الماتىداعى «پاراسات» ورتالىعىندا ارداگەرلەر اراسىندا بيلياردتان حالىقارالىق تۋرنير ءوتتى. بۇل جارىس بەلگىلى ينجەنەر, «قۇرمەت» وردەنىنىڭ يەگەرى, تالدىقورعان قالاسىنىڭ قۇرمەتتى ازاماتى, رەسپۋبليكالىق بيلياردشىلار وداعىنىڭ پرەزيدەنتى جاقسىقۇل مىرزاحمەت ۇلىنىڭ قۇرمەتىنە ارنالدى, دەپ حابارلايدى Egemen.kz.
ەلىمىزدىڭ بىرقاتار ءوڭىرى جانە كورىشىلەس قىرعىزستاننان كەلگەن ارداگەرلەردىڭ باسىن قوسقان جارىستىڭ اشىلۋ سالتاناتىندا تەحنيكا عىلىمدارىنىڭ دوكتورلارى يشەنبەك جاقىپىبەكوۆ پەن نۇرلان ايتىمبەتوۆ, قر قۇرمەتتى قۇرىلىسشىسى توقماعامەت يبراگيموۆ, ەكونوميكا عىلىمدارىنىڭ كانديداتى, پروفەسسور قانىبەك قالدىباەۆ ءسوز سويلەپ, قاتىسۋشىلارعا ساتتىلىك پەن اق جول تىلەدى. ال جەتىسۋ وبلىسى بيليارد فەدەراتسياسىنىڭ پرەزيدەنتى توقتار ەسىموۆ اتالعان وبلىس اكىمى مەن تالدىقورعان قالاسى اكىمىنىڭ قۇرمەت گراموتاسى, وبلىستىق دەنە شىنىقتىرۋ جانە سپورت باسقارماسى باسشىسىنىڭ العىس حاتىن جاقسىقۇل مىرزاحمەت ۇلىنا تابىس ەتتى.
جارىستىڭ وزىنە كەلەر بولساق, جەكەلەگەن سايىستا قىرعىزستاننان كەلگەن «قارا-بالتا» كومانداسىنىڭ مۇشەسى ولەگ كيمگە تەڭ كەلەر ەشكىم تابىلمادى. ول باس جۇلدەمەن قاتار 150 000 تەڭگەنى ەنشىلەدى. كۇمىس مەدالدى شىمكەنتتىڭ «تۇرانى» كلۋبىنىڭ ويىنشىسى اليك ماحانوۆ يەلەندى. وعان 100 000 تەڭگە بۇيىردى. جەرگىلىكتى «كورونانىڭ» مارقاسقاسى مۇرات جايلاۋباەۆ قولاعا قول سوزىپ, 50 000 تەڭگەنى قالتاسىنا باستى.
كوماندالىق باسەكەدە 14 ۇجىم شەبەرلىك بايقاستى. سولاردىڭ اراسىنان الماتىنىڭ «كوروناسى» وزىپ شىقتى. 700 000 تەڭگەنى ولجالاعان جەڭىمپازداردىڭ ساپىندا قانىبەك قالدىباەۆ, ارتىقباي ساناقۇلوۆ, پانابەك سارعالداقوۆ, مۇراتقان شايدەموۆ, مۇرات جايلاۋباەۆ, ۆالەري مۋسيەنكو جانە الىم ماشۋروۆ سىندى بيليارشىلار اسقان شەبەرلىك تانىتتى. ولاردى وسى جارىسقا عابيدەن قايىمسۇلتانوۆ باپتاپ اكەلدى. فينالدا «كورونا» تالدىقورعاننىڭ «جەتىسۋ-1» كلۋبىن قاپى قالدىردى. قىرعىزستاننىڭ «قارا بالتاسى» ۇزدىك ۇشتىكتى تۇيىندەدى. جارتىلاي فينالعا دەيىن جەتكەن كوماندالاردىڭ ارقايسىسىنا 400 000 جانە 200 000 تەڭگەدەن تابىس ەتىلدى.