ماسكەۋ قالاسىنداعى رەسەي مەملەكەتتىك كىتاپحاناسىنىڭ شىعىس ادەبيەتى ورتالىعىندا اقىن مارفۋعا بەكتەمىروۆانى ەسكە الۋعا ارنالعان «ارماننىڭ اق جەلكەنى» اتتى شىعارماشىلىق كەش ءوتتى. القالى جيىنعا اقىن-جازۋشىلار, قوعامدىق ۇيىمداردىڭ وكىلدەرى, مەملەكەتتىك ورگانداردىڭ قىزمەتكەرلەرى, ارداگەرلەر مەن ستۋدەنتتەر قاتىستى.
شىعارماشىلىق كەشتى قىرعىز رەسپۋبليكاسى ۇلتتىق جازۋشىلار وداعىنىڭ مۇشەسى جامالكۇل ساباەۆا جۇرگىزىپ وتىردى. الدىمەن رەسەي مەملەكەتتىك كىتاپحاناسىنىڭ الەۋمەتتىك-مادەني باعدارلامالارىنىڭ ۇيلەستىرۋشىسى, ونەرتانۋشى مارگاريتا مكرتىچەۆا ءسوز الدى.
«رەسەي مەملەكەتتىك كىتاپحاناسى – ەلىمىزدەگى باستى ءارى ەۋروپاداعى تاڭداۋلى ءىرى كىتاپحانالاردىڭ ءبىرى. وسىناۋ وقىرمانى كوپ ۇلكەن كىتاپحانادا قازاق اقىنى مارفۋعا بەكتەمىروۆانى ەسكە الۋعا ارنالعان شىعارماشىلىق كەشتىڭ ءوتۋى – ەلەۋلى وقيعا. بۇل ومىردەن ەرتە كەتكەن اقىن ەسىمىن قۇرمەتتەپ, ونىڭ شىعارمالارىن تۋعان جەرىنەن تىسقارى جەرلەرگە دە كەڭىنەن ناسيحاتتاۋ بولىپ سانالادى. وسى يگى ءىستىڭ جۇزەگە اسۋىنا بارىنشا جاناشىرلىق تانىتىپ, ۇيىتقى بولدىق», دەدى ول.
ال رەسەيدەگى قازاقستان ەلشىلىگىنىڭ كەڭەسشىسى ەركەبۇلان بەكتۇرعانوۆ اقىننىڭ شىعارماشىلىعىنا توقتالدى.
«مارفۋعا بەكتەمىروۆانىڭ سىرشىل ولەڭدەرىن جاس كەزىمىزدەن وقىدىق. تەك وكىنىشتىسى, اقىننىڭ ارامىزدا جوقتىعى. اقىندى ەسكە الۋ كەشى ماسكەۋ قالاسىنىڭ تورىندە وتكەنىنە قۋانىشتىمىز. بۇل – ەلىمىز ءۇشىن مەرەي, ماقتانىش. سونداي-اق ەكى ەل اراسىنداعى دوستىق قارىم-قاتىناستى نىعايتىپ, مادەني بايلانىستاردى جانداندىرادى», دەدى ول.
ماسكەۋ كاسىبي ادەبيەتشىلەر وداعىنىڭ, رەسەي جازۋشىلار وداعى ماسكەۋ وبلىستىق ۇيىمىنىڭ مۇشەسى اينۇر بەكبولوتوۆا «مارفۋعا بەكتەمىروۆا شىعارمالارىنىڭ ارقاۋى», «كايرىكتار كازىناسى – موسكوۆسكيە ناپەۆى» ادەبي بىرلەستىگىنىڭ مۇشەسى زاميرا زايليدينوۆا «مارفۋعا بەكتەمىروۆانىڭ اۋدارماشىلىق قىزمەتى» دەگەن تاقىرىپتاردا بايانداما جاسادى. «ورىس-ۆەتنام دوستىعى» قوعامىنىڭ توراعاسى فام دىك حاي مارفۋعا بەكتەمىروۆا ولەڭدەرىن تىڭداي وتىرىپ, جىلى اسەر العانىن ايتتى.
