«ازەربايجان داۋىسى» ۆوكالدىق تەلەجوباسىنىڭ فينالدىق ناتيجەلەرى بەلگىلى بولدى, دەپ حابارلايدى Egemen.kz.
فينالدا قازاقستان اتىنان 20 جاستاعى سانات اسۋات ونەر كورسەتتى. ول «ەۆروۆيدەنيە-2011» بايقاۋىنىڭ جەڭىمپازى ەلدار عاسىموۆتىڭ كومانداسىنىڭ قۇرامىندا بولدى. كورەرمەندەردىڭ داۋىس بەرۋ ناتيجەسىندە سانات 20 پايىز داۋىس جيناپ, جوبا بويىنشا ءۇشىنشى ورىنعا يە بولدى.
قازاق ءانشىسىنىڭ فينالداعى قويىلىمى كەشتىڭ ەڭ اسەرلى ساتتەرىنىڭ ءبىرى بولدى. سانات فينالدا « Səndən Nigaranam» ءانىن ورىندادى.
ساناتتىڭ سوڭعى ونەر كورسەتكەن ساتىنەن كەيىن ونىڭ تالىمگەرى ەلدار عاسىموۆ شاكىرتىنىڭ ونەرىنە جوعارى باعا بەرىپ, جىلى لەبىزىن ءبىلدىردى.
«مەن ساناتقا ۇلكەن سەنىم ارتامىن. ول ءۇش ءتۇرلى قويىلىم كورسەتتى جانە مەنىڭ ويىمشا, سوڭعىسى ەڭ اسەرلىسى بولدى. مەن ونى ماقتان تۇتامىن. سەبەبى ءوز انا تىلىندە ەمەس, ازەربايجان تىلىندە, وزگە ەلدە ءان ايتۋ – بۇل وتە باتىل ءارى جاۋاپتى قادام», دەدى ەلدار عاسىموۆ.
ول ساناتتىڭ جاي عانا ءان سالماي, ءوزىنىڭ مادەنيەتىنىڭ ءبىر بولشەگىن كورەرمەنگە جەتكىزە العانىن ەرەكشە اتاپ ءوتتى.
«سانات شىعىس ونەرىن ۇلكەن تالعاممەن جانە قۇرمەتپەن ۇسىندى. بۇل جۇرەكتەن شىققان جانە شىنايى ونەر بولدى. ازەربايجان حالقى ونىڭ شىنايىلىعىن سەزىنىپ, ونى ونەر يەسى رەتىندە, ءوزىنىڭ جان دۇنيەسىن ساحنادا اشىپ كورسەتكەن قازاقستاندىق قىز رەتىندە جاقسى كوردى دەپ سەنەمىن», دەپ تولىقتىردى ول.
سونداي-اق ول ساناتتىڭ تۋعان ەلىندە دە ۇلكەن قولداۋعا يە بولعانىن ايتتى.
«بۇگىن وعان تەك ازەربايجان عانا ەمەس, بۇكىل قازاقستان داۋىس بەرىپ وتىر. زالدا قازاقستاننىڭ ازەربايجانداعى توتەنشە جانە وكىلەتتى ەلشىسى, ديپلوماتتار مەن قولداۋشىلار دا قاتىسىپ وتىر. ولارعا ەرەكشە العىس ايتقىم كەلەدى», دەدى ول.
ايتا كەتەيىك, تەلەجوبانىڭ جەڭىمپازى – ازەربايجاننىڭ حالىق ءارتىسى رويا ايحاننىڭ شاكىرتى ءجاميلا گاشيموۆا اتاندى. ول 45 پايىز داۋىس جيناپ, باس جۇلدە – 25 مىڭ مانات (شامامەن 7,5 ملن تەڭگە) يەلەندى.
فينالداعى ناتيجەلەر كەلەسىدەي:
1 ورىن – ءجاميلا گاشيموۆا (رويا ايحاننىڭ كومانداسى) – 45% 2 ورىن – يلگار بەكيروۆ ء(زۇلفيا حانباباەۆانىڭ كومانداسى) – 22% 3 ورىن – سانات اسۋات (ەلدار عاسىموۆتىڭ كومانداسى) – 20% 4 ورىن – فۋاد مەحديەۆ (مۋراد ءاريفتىڭ كومانداسى) – 13%
ايتا كەتەيىك, سانات – جوبانىڭ فينالىنا شىققان جالعىز شەتەلدىك قاتىسۋشى. شوۋ بارىسىندا ول الەمدىك حيتتەردى دە, قازاق تىلىندەگى اندەردى دە ورىندادى. شيرەك فينالدا ء«ىزىن كورەم» ءانىن ورىنداپ, كورەرمەندەردىڭ جۇرەگىن جاۋلاپ الدى.
سانات اسۋات – 20 جاستاعى اتىراۋ قالاسىنىڭ تۋماسى. بالا كەزىنەن مۋزىكاعا جاقىن بولىپ, جەتىگەن اسپابىندا ويناۋدى ۇيرەنگەن. قازىر الماتىداعى جۇرگەنوۆ اتىنداعى قازاق ۇلتتىق ونەر اكادەمياسىنىڭ ەسترادالىق ۆوكال ءبولىمىنىڭ 3-كۋرس ستۋدەنتى.