بۇگىندە بيزنەسكە مەملەكەتتىك قولداۋ كورسەتۋدىڭ بىرنەشە تەتىگى بار. ونىڭ ءبىرى – كەشەندى باعدارلاما شەڭبەرىندە ىسكە اساتىن بيزنەستىڭ جول كارتاسى مەن قاراپايىم زاتتار ەكونوميكاسى. قازىر جول كارتاسى نەگىزىندە دايىندالعان باعدارلامانىڭ ارقاسىندا كاسىپكەرلەردىڭ ءورىسى كەڭىدى.
كاسىپكەرلىكتى دامىتۋ – ۇلتتىق ەكونوميكانىڭ تۇراقتى ءوسۋىنىڭ ماڭىزدى فاكتورىنىڭ ءبىرى. وتكەن جىلدىڭ 4 توقسانىندا ەلدىڭ ءىجو-دەگى شوب ۇلەسى 39,7%-دى قۇرادى. بۇل بۇرناعى جىلدىڭ سايكەس كەزەڭىمەن سالىستىرعاندا 3,2%-عا ارتىق. سەكتوردا جۇمىسپەن قامتىلعاندار سانى 2,2%-عا ارتىپ, 4,4 ملن ادامعا جەتتى. شوب سۋبەكتىلەرىنىڭ ءونىم شىعارۋ كولەمى 81 ترلن تەڭگەنى قۇرادى, بۇل وتكەن جىلدىڭ وسى كەزەڭىندەگى كورسەتكىشتەن 19,2%-عا جوعارى.
«دامۋ» قورىنىڭ قاتىسۋىمەن ىسكە اساتىن كاسىپكەرلىكتى قولداۋدىڭ قولدانىستاعى كەشەندى باعدارلاماسى شەڭبەرىندە «بيزنەستىڭ جول كارتاسى» مەن «قاراپايىم زاتتار ەكونوميكاسى» باعدارلاماسىنىڭ قۇرالىن بەلسەندى ىسكە اسىرۋ جالعاسىپ جاتىر», دەدى ورتالىق كوممۋنيكاتسيالار قىزمەتىندە وتكەن ءباسپاسوز ماسليحاتىندا ۇلتتىق ەكونوميكا مينيسترلىگى كاسىپكەرلىكتى مەملەكەتتىك قولداۋ جانە قورعاۋ دەپارتامەنتىنىڭ ديرەكتورى دارىن ءابدۋالى.
ول بريفينگتە ەلدەگى شاعىن جانە ورتا بيزنەستى مەملەكەتتىك قولداۋدىڭ نەگىزگى ناتيجەلەرى مەن جاڭا شارالارى تۋرالى ايتا كەلىپ, وتكەن جىلدىڭ قورىتىندىسى بويىنشا كرەديتتەردى سۋبسيديالاۋ ارقىلى جەڭىلدەتىلگەن قارجىلاندىرۋ شارالارىمەن جالپى سوماسى 1 ترلن تەڭگەگە 7 مىڭنان استام بيزنەس-جوبا قامتىلعانىن اتاپ ءوتتى.
وندا كەپىلدىكتەر 310 ملرد تەڭگە سوماسىنا 8 مىڭ جوباعا بەرىلىپتى. ەندى بيىل وسى ماقساتتارعا 275,2 ملرد تەڭگە, ونىڭ ىشىندە رەسپۋبليكالىق بيۋدجەتتەن 196,4 ملرد تەڭگە, جەرگىلىكتى بيۋدجەتتەردەن 78,8 ملرد تەڭگە باعىتتاۋ جوسپارلانىپ وتىر. جوبالاردىڭ دەنى الماتى, استانا, شىمكەنت قالالارىندا, سونداي-اق الماتى, تۇركىستان, اقتوبە وبلىستارىندا ىسكە اسىرىلادى.
سالالار بويىنشا وڭدەۋ ونەركاسىبى, كولىك جانە قويمالاۋ, ءبىلىم سالالارى باسىم. قارجىلىق ەمەس قولداۋ شارالارى دا بەلسەندى دامۋدى جالعاستىرىپ كەلەدى. بىلتىرعى جىلى 15 مىڭ سەرۆيستىك قىزمەت كورسەتىلدى, بيزنەستى جۇرگىزۋگە قاتىستى 135 مىڭنان استام كونسۋلتاتسيا ۇسىنىلدى.
قولداۋ كاسىپكەرلەرگە قىزمەت كورسەتۋ ورتالىقتارى ارقىلى دا, ونلاين – مامانداندىرىلعان پورتال ارقىلى دا كورسەتىلەدى. قولداۋدىڭ نەعۇرلىم نارىقتىق تەتىكتەرىنە كوشۋ شەڭبەرىندە كەشەندى باعدارلاماعا وزگەرىستەر ەنگىزىلدى. اتاپ ايتقاندا, پورتفەلدىك سۋبسيديالاۋ مەن «دامۋ» قورى بازاسىندا جاڭادان قۇرىلاتىن وڭىرلىك كەپىلدىك قورلارى ارقىلى كەپىلدىك بەرۋ, قارجىلاندىرۋ تۋرالى شەشىمدەردى قابىلداۋ جونىندەگى وكىلەتتىكتى تىكەلەي ەكىنشى دەڭگەيدەگى بانكتەرگە بەرۋ – بارىنشا جاعىمدى جاڭالىق. بۇل وتىنىمدەردى قاراۋدى جەدەلدەتۋ مەن بيزنەستى قولداۋدىڭ تيىمدىلىگىن ارتتىرۋعا مۇمكىندىك بەرەدى.
«شوب سۋبەكتىلەرىنە جىلدىق 12,6% مولشەرلەمەسىمەن جەڭىلدەتىلگەن قارجىلاندىرۋدىڭ جاڭا باعدارلاماسى قوسىمشا ازىرلەنىپ جاتىر. كرەديتتەر قوسا قارجىلاندىرۋ تەتىكتەرىنىڭ قاتىسۋىمەن ەكىنشى دەڭگەيدەگى بانكتەر ارقىلى بەرىلەتىن بولادى. ەڭ جوعارى ليميت ءبىر قارىز الۋشىعا نەمەسە بايلانىستى قارىز الۋشىلار توبىنا 7 ملرد تەڭگەگە دەيىن بولادى», دەدى د.ءابدۋالى.
مۇنىمەن قوسا دەپارتامەنت ديرەكتورى مەملەكەت بۇدان بىلاي شاعىن جانە ورتا بيزنەستى قولداۋدى دايەكتى تۇردە كۇشەيتىپ, قارجىلىق جانە قارجىلىق ەمەس قۇرالدارعا قولجەتىمدىلىكتى كەڭەيتىپ, كاسىپكەرلىك بەلسەندىلىككە قولايلى جاعداي تۋعىزاتىنىن اتاپ ايتتى.