ەلىمىزدە «قاراسورا - 2025» جەدەل-پروفيلاكتيكالىق ءىس-شاراسى باستالدى. 1 ماۋسىم – 31 قازان ارالىعىندا وتەتىن شارانىڭ العاشقى 3 كۇنىندە قىزىلوردادا ەسىرتكى ءوسىرۋدىڭ 5 دەرەگى انىقتالىپتى, دەپ حابارلايدى Egemen.kz.
بۇل تۋرالى ارنايى ۇيىمداستىرىلعان بريفينگتە وبلىستىق پوليتسيا دەپارتامەنتى باستىعىنىڭ ءبىرىنشى ورىنباسارى, پوليتسيا پولكوۆنيگى سەرىك توقتىباەۆ حابارلادى.
پروفيلاكتيكالىق ءىس-شارا ماقساتى – ەسىرتكىگە بايلانىستى قۇقىق بۇزۋشىلىقتاردىڭ الدىن الىپ, قۇرامىندا ەسىرتكى بار وسىمدىكتەردى ءوسىرۋ جانە دايىنداۋ فاكتىلەرىنىڭ جولىن كەسۋ. جەرگىلىكتى اتقارۋشى جانە باسقا قۇقىق قورعاۋ ورگاندارىمەن بىرلەسكەن جوسپارعا ساي بارلىق اۋداندىق پوليتسيا بولىنىستەرىندە ءموبيلدى-ىزدەستىرۋ جانە جەدەل-تەرگەۋ توپتارى جاساقتالدى. دەپارتامەنتتىڭ بارلىق بولىنىستەرىندە سەنىم تەلەفوندارى ىسكە قوسىلدى.
العاشقى 3 كۇندە ەسىرتكى ءوسىرۋدىڭ 5 دەرەگى انىقتالدى. بەس ءجۇز وتىز ءتۇپ سورا مەن جارتى كيلوعا جۋىق كەپتىرىلگەن ماريحۋانا تابىلىپ, تولىق جويىلدى.
پوليتسيا پولكوۆنيگى كەي سايتتاردا تاپسىرمالاردى وزدىگىنەن ورىندايتىن چات-بوتتار ارقىلى سينتەتيكالىق ەسىرتكى زاتتاردى تاراتۋشىلاردى جۇمىسقا شاقىرىپ جاتقانىن ايتادى.
«اتا-انالار بالالارىنىڭ ءجۇرىس-تۇرىسىنا, مىنەز-قۇلقىنا, ارالاساتىن ورتاسىنا كوڭىل اۋدارعانى ءجون. وڭاي اقشا قىزىققان مەكتەپ وقۋشىلارى مەن ستۋدەنتتەر جاۋاپقا تارتىلىپ جاتىر. ەسىرتكىسىز قوعام قۇرۋ بارىمىزگە ورتاق مىندەت ەكەنىن ۇمىتپايىق», دەدى س.توقتىباەۆ.