مەملەكەت باسشىسى قاسىم-جومارت توقاەۆ الماتى قالاسىنىڭ جاڭادان تاعايىندالعان اكىمى دارحان ساتىبالدىنى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
پرەزيدەنتكە قالا اكىمى الداعى جۇمىستىڭ باسىم باعىتتارى, سونىڭ ىشىندە الەۋمەتتىك-ەكونوميكالىق دامۋ, قالا ەكولوگياسىن وڭالتۋ جانە شاھار تۇرعىندارىنىڭ تۇرمىس ساپاسىن ارتتىرۋ جونىندەگى جوسپارى تۋرالى باياندادى.
قاسىم-جومارت توقاەۆ مەگاپوليستى دامىتۋدىڭ نەگىزگى مىندەتتەرىن ايقىندادى. اتاپ ايتقاندا, تۇراقتى ەكونوميكالىق ءوسىمدى قامتاماسىز ەتۋ, ەكونوميكانى ءارتاراپتاندىرۋ, قالانىڭ ينفراقۇرىلىمىن كەشەندى تۇردە جاڭعىرتۋ, سونداي-اق جول-كولىك جەلىسىنىڭ جاعدايىن جاقسارتۋ, ەكولوگيالىق ماسەلەلەردى شەشۋ سياقتى بىرقاتار ناقتى تاپسىرما بەردى.