يسپانيادا تۋريست ۇلتتىق پاركتىڭ قورعالعان اۋماعىندا ۇلكەن تاستى ادەيى سايعا دومالاتىپ, ونى ۆيدەوعا ءتۇسىرىپ, الەۋمەتتىك جەلىگە جۇكتەگەن. بۇل ارەكەتى ءۇشىن ول رەكوردتىق كولەمدەگى — 168 مىڭ فۋنت ستەرلينگكە دەيىن (شامامەن 114 ميلليون تەڭگە) ايىپپۇل تولەۋى مۇمكىن. Egemen.kz Daily Mail-گە سىلتەمە جاساپ حابارلادى.
وقيعا يسپانيانىڭ سولتۇستىگىندە ورنالاسقان ايگىلى پيكوس-دە-ەۋروپا ۇلتتىق پاركىنىڭ اۋماعىندا, جىلىنا شامامەن 300 مىڭ ادام ءجۇرىپ وتەتىن Cares Trail تۋريستىك باعىتى بويىندا بولعان. تاستىڭ لاقتىرىلۋى تابيعي لاندشافتتىڭ قۇرىلىمىن بۇزىپ, سول اۋماقتا جۇرگەن باسقا تۋريستەر مەن جابايى جانۋارلارعا قاۋىپ توندىرگەن.
يسپانيا بيلىگى بۇل وقيعاعا قاتتى الاڭداۋشىلىق ءبىلدىرىپ وتىر. تابيعاتتى قورعاۋ زاڭدارى وتە قاتاڭ سانالاتىن بۇل ەلدە مۇنداي ارەكەتتەرگە ءتوزىم كورسەتىلمەيدى.
«بۇل — وتە اۋىر قۇقىقبۇزۋشىلىق. مۇنداي تاس لاقتىرۋ ارەكەتى ءۇشىن 200 مىڭ ەۋروعا دەيىن ايىپپۇل قاراستىرىلعان», دەدى رەسمي وكىل.
ايتا كەتەيىك, پيكوس-دە-ەۋروپا ۇلتتىق پاركى — يسپانياداعى ەڭ كونە قورعالاتىن ايماقتاردىڭ ءبىرى. ول 1918 جىلى قۇرىلعان جانە استۋريا, كانتابريا مەن كاستيليا-ي-لەون اۆتونومدى ايماقتارىنىڭ اۋماعىندا ورنالاسقان.