الماتىدا «جاسىل ەل» جاستار ەڭبەك جاساقتارىنىڭ كوكتەمگى جۇمىس كەزەڭى ءجۇرىپ جاتىر. ۇيىمداستىرۋشىلار جاز ماۋسىمىندا 2100-دەن استام ازاماتتى جۇمىسپەن قامتۋدى جوسپارلاعان.
ازىرگە «تازا قازاقستان» باعدارلاماسى اياسىندا ەكولوگيالىق باستاماعا قاتىسۋعا 300-دەن استام ستۋدەنت نيەت بىلدىرگەن. جوبا جەتەكشىلەرى, جۇمىسشى جاساقتاردىڭ نەگىزگى مىندەتى سەنبىلىكتەر مەن اعاش وتىرعىزۋعا قاتىسۋ عانا ەمەس, ەكولوگيالىق جاۋاپكەرشىلىكتى كۇشەيتۋ مەن جاستاردى قالالىق ورتاداعى وزگەرىستەرگە بەيىمدەۋ ەكەنىن ايتادى.
كوكتەمگى كەزەڭ باستالعالى جاساقتار 15-تەن استام ەكولوگيالىق ءىس-شارا وتكىزگەن. ولاردىڭ دەنى سۋ قويمالارىنىڭ جاعالاۋلارىن تازالاۋ, ساياباقتاردى رەتكە كەلتىرۋ, قالا ماڭىنداعى ايماقتارعا اعاش وتىرعىزۋ جۇمىستارىن قۇرايدى.
بيىل ەرەكشە قورعالاتىن تابيعي اۋماقتاردا جۇمىس ىستەۋگە نازار اۋدارىلماق. ەكو-جاۋىنگەرلەر تانىمال تۋريستىك مارشرۋتتاردى — مەدەۋ, كوك-جايلاۋ, ۇلكەن الماتى كولى جانە باسقا دا ورىنداردى تازالاۋمەن اينالىسادى. سونىمەن قاتار, ەرىكتىلەر تۋريستىك ورىندارعا اقپاراتتىق تاقتايشالار ورناتىپ, جادىنامالار تاراتىپ, تاۋلارداعى جاۋاپكەرشىلىكتى ەسكە سالادى.
ەسكە سالساق, جوباعا 16 مەن 35 جاس ارالىعىنداعى كەز كەلگەن ازامات — «جاستار رۋحى الماتى» جك, جوو جانە ستۋدەنتتىك ەكو-كلۋبتارى ارقىلى قوسىلا الادى. قاتىسۋشىلار رەسمي مارتەبەگە, جالاقىعا جانە مانساپتاعى العاشقى قادام بولۋى مۇمكىن بىرەگەي تاجىريبەگە يە بولادى.