Maqsut Narikbayev University بازاسىندا «قازاقستان رەسپۋبليكاسىنىڭ مەملەكەتتىك قىزمەتى تۋرالى» جاڭا زاڭ جوباسىنىڭ نەگىزگى ەرەجەلەرى تالقىلاندى. دوڭگەلەك ۇستەل فورماتىندا وتكەن جيىنعا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي, ءماجىلىس دەپۋتاتتارى, ۋنيۆەرسيتەت باسشىلىعى, عىلىمي جانە ساراپتامالىق قوعامداستىق وكىلدەرى قاتىستى.
زاڭ جوباسى مەملەكەتتىك قىزمەتتى دامىتۋدىڭ 2024–2029 جىلدارعا ارنالعان تۇجىرىمداماسىن ىسكە اسىرۋ اياسىندا ازىرلەنگەن. قۇجاتتا جاساندى ينتەللەكت مۇمكىندىكتەرىن قولدانۋ, مەملەكەتتىك قىزمەتكەرلەر ءۇشىن كولدەنەڭنەن ءوسۋ مۇمكىندىكتەرىن ەنگىزۋ سىندى وزگەرىستەر بار. باسقوسۋدا اگەنتتىك توراعاسى زاڭ جوباسىندا مەملەكەتتىك قىزمەتتىڭ ميسسياسى, مىندەتتەرى مەن تالاپتارى دا جاڭاشا ايقىندالعانىن اتاپ ءوتتى.
– مەملەكەت باسشىسىنىڭ «ادام مەملەكەت ءۇشىن ەمەس, مەملەكەت ادام ءۇشىن» دەگەن ىرگەلى قاعيداسى مەملەكەتتىك اپپاراتتىڭ جۇمىسىن اشىق, ادامعا باعدارلانعان سيپاتتا ىلگەرىلەتۋدى كوزدەيدى. جاڭا زاڭ جوباسىندا وتانسۇيگىشتىك, اشىقتىق پەن كاسىبيلىك, كليەنتكە باعدارلانۋ مەن قۇقىق بۇزۋشىلىققا توزبەۋشىلىكتى قامتيتىن تالاپتاردى زاڭنامالىق تۇرعىدا بەكىتۋ جوسپارلانىپ وتىر, – دەدى د.جازىقباي.
سونداي-اق قۇجاتتا مەملەكەتتىك قىزمەتشىلەردىڭ مەملەكەتتىك جانە قوعامدىق مۇددەلەرگە ادالدىعىن قامتاماسىز ەتۋگە باعىتتالعان ءمىنسىز بەدەل ينستيتۋتىن ەنگىزۋ قاراستىرىلعان. ودان بولەك, بيلىك تارماعىندا قىزمەت ەتەتىن ازاماتتارعا مەملەكەت پەن قوعامنىڭ مۇددەلەرىن قورعاۋ قاجەتتىلىگى تۋىنداعان جاعدايدا جاۋاپكەرشىلىكتەن جانە بيۋروكراتيادان قايمىقپاي باسقارۋشىلىق شەشىمدەر قابىلداۋعا مۇمكىندىك بەرەتىن نورمالار ەنگىزىلگەن.
تاعى ءبىر وزگەرىس – ىشكى كونكۋرستاردى جويۋ. مەملەكەتتىك قىزمەت ىستەرى اگەنتتىگى توراعاسىنىڭ ورىنباسارى سالاۋات مۇكسىموۆتىڭ ايتۋىنشا, بۇل كادرلىق ىرىكتەۋ مۇمكىندىگىن كەڭەيتىپ, مەملەكەتتىك قىزمەتكە بىلىكتى مامانداردى تارتۋعا جول اشادى.
– جاپونيا مەن سينگاپۋر تاجىريبەسىنە سۇيەنىپ, جاستاردى مەملەكەتتىك ورگاندارعا تارتۋ ماقساتىندا مەكتەپ جانە ۋنيۆەرسيتەت دەڭگەيىن قامتيتىن ەرتە كاسىپتىك باعدارلاۋ ينستيتۋتى قۇرىلادى. باستاما دارىندى جاستاردى مەكتەپ جاسىنان باستاپ مەملەكەتتىك قىزمەتكە ىنتالاندىرۋعا مۇمكىندىك بەرەدى. جالپى, بۇل زاڭ جوباسى مەملەكەتتىك قىزمەتتىڭ ءمانىن, ونىڭ باستى ماقساتتارىن جانە ازاماتتاردىڭ قوعام الدىنداعى جاۋاپكەرشىلىگىن ايقىندايدى. قۇجات تەك ەڭبەك جانە قۇقىقتىق قاتىناستاردى ەمەس, سونداي-اق مەملەكەتتىك اپپارات پەن قوعام جانە ازامات اراسىنداعى ءوزارا بايلانىستى رەتتەۋگە باعىتتالعان, – دەدى ول.
دوڭگەلەك ۇستەل جيىنىنا قاتىسۋشىلاردىڭ پىكىرىنشە, ۇسىنىلىپ وتىرعان زاڭنامالىق شارالار مەملەكەتتىك اپپاراتتىڭ ءتيىمدى قىزمەت ەتۋىنە, سونداي-اق مەملەكەتتىك ورگانداردىڭ قىزمەتىنە قوعام سەنىمىنىڭ ارتۋىنا ىقپال ەتەدى. ءىس-شارا قورىتىندىسىندا ساراپشىلار زاڭ جوباسىنا قاتىستى ۇسىنىس-پىكىرلەرىن ورتاعا سالىپ, عىلىمي-ساراپتامالىق قولداۋ كورسەتۋگە دايىن ەكەنىن جەتكىزدى.