رەسەي جازۋشىلار وداعى ماسكەۋ وبلىستىق ۇيىمى باسقارماسىنىڭ مۇشەسى, جازۋشى يرينا وۆچارەنكو, «يا دەلوۆايا جەنششينا» جۋرنالىنىڭ باس رەداكتورى گۇلجان داۆلەتبەكوۆا, «ارۋ ءدۇينو» ادەبي بىرلەستىگىنىڭ جەتەكشىسى ايجان ماماسادىقوۆا اقىن ولەڭدەرىن ورىس, قازاق, قىرعىز تىلدەرىندە وقىدى.
ازيا مەن افريكا ەلدەرى اسسامبلەياسى ادەبي كەڭەسىنىڭ توراعاسى, «ليففت» قورىنىڭ پرەزيدەنتى, ادەبيەت سىنشىسى مارگاريتا ال بۇگىنگى تاڭدا ارامىزدا جوق بولسا دا مارفۋعانىڭ شىعارماشىلىعى وزىنە جاقىن كورىنەتىنىن تىلگە تيەك ەتىپ, ونىڭ نازىك سەزىمگە تولى جىرلارىن وزگە تىلگە اۋدارۋعا شاقىردى.
رەسەي جۇرتشىلىعىنا مارفۋعا بەكتەمىروۆانىڭ ەسىمى جاقسى تانىس. «ەدينايا روسسيا» پارتياسى مەن رەسەي فەدەراتسياسى مەملەكەتتىك دۋماسىنىڭ قولداۋىمەن اقىننىڭ «بەلىي پارۋس مەچتى» كىتابى جالپى تارالىمى 10 مىڭ دانامەن شىقتى. ءبىر توپ ولەڭدەرى «مولودايا گۆارديا» جۋرنالىندا جارىق كوردى.
«مارفۋعا بەكتەمىروۆانىڭ ماسكەۋدە شىققان «بەلىي پارۋس مەچتى» دەگەن كىتابى ۇنادى. قازاقشاسى «ارماننىڭ اق جەلكەنى» بولادى عوي. از عانا عۇمىر كەشكەن تالانتتى اقىننىڭ ارمانى ورىندالسا ەكەن, رەسەي جۇرتىنىڭ الدىندا بەدەلىمىز كوتەرىلسىن دەپ ءىس-شارانى ۇيىمداستىرۋدىڭ جاۋاپتى ءبىر بولىگىن ءوز موينىما الدىم. بۇل, ءبىر جاعىنان, قازاق ەلىنىڭ ابىرويى عوي. ءوزىم ورىنبور جەرىندە تۋسام دا, اتاجۇرتقا قارايلاپ, باۋىرلارىما تىلەكتەس بولىپ جۇرەمىن», دەدى «سانكت-پەتەربۋرگتەگى ورىنبور قازاقتارىنىڭ جەرلەستىگى» قوعامدىق بىرلەستىگىنىڭ پرەزيدەنتى ايگۇل يريشەۆا.
ادەبي كەشتى «كايرىكتار كازىناسى – موسكوۆسكيە ناپەۆى» قوعامدىق بىرلەستىگى, «سانكت-پەتەربۋرگتەگى قازاقتاردىڭ ورىنبور قازاقتارىنىڭ جەرلەستىگى», «گورياچەە وزەرو» الەۋمەتتىك-مادەني جوبالاردى دامىتۋ جانە ءداستۇرلى وتباسىلىق قۇندىلىقتاردى ساقتاۋ جونىندەگى بىرلەستىگى, «بيرگە» مەديارەسۋرسى ەۋرازيا مەن افريكا حالىقتارى اسسامبلەياسىنىڭ جانە قازاقستانداعى حالىق ديپلوماتيالىق حالىقارالىق دوستاستىعىنىڭ قولداۋىمەن ۇيىمداستىردى. سونداي-اق كەشتى وتكىزۋگە ەلىمىزدىڭ سىرتقى ىستەر مينيسترلىگى, قازاقستاننىڭ رەسەيدەگى ەلشىلىگى قولداۋ كورسەتتى.