جالپىۇلتتىق سوتسيال-دەموكراتيالىق پارتياسىنىڭ دەپۋتاتتارى پرەمەر-مينيستر ولجاس بەكتەنوۆكە رەسمي ساۋال جولداپ, مونوقالالاردىڭ الەۋمەتتىك-ەكونوميكالىق جاعدايىن جاقسارتۋ ءۇشىن جۇيەلى جانە ناقتى شارالار قابىلداۋدى ۇسىندى, دەپ حابارلايدى Egemen.kz.
جسدپ فراكتسياسىنىڭ دەپۋتاتتارى — ا. راحىمجانوۆ, ن. اۋەسباەۆ, ا. ساعىندىقوۆا جانە ن. سايلاۋباي — قازاقستانداعى مونوقالالاردىڭ قازىرگى جاعدايىنا الاڭداۋشىلىق ءبىلدىرىپ, پرەمەر-مينيستر ولجاس بەكتەنوۆكە دەپۋتاتتىق ساۋال جولدادى. ولار سوڭعى ونجىلدىقتا ەلدەگى مونوقالالار سانى 27-دەن 20-عا دەيىن قىسقارعانىن, كەيبىر قالالار ءوز ەكونوميكالارىن ءارتاراپتاندىرۋ ارقىلى تىزىمنەن شىقسا, ارقالىق پەن سەرەبريانسك سەكىلدى قالالاردا قالا قۇراۋشى كاسىپورىنداردىڭ جابىلۋى سالدارىنان مارتەبەسىن جوعالتقانىن اتاپ ءوتتى.
دەپۋتاتتاردىڭ مالىمەتىنشە, مونوقالالاردىڭ 15-ءى شيكىزاتتىق باعىتتا جۇمىس ىستەيدى. تەرەڭ وڭدەۋ سالاسى ءالى دامىماي وتىر. مونوقالالارداعى 14 مىڭنان استام كاسىپورىن 2023 جىلى 18,5 ترلن تەڭگە كولەمىندە ءونىم وندىرگەنىمەن, بۇل كورسەتكىش تۇرعىنداردىڭ ءومىر ساپاسىنا وڭ اسەر ەتپەي وتىر. كەرىسىنشە, جىل سايىن حالىق سانى ازايىپ, اسىرەسە جاستار كوبىرەك كەتىپ جاتىر.
جسدپ شىعىس قازاقستانداعى التاي, سەرەبريانسك جانە ريددەر قالالارىنداعى الەۋمەتتىك جاعدايعا ەرەكشە توقتالىپ, بۇل قالالاردا ءبىلىم بەرۋ مەن دەنساۋلىق ساقتاۋ مەكەمەلەرىندە كادر تاپشىلىعى وتە جوعارى ەكەنىن كورسەتتى. دەپۋتاتتار «ديپلوممەن – اۋىلعا» باعدارلاماسىن مونوقالالارعا دا ەنگىزۋ قاجەتتىگىن ايتتى, سەبەبى بۇل قالالار حالىق سانى مەن ءومىر ءسۇرۋ جاعدايلارى جاعىنان اۋىلداردان ارتىق ەمەس.
فراكتسيا وكىلدەرى سونىمەن قاتار مونوقالالاردا كاسىبي دايارلاۋ مەن قايتا دايارلاۋ باعدارلامالارىن قايتا قاراپ, شاعىن جانە ورتا بيزنەستى قولداۋدى كۇشەيتۋ, ءار قالانىڭ دامۋ ستراتەگياسىن ازىرلەۋ جانە فەرمەرلىك شارۋاشىلىقتاردى نەسيەلەندىرۋدى ۇسىندى. سونىمەن بىرگە, مونوقالالاردىڭ وڭ ينۆەستيتسيالىق ءيميدجىن قالىپتاستىرۋ ماقساتىندا ۇلتتىق اقپاراتتىق ناۋقان ۇيىمداستىرۋ قاجەتتىگىن دە اتاپ ءوتتى.
ء«بىز ۇكىمەتتەن دەكلاراتيۆتى ۋادەلەردى ەمەس, ناقتى, جۇيەلى جانە قوعامدىق قادامداردى كۇتەمىز. مونوقالالاردىڭ ماسەلەسى – ۇلتتىق تۇراقتىلىق پەن الەۋمەتتىك ادىلەتتىلىكتىڭ ماڭىزدى بولىگى. جالپىۇلتتىق سوتسيال-دەموكراتيالىق پارتيا فراكتسياسىنىڭ دەپۋتاتتارى جاۋاپتى زاڭدا بەلگىلەنگەن مەرزىمدە جازباشا تۇردە بەرۋىڭىزدى سۇراي وتىرىپ, مونوقالالار ماسەلەسىن شەشۋدە ناقتى جانە جۇيەلى شارالار قابىلداۋدى تالاپ ەتەدى», دەلىنگەن دەپۋتاتتىق ساۋالدا.
جانەل تولەۋبەكوۆا, ەۇۋ ستۋدەنتى