بەيجىڭ قالاسىندا قازاقستان دەلەگاتسياسىنىڭ قىتايعا رەسمي جۇمىس ساپارى اياسىندا الماتى وبلىسىنىڭ اكىمدىگى, «ازاماتتىق اۆياتسيا اكادەمياسى» اق جانە قىتايدىڭ Banruo Silu Aviation Co., Ltd. جانە Hainan Kunying Aviation Co., Ltd. كومپانيالارى اراسىندا ستراتەگيالىق ىنتىماقتاستىق مەموراندۋمىنا قول قويىلدى, دەپ حابارلايدى Egemen.kz.
قۇجات ۇزاق مەرزىمدى ارىپتەستىك ورناتۋعا جانە وڭىرلىك حالىقارالىق اۆياتسيالىق حاب قۇرۋ بويىنشا اۋقىمدى جوبانى ىسكە اسىرۋ ءۇشىن قاجەتتى ءىس-شارالاردى ايقىنداۋعا باعىتتالعان. جوبا لوگيستيكا, اۆياتسيالىق مامانداردى دايارلاۋ, كوممەرتسيالىق جانە اۆياتسيالىق ينفراقۇرىلىم باعىتتارىن قامتيدى.
مەموراندۋم اياسىندا ازاماتتىق اۆياتسيا اكادەمياسى كادرلاردى دايارلاۋ جانە يننوۆاتسيالىق ءبىلىم بەرۋ شەشىمدەرىن ەنگىزۋ بويىنشا بەيىندى سالالىق ارىپتەس رەتىندە بەلگىلەندى. جوبانى جۇزەگە اسىرۋ الماتى وبلىسى, ۇيعىر اۋدانى, باحار اۋىلىندا ورنالاسقان اكادەمياعا تيەسىلى جەر ۋچاسكەسىندە جۇرگىزىلەدى.
ازاماتتىق اۆياتسيا اكادەمياسىنىڭ قىتايلىق ارىپتەستەرىمەن ىنتىماقتاستىعى تۇراقتى دامۋ ۇستىندە. 2024 جىلدىڭ قىركۇيەك ايىنان باستاپ اكادەميا قىتايدىڭ تيانتسزين قالاسىنىڭ مۋنيتسيپاليتەتىمەن ء«بىر بەلدەۋ — ءبىر جول» حالىقارالىق جوبا اياسىندا جۇمىس ىستەپ كەلەدى. قىتايدىڭ ازاماتتىق اۆياتسيا ۋنيۆەرسيتەتىمەن بىرلەسىپ, اۋەجايلاردىڭ تسيفرلىق ەگىزدەرىنىڭ قىتاي-قازاق زەرتتەۋ ورتالىعىن قۇرۋ جوباسى جۇزەگە اسىرىلۋدا. بۇل جوبا اۆياتسيالىق ينفراقۇرىلىمدى باسقارۋ جانە قىزمەت كورسەتۋ بويىنشا زياتكەرلىك جۇيەلەردى دامىتۋعا, سونداي-اق ازاماتتىق اۆياتسيانى تسيفرلىق تۇرلەندىرۋ ۇدەرىستەرىن قولداۋعا باعىتتالعان.
ىنتىماقتاستىق اياسىندا تاراپتار ازاماتتىق اۆياتسيا سالاسىنداعى يننوۆاتسيالار جونىندەگى بىرلەسكەن ورتالىق قۇرۋ مۇمكىندىگىن قاراستىرىپ جاتىر.
الماتى