سوڭعى ءۇش جىلدا الماتىدا تۋريزم سالاسىندا ايتارلىقتاي ءوسىم بايقالعان. 2021 جىلدان باستاپ قالاداعى تۋريستىك اعىن 91,8% – عا وسكەن. بۇل رەتتە شەتەلدىك تۋريستەر سانى رەكوردتىق 4,2 ەسەگە, ال ىشكى تۋريستەر سانى 56,3% - عا ءوستى. تۋريزم سالاسىنىڭ وركەندەۋى ناتيجەسىندە سالىق تۇسىمدەرى ءۇش ەسە ۇلعايعان, دەپ حابارلايدى Egemen.kz.
قالا اكىمدىگىنىڭ حابارلاۋىنشا, تۋريستىك ينفراقۇرىلىمدى دامىتۋ باعىتىندا دا بەلسەندى جۇمىس جۇرگىزىلىپ جاتىر. 2022 جىلدان باستاپ 43 جاڭا قوناق ءۇيدىڭ قۇرىلىسى باستالىپ, 5972 نومىرلىك قور جاساقتالۋدا. بۇدان بولەك, 26 تۋريستىك جوبا جۇزەگە اسىرىلىپ جاتىر, ونىڭ جەتەۋى 2025 جىلى اياقتالادى دەپ جوسپارلانعان.
ء«تۋريزمدى دامىتۋ باعىتى بويىنشا الماتىدا كورسەتىلگەن كەزەڭدە 1000 كم-دەن استام تاۋ مارشرۋتتارى تسيفرلاندىرىلدى, ونىڭ 750 كم-دەن استامى اباتتاندىرىلدى, «كىماسار», «لۋننايا پوليانا», «اق بۇلاق», «تيتوۆا» جانە باسقالارىن قوسا العاندا, 13 كەمپينگ-ايماق قۇرىلدى. بۇل قالانى تابيعات پەن اشىق اۋادا اۋەسقويلار ءۇشىن تارتىمدى ەتەدى», دەلىنگەن حابارلامادا.
سونىمەن قاتار حالانىڭ حالىقارالىق ارەناداعى بەدەلى دە ارتىپ كەلەدى. الماتى The New York Times باسىلىمىنىڭ «بارۋعا 52 ورىن» تىزىمىنە ەندى, Wanderlust جۋرنالىنىڭ توپ-24 باعىتتارىنىڭ قاتارىنا كىردى, شىمبۇلاق پەن Oi-Qaragai كۋرورتتارى تمد-داعى ۇزدىك تاۋ شاڭعىسى باعىتتارى رەتىندە تانىلدى جانە كاتارداعى حالىقارالىق كورمەدە «ۇزدىك تۋريستىك دەستيناتسيا» سىيلىعىنا يە بولدى.
ايتا كەتەيىك, قالاعا 2025 جىلعا قاراي 2,5 ميلليون تۋريست تارتۋ كوزدەلگەن. بۇل باعىتتا قالا اكىمدىگى تۋريستىك ينفراقۇرىلىمدى دامىتۋمەن قاتار, الماتىنى حالىقارالىق نارىقتاردا تانىتۋ جانە زاماناۋي ماركەتينگ قۇرالدارىن قولدانۋ ارقىلى كەشەندى جۇمىس اتقارىپ جاتىر.
Mastercard زەرتتەۋىنە سايكەس, تۋريستەردىڭ قاناعاتتانۋ يندەكسى 4%-عا ءوسىپ, 67,5%-دى قۇراعان. بۇل كورسەتكىش ۇسىنىلاتىن تۋريستىك قىزمەتتەردىڭ ساپاسىنىڭ جوعارىلاعانىن بىلدىرەدى.