بىرىككەن اراب امىرلىكتەرىندە باس كونسۋلدىق پەن كاسىپكەرلەردىڭ تىكەلەي قولداۋىمەن قازاق مادەني ورتالىعى اشىلدى. اتالعان ۇيىم شەتەلدەگى وتانداستاردى بىرىكتىرىپ, ۇلتتىق قۇندىلىقتاردى ناسيحاتتاۋدى ماقسات ەتەدى.
رەسمي مالىمەتتەرگە سۇيەنسەك, امىرلىكتەردە ەلىمىزدىڭ 12 مىڭعا جۋىق ازاماتى تۇرادى. ولار مەملەكەتتىك مەرەكەلەردە ءجيى باس قوسىپ, ءتۇرلى مادەني ءىس-شارالار ۇيىمداستىرادى. جاڭادان قۇرىلعان مادەني ورتالىقتا قازاقى ورتاعا ارنالعان سەمينار-ترەنينگ, شەبەرلىك ساباقتارى مەن بيزنەس كەزدەسۋلەر ءوتىپ تۇرماق. ودان بولەك ەلىمىز ءۇشىن ماڭىزدى داتالاردا بۇقارالىق ءىس-شارالار وتكىزىپ, قازاقى سالت-داستۇرلەردى تانىتۋ دا جوسپاردا بار.
«باس كونسۋلدىق جانە بىرقاتار وتاندىق كاسىپكەر, دەمەۋشىلەر اتسالىسىپ, وسى ورتالىقتىڭ اشىلۋىنا سەبەپكەر بولدى. جالپى, ءبىز بولاشاقتا ورتالىقتا كوپتەگەن مادەني ءىس-شارا وتكىزەمىز دەپ ويلايمىن», دەيدى قازاقستاننىڭ دۋبايداعى باس كونسۋلى الماز تاسبولات.
ال قازاقستان – ءباا ىسكەرلىك كەڭەسىنىڭ تەڭ توراعاسى الىبەك المابەكوۆ بۇل باستاما ەكى ەل اراسىنداعى مادەني بايلانىستارعا دا ۇلكەن سەپتىگىن تيگىزەتىنىن اتاپ ءوتتى.
«مۇنداي ورتالىقتار قازاقستان مەن ءباا اراسىنداعى مادەني-گۋمانيتارلىق, دوستىق جانە ىنتىماقتاستىق بايلانىستاردى دامىتۋعا, سونداي-اق وسى ورتالىق ارقىلى ەلىمىزگە كوپتەگەن تۋريست تارتۋعا ىقپال ەتەدى دەپ سەنەمىز. ورتالىقتا الداعى ۋاقىتتا اعارتۋشىلىق باعىتتا بىرقاتار كۋرس اشىلۋى مۇمكىن. كەلۋشىلەر تاراپىنان سۇرانىس بولسا, مۇندا قازاق ءتىلى مەن تاريحىن وقىتۋ ءىسى قولعا الىنادى. ول ءۇشىن بىرنەشە وقۋ بولمەسى جانە ينتەراكتيۆتى قۇرىلعىلار بار. باستاما ەلدەر اراسىنداعى دوستىق بايلانىستى نىعايتۋعا باعىتتالعان», دەدى ول.
مادەني ورتالىقتاعى ءار كابينەتكە ەلىمىز قالالارىنىڭ اتاۋى بەرىلگەن. سونداي-اق بىرلىك پەن تۇتاستىقتىڭ ءرامىزى – شاڭىراقتى دا كورۋگە بولادى.