قازاقستان رەسپۋبليكاسى قارۋلى كۇشتەرىنىڭ ۇلتتىق اسكەري-پاتريوتتىق ورتالىعىندا انالار كۇنىنە وراي ساربازدار انالارىنىڭ II رەسپۋبليكالىق فورۋمى ءوتتى.
«اسكەردەگى ازاماتتىڭ قىزمەتىندەگى انا دانالىعى» ۇرانىمەن وتكەن بۇل شارا ارميا, مەملەكەتتىك قۇرىلىمدار مەن ازاماتتىق قوعام وكىلدەرى اراسىنداعى اشىق ديالوگ الاڭىنا اينالدى.
فورۋمعا پارلامەنت ءماجىلىسىنىڭ دەپۋتاتتارى, اتقارۋشى بيلىكتىڭ, بەيىندى مينيسترلىكتەر مەن ۆەدومستۆولاردىڭ, مەملەكەتتىك كۇزەت قىزمەتىنىڭ, ۇقك شەكارا قىزمەتىنىڭ, ۇلتتىق ۇلاننىڭ, توتەنشە جاعدايلار مينيسترلىگىنىڭ وكىلدەرى, سونداي-اق «انالار جۇرەگى» ساربازدار انالارى كوميتەتىنىڭ جانە ونىڭ وڭىرلىك فيليالدارىنىڭ مۇشەلەرى قاتىستى.
قورعانىس ءمينيسترى گەنەرال-پولكوۆنيك رۋسلان جاقسىلىقوۆ ءوز سوزىندە اسكەري قىزمەتشىلەردىڭ وتباسىلارىن ارميانىڭ قوعامدىق ومىرىنە بەلسەندى تارتۋ جانە اسكەرگە شاقىرىلۋشىلاردىڭ مورالدىق جانە پاتريوتتىق قاسيەتتەرىن قالىپتاستىرۋداعى انانىڭ ءرولى ارقىلى حالىقتىڭ اسكەري قىزمەتكە دەگەن سەنىمىن نىعايتۋدىڭ ماڭىزدىلىعىن اتاپ ءوتتى.
دوڭگەلەك ۇستەل بارىسىندا قورعانىس مينيسترلىگى, ۇلتتىق ۇلان, ۇقك شەكارا قىزمەتى, اسكەري پروكۋراتۋرا, دەنساۋلىق ساقتاۋ مينيسترلىگى مەن عىلىم جانە جوعارى ءبىلىم مينيسترلىگى وكىلدەرىنىڭ باياندامالارى تىڭدالدى. مەرزىمدى قىزمەت وتكەرۋ شارتتارى, اسكەري قىزمەتشىلەردى زاتتاي م ۇلىكپەن جانە تاماقپەن قامتاماسىز ەتۋ, اسكەرگە شاقىرۋدىڭ اشىقتىعى, وتباسىلارمەن ءوزارا قارىم-قاتىناس, مورالدىق-پسيحولوگيالىق قولداۋ, ساربازداردى قۇقىقتىق قورعاۋ جانە مەرزىمدى قىزمەتتەگىلەر ءۇشىن ءبىلىم بەرۋ مۇمكىندىكتەرى ماسەلەلەرى تالقىلاندى.
«انالار جۇرەگى» ساربازدار انالارى كوميتەتىنىڭ ءتورايىمى ليليا حايرۋللينا اسكەري بولىمدەردىڭ باسشىلىعىمەن ديالوگ قۇرۋدىڭ جانە اسكەردەگى قىزمەتتىڭ قاۋىپسىز, الەۋمەتتىك تۇرعىدا قورعالعان جانە بەدەلدى بولۋعا جاعداي جاساۋدىڭ ماڭىزدىلىعىن اتاپ ءوتىپ, سوندا جاستار ارمياعا ءوز ەركىمەن بارادى, ال ولاردىڭ تۋىستارى كومانديرلەرگە سەنىم ارتادى دەدى.
فورۋمدا ۇيىمداستىرىلعان جاۋىنگەرلىك دايىندىقتا ۇزدىك ناتيجەلەرگە قول جەتكىزگەن ۇلداردىڭ انالارىمەن كەزدەسۋلەرى توسىنسىي بولدى. جاس جاۋىنگەرلەرگە 10 كۇندىك دەمالىس بەرىلىپ, ىنتالاندىرىلدى. وسىنداي لايىقتى ۇلدار تاربيەلەگەن انالارعا ۆەدومستۆولار مەن ساربازدار انالارى كوميتەتى باسشىلارىنىڭ اتىنان گراموتالار, العىس حاتتار جانە باعالى سىيلىقتار تابىس ەتىلدى.
فورۋم قورىتىندىسى بويىنشا ۇسىنىستاردىڭ رەسمي حاتتاماسى ورىنداۋشىلاردى, مەرزىمدەرىن جانە كۇتىلەتىن ناتيجەلەردى ناقتى بەلگىلەي وتىرىپ, تولتىرىلدى, بۇل بارلىق تارتىلعان تاراپتاردىڭ ودان ءارى بىرلەسكەن ءىس-ارەكەتىنىڭ جول كارتاسى بولماق.