بالالار مەديتسيناسىنداعى جاڭا ستاندارتتار مەن جەتىستىكتەر تۋرالى نە بىلەمىز؟

ءاربىر ءسابي دۇنيەگە كەلگەننەن باستاپ مەديتسينالىق باقىلاۋ جۇيەسىمەن قامتىلعان. جىل سايىن 0 – دەن 6 جاسقا دەيىن 2 ملن-نان استام بالا سكرينينگتەن وتەدى, 4,5 ملن-نان استام بالا پروفيلاكتيكالىق تەكسەرۋدەن وتەدى, 1,5 ملن-نان استام بالا مىندەتتى يممۋنداۋدان وتەدى. بۇل قىزمەتتەردىڭ بارلىعى تەگىن – مەديتسينالىق كومەكتىڭ كەپىلدىك بەرىلگەن كولەمى مەن ءمامس جۇيەسى شەڭبەرىندە ۇسىنىلادى. مەديتسينالىق قولداۋ مەكتەپ وقۋشىلارىن دا قامتيدى. ەلىمىزدە 6,5 مىڭ مەديتسينالىق پۋنكت جۇمىس ىستەيدى, ءاربىر مەكتەپ ەمحاناعا بەكىتىلگەن.

جاڭا تۋعان نارەستەلەرگە ەرەكشە نازار اۋدارىلادى. قازاقستان ورتالىق ازيادا نەوناتالدىق كومەك ستاندارتىن ەنگىزگەن ءبىرىنشى ەل بولدى, وندا رەانيماتسيادا ءبىر سابيگە ءبىر مەدبيكە كەلەدى. سونداي-اق 1 مىڭنان استام مامانداردى, ونىڭ ىشىندە ءوڭىر ەلدەرىنەن بىرىكتىرەتىن نەوناتولوگتاردىڭ ونلاين-قاۋىمداستىعى قۇرىلدى. قازاقستاندىق دارىگەرلەر سالماعى 500 گرامنان اساتىن جاڭا تۋعان نارەستەلەردى ەمدەيدى. توسەك قورىنىڭ 20%-عا ۇلعايۋىنىڭ ناتيجەسىندە جىل سايىن تۋا بىتكەن پاتولوگياسى بار جاڭا تۋعان نارەستەلەرگە 1,5 مىڭعا دەيىن وتا جاسالادى. وتادان كەيىنگى ءومىر ءسۇرۋ دەڭگەيى 93%-عا جەتتى. بالالارعا كورسەتىلەتىن مەديتسينالىق كومەكتىڭ ساپاسىن جاقسارتۋ ماقساتىندا ءتيىمدى پەريناتالدىق تەحنولوگيالار, بالا جاسىنداعى اۋرۋلاردى بىرىكتىرىپ باسقارۋ تاسىلدەرى جانە ەرتە شاقتاعى بالالاردى پاتروناجدىق قاداعالاۋدىڭ امبەباپ-پروگرەسسيۆتى مودەلى حالىقارالىق ۇسىنىمدارعا ساي ەنگىزىلۋدە.

انا مەن بالا دەنساۋلىعى سالاسىنا باعىتتالعان جۇيەلى ستراتەگيا مەن ەلەۋلى ينۆەستيتسيالاردىڭ ناتيجەسىندە ەلدە بالا ءولىمىنىڭ كورسەتكىشتەرى تاريحي تۇرعىدان ەڭ تومەن دەڭگەيگە ءتۇستى: نەوناتالدىق ءولىم – مىڭ ءتىرى تۋعانعا شاققاندا 3,37, نارەستە ءولىمى – 6,80, بالالار ءولىمى – 9,30.

سونىمەن قاتار, ونكوگەماتولوگيا بەلسەندى دامىپ كەلەدى. ەمدەۋ حالىقارالىق حاتتامالارعا سايكەس جۇرگىزىلەدى جانە قۇرامىندا پوليحيميوتەراپيا, ساۋلەلىك تەراپيا, حيرۋرگيا مەن گەموپوەزدىك ءدىڭ جاسۋشالارىن ترانسپلانتاتتاۋ بار. بۇل – اللوگەندى, اۋتولوگتى جانە گاپلويدەنتيكالىق ادىستەردى قامتيدى. 2013 جىلدان بەرى 515 ترانسپلانتاتتاۋ جۇرگىزىلدى, ونىڭ ىشىندە 28-ءى حالىقارالىق دونورلار تىركەلىمىنەن (رەسەي, گەرمانيا, پولشا) الىنعان تۋىستىق ەمەس دونورلارمەن جۇزەگە اسىرىلدى. يننوۆاتسيالىق تاسىلدەردىڭ – ينتراارتەريالىق حيميوتەراپيا, «وسەتىن» ەندوپروتەزدەردىڭ 3D-مودەلدەۋ تەحنولوگياسى جانە تارگەتتىك يممۋنوتەراپيانىڭ ناتيجەسىندە بالالارداعى ونكولوگيالىق اۋرۋلار بويىنشا جالپى ومىرشەڭدىك 70%-دان استى.

ەلىمىزدەگى جەتەكشى كلينيكالاردىڭ بازاسىندا بالالار دەنساۋلىعىن ساقتاۋ بويىنشا تاسىلدەر ۇنەمى جەتىلدىرىلىپ, جاڭا تەحنولوگيالار مەن دياگنوستيكالاۋ جانە ەمدەۋدىڭ زاماناۋي ادىستەرى ەنگىزىلۋدە.