تيمۋر تۇرسىمباەۆ ازيا دزيۋدو وداعىنىڭ باسشىلىق قىزمەتىنە تاعايىندالدى

دزيۋدو كۇرەسىنەن الەمدىك جانە قۇرلىقتىق دەڭگەيدەگى ۇيىمداردىڭ باسشىلىق قىزمەتىندە قازاق ماماندارىنىڭ كوبەيۋى كوڭىلگە قۋانىش ۇيالاتادى. ويتكەنى, وليمپيا ويىندارى مەن الەم چەمپيوناتى, ازيا ويىندارى مەن بىرىنشىلىكتەرى جانە باسقا دا اسا ءىرى حالىقارالىق جارىستاردا بالۋاندارىمىزعا قيانات جاسالعان جاعدايدا ولارعا اراشا ءتۇسىپ, اقىرىنىپ تەڭدىك سۇرايتىن تاۋ تۇلعالار بار. ماسەلەن, الماس السەنوۆ ەسىمدى ازامات ءبىراز جىلدان بەرى حالىقارالىق دزيۋدو فەدەراتسياسى (IJF) پرەزيدەنتىنىڭ كومەكشىسى قىزمەتىن اتقارۋدا. مىنە, ەندى باسشىلىق قىزمەتكە تيمۋر تۇرسىمباەۆ تاعايىندالدى.

تيمۋر تولەۋتاي ۇلى كۇرەستىڭ بۇل تۇرىندە كەزدەيسوق ادام ەمەس. ول قاراعاندى وبلىسىندا دزيۋدونىڭ دامۋىنا ەلەۋلى ۇلەس قوستى. رەسپۋبليكالىق دەڭگەيدە دە مويىندالدى. تۇرسىمباەۆ العاشقى كۇندەردەن باستاپ, 2022 جىلى قۇرىلعان وتاندىق «جەڭىس» كلۋبىنىڭ تىزىگىنىن ۇستاپ, تالاي يگى-ءىستىڭ باسى-قاسىندا ءجۇردى. ول الماس السەنوۆپەن يىق تىرەسە جۇمىس ىستەپ, قاراعاندى وبلىسىنداعى بارلىق دزيۋدو زالدارىنا تاتامي ساتىپ اپەرىپ, قاجەتى قۇرالدارمەن جابدىقتادى. بالۋاندار مەن باپكەرلەردى حالىقارالىق ستاندارتتارعا ساي سپورتتىق كيىمدەرمەن قامتىماسىز ەتتى. وعان قوسا ءار اي سايىن قوسىمشا تاعام, قاجەتتى ۆيتامين جانە ءدارى-دارۋمەندەر اپەرىپ تۇرادى. ءبىر سوزبەن ايتساق, قازىرگى كەزدە قاراعاندى وبلىسىنىڭ قۇراما كومانداسى مەن «جەڭىس» كاسىپقوي كلۋبى مۇشەلەرىنىڭ ەش الاڭسىز جاتتىعۋىنا بارلىق جاعداي جاسالعان. ال دزيۋدوشىلار ءوز كەزەگىندە جۇكتەلگەن مىندەتتى اسقان جاۋاپكەرشىلىكپەن اتقارىپ, ءتۇرلى بايراقتى باسەكەلەردە جەڭىس تۇعىرىنا كوتەرىلۋدە. ءبىر عانا مىسال, 2023 جىلدىڭ جەلتوقسان ايىندا الماتىدا «جەڭىس» كلۋبىنىڭ جۇلدەسى ءۇشىن اسا ءىرى حالىقارالىق تۋرنير ۇيىمداستىرىلدى. بۇل باسەكەدە 11 مەملەكەتتەن كەلگەن 17 كوماندا كۇش سىناستى. سول جارىستا «جەڭىستىڭ» ساپىنداعى سايىپقىراندار جاسىنداي جارقىلدادى. سونداي-اق, بىلتىر پاريج وليمپياداسىندا اتوي سالعان ەلدوس سمەتوۆ پەن عۇسمان قىرعىزباەۆ تا ءدال سول كلۋبىنىڭ مۇشەسى ەكەنىن دە جانكۇيەرلەر جاقسى بىلەدى.