بۇل تۋرالى اقوردانىڭ ءباسپاسوز قىزمەتى حابارلادى, دەپ جازادى Egemen.kz.
«استانا حالىقارالىق فورۋمىنىڭ پلەنارلىق وتىرىسى رەسپۋبليكالىق تەلەارنالاردان, سونداي-اق Facebook, YouTube, Telegram الەۋمەتتىك جەلىلەرىندەگى اقوردانىڭ رەسمي پاراقشالارىنان تىكەلەي ەفيردە كورسەتىلەدى. ترانسلياتسيا ساعات 10.30-دا باستالادى», دەلىنگەن حابارلامادا.
ايتا كەتەيىك, فورۋم استانادا 29-30 مامىر كۇندەرى وتەدى.
فورۋمدى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ اشادى.
استانا حالىقارالىق فورۋمى – ورتالىق ازيا ايماعىنداعى ەڭ ءىرى ءىس-شارا, ول حالىقارالىق كۇن تارتىبىندەگى نەگىزگى جانە وزەكتى ماسەلەلەر بويىنشا شەتەل ۇكىمەتتەرىنىڭ, حالىقارالىق ۇيىمداردىڭ, ءىرى كومپانيالاردىڭ, ىسكەرلىك جانە اكادەميالىق قاۋىمداستىقتىڭ جوعارى لاۋازىمدى دەلەگاتتارى اراسىنداعى ديالوگ ءۇشىن جاھاندىق الاڭ بولىپ تابىلادى. AIF-تە سىرتقى ساياسات, ەكونوميكا جانە قارجى, قاۋىپسىزدىك, تۇراقتى دامۋ, ەنەرگەتيكا جانە كليمات ماسەلەلەرى تالقىلانادى.