بۇگىن استاناداعى Kinopark 8 IMAX Saryarka كينوتەاترىندا وتاندىق «التىن ادام» انيماتسيالىق ءفيلمىنىڭ العاشقى جابىق كورسەتىلىمى ءوتتى. ءىس-شاراعا بالالار, اتا-انالار, باق وكىلدەرى مەن كينو سالاسىنىڭ ماماندارى قاتىستى. بۇل تۋىندى تەك انيماتسيالىق جوبا عانا ەمەس, ءتول تاريحىمىزدى تانۋعا, ۇلتتىق قۇندىلىقتاردى بويعا سىڭىرۋگە باعىتتالعان تاربيەلىك ءمانى زور مادەني باستاما رەتىندە ۇسىنىلىپ وتىر, دەپ جازدى Egemen.kz.
فيلم شاكەن ايمانوۆ اتىنداعى «قازاقفيلم» ۇلتتىق كينوستۋدياسىندا, قر مادەنيەت جانە اقپارات مينيسترلىگىنىڭ تاپسىرىسى بويىنشا جانە ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن.
«بۇل انيماتسيالىق ءفيلمنىڭ تاربيەلىك ءمانى وتە جوعارى. سەبەبى بۇگىندە قازاقي ءارى تاريحي مۋلتفيلمدەر از. كوبىنەسە بالالارعا ارنالعان كونتەنت ورىسشا شىعىپ جاتىر, بۇل بۇلدىرشىندەردىڭ ءتىلىنىڭ دە سول باعىتتا قالىپتاسۋىنا اسەر ەتۋدە. سوندىقتان ۇلتتىق انيماتسيانى قولداۋ وتە ماڭىزدى. مادەنيەت جانە اقپارات مينيسترلىگىنىڭ تاپسىرىسىمەن, ۇلتتىق كينونى قولداۋ ورتالىعىنىڭ قولداۋىمەن قازاقفيلم وسىنداي ماڭىزدى تۋىندىنى جارىققا شىعاردى. بۇل باعىتتاعى جۇمىس جالعاسۋى ءتيىس», دەدى «قازاقفيلم» ۇلتتىق كينوستۋدياسىنىڭ ءباسپاسوز ءبولىمىنىڭ باسشىسى.
انيماتسيالىق لەنتادا كونە ساق جاۋىنگەرى اڭكىلدىڭ «ماڭگىلىك وتتى» ىزدەپ, حان ءتاڭىرى شىڭىنا اتتانعان ساپارى سۋرەتتەلەدى. جول بويى ول ءتۇرلى سىناقتاردان ءوتىپ, ەرلىك پەن رۋحاني كەمەلدىكتى تانىپ, شىنايى باتىرلىقتىڭ ماعىناسىن اشادى. فيلم تاريحي جانە كوركەم تۇرعىدان ۇندەسىپ, كورەرمەنگە ۇلتتىق بولمىس پەن رۋح جايلى تەرەڭ ويلانۋعا مۇمكىندىك بەرەدى.
ءفيلمنىڭ ستسەناري اۆتورى, جازۋشى ۇلاربەك نۇرعالىم ۇلى «التىن ادام» تۋىندىسىنىڭ تەك انيماتسيالىق ەمەس, تاريحي سيپاتقا دا يە ەكەنىن ەرەكشە اتاپ ءوتتى.
«جالپى مۇنى تاريحي فيلم دەپ تە ايتۋعا بولادى. سەبەبى التىن ادام – تاريحي تۇلعا. بۇگىنگە دەيىن ءبىز ونىڭ سىرتقى كەلبەتىن, كيىمىنىڭ التىننان ەكەنىن الەمگە كورسەتتىك. ال بۇل فيلمدە رەجيسسەردىڭ نەگىزگى يدەياسى – ونىڭ ىشكى التىنىن, ياعني رۋحاني بايلىعىن كورسەتۋ بولدى. بىزدەگى تابىلعان التىن ادامدا ءتورت جەبە بار. ءبىز ولاردى ادامنىڭ بويىنداعى ەرلىك, پاراسات, ادىلدىك جانە ىزگىلىك دەپ سيپاتتادىق. فيلمدە ءۇش جەبە بەينەلەنگەن, ال باستى كەيىپكەر ءتورتىنشى جەبەنى – ىزگىلىكتى ىزدەيدى. بۇل ساپار ارقىلى رۋحاني جەتىلۋ جولى سۋرەتتەلەدى. كوشپەندىلەر دۇنيەتانىمىندا جاۋدى سىرتىنان اتپايدى. ەرلىك ۇيىقتاپ جاتقاندا پاراسات ونى وياتپاي ولتىرمەيدى. قايتا وياتىپ, تەڭ دارەجەدە شايقاسادى. كەيىن ەرلىك, پاراسات جانە ادىلدىك ۇشەۋى بىرىگىپ, ىزگىلىكتى ىزدەۋگە اتتانادى. بۇل – ناعىز ىشكى كۇرەستىڭ كورىنىسى. باستى ماقسات – بويىندا وسى ءتورت قاسيەت توعىسقان ناعىز التىن ادامنىڭ قانداي بولاتىنىن كورسەتۋ», دەدى ستسەناري اۆتورى.
كورسەتىلىمگە بالاسىمەن كەلگەن انالاردىڭ ءبىرى ءفيلمنىڭ بالا ساناسىنا اسەرى مەن قازاق تىلىندەگى ساپالى كونتەنتتىڭ ماڭىزدىلىعىنا توقتالدى.
«مۋلتفيلم وتە ۇنادى. اسىرەسە قازاق تىلىندە بولعانى قۋانتتى. قازىر بالالارىمىز كوبىنە باتىستىق مۋلتفيلمدەردى كورىپ, سولاردىڭ كەيىپكەرلەرىنە ەلىكتەپ ءوسىپ جاتىر. ال التىن ادام – جاي عانا اڭىز ەمەس, قازاق تاريحىنداعى ناقتى تۇلعا. بالالارىمىزدىڭ ساناسىنا وسىنداي كەيىپكەرلەر ارقىلى ۇلتتىق رۋحتى سىڭىرسەك, بۇل – بولاشاققا سالىنعان ۇلكەن جول. وسىنداي ءوز باتىرلارىمىز جايلى تاعى دا كوپ مۋلتفيلمدەر تۇسىرىلسە ەكەن دەگەن انالىق تىلەگىم بار».
فيلم بارلىق كورەرمەننىڭ ىستىق ىقىلاسىنا بولەنىپ, رەجيسسەرلەر مەن سۋرەتشىلەر ەڭبەگى جوعارى باعالاندى.