بيىل ازاماتتاردى تۇرعىن ۇيمەن قامتاماسىز ەتۋدىڭ قوسىمشا شارالارى ەنگىزىلىپ, 19,2 ملن شارشى مەتر تۇرعىن ءۇي نەمەسە 176,6 مىڭ تۇرعىن ءۇي سالۋ جوسپارلانىپ وتىر. وندا ەلدەگى ءتۇرلى الەۋمەتتىك توپتارعا قاتىستى جەڭىلدىكتەر قاراستىرىلعان.
بيىل جىل باسىنان بەرى 1 249 ازامات جەڭىلدەتىلگەن زايم الدى. اتالعان جەڭىل نەسيە حالىققا «وتباسى بانكى» تۇرعىن ءۇي قۇرىلىس بانكى ارقىلى بەرىلەدى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ونەركاسىپ جانە قۇرىلىس مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى باقىتجان جۇنىسبەكوۆ مالىمدەدى. ول ەل تۇرعىندارىن تۇرعىن ۇيمەن قامتاماسىز ەتۋ مەن وسى جىلى اتقارىلاتىن جۇمىستار تۋرالى ايتىپ بەردى.
«قۇرىلىس سالاسى – ەل ەكونوميكاسىنىڭ نەگىزگى سالالارىنىڭ ءبىرى. 2024 جىلى رەسپۋبليكا كولەمىندە 18,9 ميلليون شارشى مەتردەن استام جاڭا تۇرعىن ءۇي پايدالانۋعا بەرىلىپ, بۇل شامامەن 170 مىڭنان استام تۇرعىن ۇيگە تەڭ بولدى. مەملەكەتتىك ينۆەستيتسيا ارقىلى 30 مىڭنان اسا پاتەر سالىندى. سونداي-اق 9 مىڭعا جۋىق جەڭىلدەتىلگەن زايم بەرىلدى. بيىل دا تۇرعىن ءۇي سالۋدى جالعاستىرۋ جانە ازاماتتاردى تۇرعىن ۇيمەن قامتاماسىز ەتۋدىڭ قوسىمشا شارالارىن ەنگىزۋ جوسپارلانعان. سونىڭ اياسىندا كرەديتتىك تۇرعىن ءۇيدىڭ 12 مىڭ پاتەرىن سالۋ جانە 5 مىڭنان استام جالعا بەرىلەتىن تۇرعىن ءۇي ساتىپ الۋ كوزدەلۋدە», دەدى ب.جۇنىسبەكوۆ.
بۇگىندە ەلىمىزدە تۇرعىن ءۇي كەزەگىندە 650 مىڭنان اسا ادام بار. بۇل ازاماتتارعا جالعا بەرىلەتىن تۇرعىن ءۇي ساتىپ الۋ قۇقىعىمەن بەرىلەدى, ونىڭ كەمىندە 20%-ى جەتىم بالالارعا ارنالعان. 2022 جىلدان باستاپ تۇرعىن ءۇيدى جالداۋ قۇنىنىڭ 50%-ىن سۋبسيديالاۋ ەنگىزىلدى. بۇل ءبىرىنشى جانە ەكىنشى توپتاعى مۇگەدەكتەر, جەتىم بالالار, كوپبالالى وتباسىلار سياقتى توپقا باعىتتالعان.
بۇگىندە 11 مىڭعا جۋىق وتباسى تۇرعىن ءۇيدى جالعا الۋ بويىنشا مەملەكەتتىك قولداۋ الادى. ودان بولەك, اكىمدىكتەر تۇرعىن ءۇي سەرتيفيكاتتارى ارقىلى يپوتەكالىق نەسيەلەردىڭ باستاپقى جارناسىن جابۋعا كومەكتەسەدى. بىلتىر 2 300-دەن, ال بيىلعى العاشقى توقسانىندا 500-دەن استام سەرتيفيكات بەرىلگەن.
تۇرعىن ءۇي جاعدايىن جاقسارتۋعا مەملەكەتتىك قولداۋدىڭ قوسىمشا شاراسى – جەڭىلدەتىلگەن يپوتەكالىق نەسيە بەرۋ. كەزەكتە تۇرعان ازاماتتارعا 2% جانە 5% مولشەرلەمەسى بويىنشا زايمدار بەرىلەدى. بىلتىر 3 800-دەن استام ادامنىڭ قولى جەڭىلدەتىلگەن زايمعا جەتسە, بيىلعى ءتورت ايدا مىڭعا جۋىق ازامات تۇرعىن ءۇي ساتىپ الۋ ءۇشىن زايم الدى. «ناۋرىز» يپوتەكالىق باعدارلاماسى اياسىندا الەۋمەتتىك وسال توپتار ءۇشىن جىل سايىن 12 مىڭ زايم بەرۋ جوسپارلانعان. ال بيىلعى ءتورت ايدا 1 500-دەن اسا ادام بۇل باعدارلامانىڭ ارتىقشىلىعىن پايدالاندى.