5 ماۋسىمدا ءابىلحان قاستەەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيىندە «قىتاي ونەرىنىڭ وي-ماقساتتارى – قىتاي ۇلتتىق كوركەمونەر مۋزەيىنىڭ جاۋھارلارى» اتتى كورمە اشىلدى, دەپ جازادى Egemen.kz.
ەكسپوزيتسياعا كەسكىندەمە, گرافيكا جانە ءمۇسىننىڭ 50-گە جۋىق تۋىندىسى ەنگەن. بۇل ەڭبەكتەردى قىتايدىڭ حح-ححI عاسىرداعى بەلگىلى سۋرەتشىلەرى جازعان, ولار سيەي ونەرىنىڭ ءداستۇرىن جالعاپ كەلەدى. شەبەرلەر وزدەرىنىڭ شىعارماشىلىعىندا ستيل, تەحنيكا جانە ماتەريالداردىڭ ەرەكشەلىكتەرى ارقىلى تەك سىرتقى بەينەنى عانا ەمەس, سونىمەن قاتار ونىڭ ىشكى رۋحاني ءمانىن دە اشادى.
قىتايدىڭ تانىمال زاماناۋي مۇسىنشىلەرىنىڭ ءبىرى — ۋ ۆەيشان. ول الەمگە سۋرەتشى ءارى قوعام قايراتكەرى رەتىندە كەڭىنەن تانىمال. كورمەگە ءمۇسىنشىنىڭ لاو تسزى, تسي باي شي سەكىلدى قىتاي تاريحىنداعى ءىرى تۇلعالاردىڭ ءمۇسىنى قويىلدى. قولادان جاسالعان بۇل تۋىندىلاردا اۆتور كەيىپكەردىڭ مىنەزىن قوزعالمالى فورما, بەتتىڭ قۇرىلىمىن ەرەكشە بەدەرلەۋ جانە كالليگرافيانى ەسكە سالاتىن ەرەكشە ستيل ارقىلى كورسەتكەن.
ايتا كەتەيىك, 2018 جىلى ءابىلحان قاستەەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۋزەيى جىبەك جولى مۋزەيلەرى مەن گالەرەيالارى حالىقارالىق اليانسىنىڭ قۇرامىنا كىردى.«قىتاي ونەرىنىڭ وي-ماقساتتارى – قىتاي ۇلتتىق كوركەمونەر مۋزەيىنىڭ جاۋھارلارى» كورمە جوباسى – ۇلتتىق ونەردى ناسيحاتتاۋعا ارنالعان ماڭىزدى مادەني الماسۋ باعدارلامالارىنىڭ ءبىر بولىگى. بەيجىڭدەگى جەتەكشى ونەر مۋزەيى ۇسىنعان كورمە قىتاي ونەرىنىڭ جاۋھارىمەن تانىسۋعا تاماشا مۇمكىندىك بەرەدى.
كورمە 2025 جىلدىڭ 3 تامىزىنا دەيىن جالعاسادى.