عىلىم ورداسىندا اباي قۇنانباي ۇلىنىڭ 180 جىلدىق مەرەيتويىنا وراي «اباي مەكتەبى جانە ۇلت زيالىلارى» تاقىرىبىندا حالىقارالىق تانىمدىق ءىس-شارا ءوتتى, دەپ جازادى Egemen.kz اقپارات اگەنتتىگى.
اتالعان شارانى «عىلىم ورداسى» رمك قازاقستان عىلىمىنىڭ تاريحى مۋزەيى مەن ءال-فارابي اتىنداعى قازاق ۇلتتىق ۋنيۆەرسيتەتى جانىنداعى «تۇران-يران» عىلىمي-زەرتتەۋ ورتالىعى بىرلەسىپ ۇيىمداستىردى.
شاراعا «عىلىم ورداسى» رمك باس ديرەكتورى ۇلار مۇقاجانوۆ, پرەزيدەنت جانىنداعى ۇلتتىق عىلىم اكادەمياسىنىڭ ۆيتسە-پرەزيدەنتى, اكادەميك اسقار جۇمادىلداەۆ, «تۇران-يران» عىلىمي-زەرتتەۋ ورتالىعىنىڭ ديرەكتورى, پروفەسسور يسلام جەمەنەي, م.و.اۋەزوۆ اتىنداعى ادەبيەت جانە ونەر ينستيۋتىنىڭ باس ديرەكتورى كەنجەحان ماتىجانوۆ, يران يسلام رەسپۋبليكاسىنىڭ الماتى قالاسىنداعى باس كونسۋلدىعى جانىنداعى مادەني وكىلدىكتىڭ ديرەكتورى حوسسەين اعازادە, سونداي-اق عىلىم مەن مادەنيەت سالاسىنىڭ تانىمال تۇلعالارى, شەتەلدىك ەلشىلىكتەردىڭ وكىلدەرى, جاس عالىمدار مەن زەرتتەۋشىلەر قاتىستى.
ءىس-شارانىڭ باستى ماقساتى – اباي قۇنانباي ۇلىنىڭ رۋحاني مۇراسى مەن شىعارماشىلىعىن ۇلىقتاپ, ونى شىعىس مادەنيەتىمەن بايلانىستىرا زەردەلەۋ ارقىلى ۇلتتىق رۋحانياتتى, عىلىم مەن ءبىلىمدى كەڭىنەن ناسيحاتتاۋ.
جيىن بارىسىندا «عىلىم ورداسى» رمك باس ديرەكتورى ۇلار مۇقاجانوۆ «اباي – ءبىزدىڭ ۇلتتىق ويلاۋ جۇيەمىزدىڭ, رۋحاني-مادەني بولمىسىمىزدىڭ نەگىزىن قالاۋشى. بۇگىنگى عىلىمي جيىندا اباي مۇراسىن تەك ادەبي تۇرعىدا ەمەس, وركەنيەتتىك, تاريحي-فيلوسوفيالىق تۇرعىدا قايتا قاراپ, ونىڭ شىعىس مادەنيەتىمەن بايلانىسىن اشۋ – وتە وزەكتى ءارى قۇندى قادام. بۇل – جاستار ءۇشىن دە, عىلىمي قاۋىم ءۇشىن دە ۇلكەن تاعىلىم مەكتەبى», دەپ اتاپ ءوتتى.
ءىس-شارا اياسىندا پروفەسسور يسلام جەمەنەيدىڭ بىرقاتار عىلىمي ەڭبەكتەرىنىڭ تۇساۋكەسەرى ءوتتى. اتاپ ايتقاندا, پارسى تىلىندە جازىلعان قازاق تاريحى, ادەبيەتى, مادەنيەتى مەن تىلىنە ارنالعان زەرتتەۋلەرى, قازاق تىلىندەگى «اباي جانە شىعىس» مونوگرافياسى, سونداي-اق وزبەك تىلىندە جارىق كورگەن ء«امىر تەمىردىڭ ساياسي قىزمەتى مەن جورىقتارى» ەڭبەگى كوپشىلىككە تانىستىرىلدى.
مادەنيەت پەن ءبىلىم سالاسىنىڭ وكىلدەرى, عالىمدار مەن زەرتتەۋشىلەر اباي مۇراسىنىڭ عىلىمي, رۋحاني جانە مادەني ماڭىزى, سونداي-اق پروفەسسور يسلام جەمەنەي ەڭبەكتەرىنىڭ وزەكتىلىگى تۋرالى مازمۇندى باياندامالار جاساپ, پىكىر الماستى. باياندامالاردا ابايدىڭ شىعارماشىلىق مۇراسى مەن دۇنيەتانىمى شىعىس وركەنيەتىمەن ساباقتاستىرىلا زەردەلەنىپ, ونىڭ رۋحاني تەرەڭدىگى عىلىمي نەگىزدە تالداندى.
عىلىم مەن رۋحانيات توعىسقان تاعىلىمدى باسقوسۋ اباي دۇنيەتانىمىن قازىرگى زامانمەن ساباقتاستىرىپ, شىعىس پەن قازاق وركەنيەتتەرىنىڭ تاريحي-مادەني ۇندەستىگىن جاڭاشا پايىمداۋعا جول اشقان, ماڭىزى زور عىلىمي الاڭعا اينالدى.
الماتى