كۇنى كەشە عانا يۋنەسكو-نىڭ پاريجدەگى باس شتاب-پاتەرىندە قازاق جانە قىرعىز اقىندارىنىڭ قاتىسۋىمەن ءدۇبىرلى ايتىس ءوتتى. دوستىق كەزدەسۋ باۋىرلاس ەكى حالىققا – قازاق پەن قىرعىزعا ورتاق بىرەگەي ونەردىڭ 2015 جىلى يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەنۋىنىڭ 10 جىلدىعىنا وراي ۇيىمداستىرىلىپ وتىر. مادەني ءىس-شاراعا تۇركى مادەنيەتى جانە مۇراسى قورىنىڭ وكىلدەرى دە قاتىستى.
«ادەبيەت جانە ونەر» پورتالىنا تۇركى مادەنيەتى جانە مۇراسى قورىنان بەرىلگەن مالىمەتكە سايكەس, بۇل مادەني جيىن قازاقستان مەن قىرعىز رەسپۋبليكاسىنىڭ يۋنەسكو جانىنداعى تۇراقتى وكىلدىكتەرىنىڭ ۇيىمداستىرۋىمەن وتكەن. ءىس-شارا ورتاق ونەرىمىز ارقىلى تاريح, تاعدىر تابىستىرعان تۋىستاس حالىقتار ەكەنىمىزدى تانىتا وتىرىپ, ايتىستىڭ عاجايىپ قاسيەتتەرىن ناسيحاتتاۋدى كوزدەيدى.
ەۋروپانىڭ ءتۇرلى ەلدەرىندە تۇراتىن قازاق جانە قىرعىز دياسپورالارى باس قوسقان ايتىس ءسوز شەبەرلەرىنىڭ ماقامدى شۋماقتارىنا, مازمۇندى ويلارىنا, ۇتىمدى ءسوز قاعىسۋلارىنا تولى بولدى.
ەكى ەلدىڭ اردا اقىندارى – امانجول ءالتاي (قازاقستان) جانە ميرلان سامىيقوجو (قىرعىزستان) جۇرگىزگەن ايتىستا پارلامەنت ءماجىلىسىنىڭ دەپۋتاتتارى نۇرتاي سابيليانوۆ پەن جاناربەك ءاشىمجان, قىرعىز رەسپۋبليكاسىنىڭ جوگوركۋ كەنەش دەپۋتاتى شايىربەك تاشيەۆ, «ماناس» تەاترىنىڭ باسشىسى نۇربەك تالانتبەكوۆ جانە باسقا دا تانىمال تۇلعالار قازىلىق ەتتى.
ءسوز جارىسىندا «قوس بايگە» (بولىسىلگەن جۇلدە) قاعيداتىنا سايكەس, گران-پري ايبەك قاليەۆ پەن ازامات بولعونباەۆقا تابىستالدى. I ورىن ديپلومدارى ديدار قاميەۆ پەن اقماتبەك سۇلتان ۇلىنا, II ورىن مەيىربەك سۇلتانحان مەن امانتاي قۇتماناليەۆكە, ال III ورىن اباي جولماعامبەتوۆ پەن ماقسات قۇليەۆقا بۇيىردى.