە ءوتتى. جىل قورىتىندىسىندا 16 مىڭ قويىلىم كورەرمەنگە جول تارتسا, ولاردى 2 832 835 ادام تاماشالاعان.
تەاترلاردىڭ شىعارماشىلىق تابىسى حالىقارالىق جانە رەسپۋبليكالىق دەڭگەيدەگى بايقاۋلاردا دا كورىنىس تاپتى. بىلتىر وتاندىق تەاتر قايراتكەرلەرى 101 حالىقارالىق جانە 90 رەسپۋبليكالىق فەستيۆال مەن بايقاۋعا قاتىسىپ, ناتيجەسىندە 13 قويىلىم «گران-پري» جانە «ەڭ ۇزدىك سپەكتاكل» اتالىمدارىن يەلەندى.
اباي تەاترى – سينگاپۋردا
ال بيىلعى جىلدىڭ العاشقى ءۇش ايىنىڭ وزىندە-اق وڭ ديناميكا ساقتالىپ وتىر. 2026 جىلدىڭ ءبىرىنشى توقسانىندا رەسپۋبليكالىق تەاترلارعا 170 927 كورەرمەن كەلگەن. بۇل – تەاترعا دەگەن قىزىعۋشىلىقتىڭ باسەڭدەمەگەنىن, كەرىسىنشە, تۇراقتى تۇردە ءوسىپ كەلە جاتقانىن بىلدىرەدى.
جىل باسىنان بەرى ساحناعا جول تارتقان جاڭا قويىلىمدار دا كورەرمەن ىقىلاسىنا بولەنىپ ۇلگەردى. ولاردىڭ قاتارىندا «قورعانسىز», «قازاقي كومەديا نەمەسە بوناپارتتىڭ ۇيلەنۋى», «شولپاننىڭ كۇناسى» سپەكتاكلدەرى بار.
اۋەزوۆ تەاترىنىڭ ءجۇز جىلدىق تاريحىنان سىر شەرتەتىن قۇندى دەرەكتەر جاريالاندى
دۇنيەجۇزىلىك تەاتر كۇنىنە وراي ەل تەاترلارىندا بىرقاتار ماڭىزدى مادەني شارالار جوسپارلانعان. اتاپ ايتقاندا, «استانا بالەت» تەاترىندا «بولەرو ح» بالەتىنىڭ پرەمەراسى, ميحايل لەرمونتوۆ اتىنداعى تەاتردا «جەنيتبا (سوۆەرشەننو نەۆەروياتنوە سنوۆيدەنيە)» كومەدياسى, قۇددىس قوجامياروۆ اتىنداعى ۇيعىر مۋزىكالىق كومەديا تەاترىندا «بۋنت نەۆەستوك» («كەلىندەر كوتەرىلىسى») سپەكتاكلى ساحنالانادى. سونىمەن قاتار, «Altyn Saqa – 2026» جاڭا قويىلىمدار فەستيۆالى مەن عابيت مۇسىرەپوۆ اتىنداعى تەاترداعى «تەاتر ءتۇنى» شاراسى كورەرمەنگە ەرەكشە تارتۋ بولماق.
تەاتر – تەك ونەر ورداسى عانا ەمەس, قوعامنىڭ رۋحاني ايناسى. قويىلىم ساپاسى مەن كورەرمەن سانىنىڭ ارتۋى – ۇلتتىق مادەنيەتتىڭ جاڭعىرىپ, جاڭا بەلەسكە كوتەرىلىپ كەلە جاتقانىن بىلدىرەدى.
زاماناۋي تەحنولوگيا تەاترعا دا جەتتى