«Trallallero Trallalla». بالالار نە كورىپ ءجۇر؟

اۋەننىڭ شىعۋ تاريحى

2025 جىلدىڭ 13 قاڭتارىندا جەلىدە جاريالانعان 12 سەكۋندتىق بەينەجازبا ءبىر اپتا ىشىندە 30 ميلليون قارالىم جيناپ, ۆيرتۋالدى كەيىپكەرلەر ينتەرنەت كەڭىستىگىن جاۋلاپ ۇلگەردى.

«Trallallero Trallalla» – باستاپقىدا ماعىناسىز سياقتى كورىنەتىن ىرعاقتى دىبىستار جيىنتىعى. بۇل اتاۋدىڭ تامىرى يتاليانىڭ گەنۋيا ايماعىمەن بايلانىستى. مۇندا XIX عاسىردان بەرى «trallalero» دەپ اتالاتىن كوپداۋىستى حالىق ءان ايتۋ ءداستۇرى كەڭ تارالعان.  بۇل ءستيلدى زاماناۋي كونتەنتكە ۇيلەستىرگەن TikTok قولدانۋشىسى @amoamimandy.1a. ول العاش بولىپ TikTok-تا ءۇش اياقتى, كوك كروسسوۆكا كيگەن اكۋلا ترالالەلو ترالالا كەيىپكەرىن كورسەتىپ, وسى اۋەندى فون رەتىندە قولدانعان.

كەيبىر دەرەكتەرگە سۇيەنسەك, ءاننىڭ الەۋمەتتىك جەلىدە لەزدە تاراعان نۇسقاسى نەيروجەلى ارقىلى اۆتوماتتى تۇردە جاسالعان اۋديوميكس. بىراق ءان ماتىنىندە ءبىرتۇرلى سوزدەر تىزبەگى بار: «اللا», «Fortnite», «ورنەللا لەككاكاپپەللا» دەگەن سياقتى تىركەستەر قاتار ايتىلادى. الايدا مۇنداي سويلەمدەردەن كەيىن اتا-انا الاڭداۋشىلىق بىلدىرگەن. ءتىپتى جەلى قولدانۋشىلارى بۇل ءاندى يسلامعا قارسى مازمۇنى بار دەپ سىناعان. بىراق فاكتچەك پلاتفورمالارى مەن KnowYourMeme سايتى بۇل ءماتىننىڭ ناقتى ءدىني كونتەكستى جوق, جاي عانا نەيروجەلى گەنەراتسياسى ەكەنىن مالىمدەگەن.

بىراق ءدال وسى ابسۋردتىق بەينە ميلليونداعان ادامنىڭ ساناسىنا ەنىپ, بالالار مەن جاسوسپىرىمدەردىڭ جاپپاي كورۋ نىسانىنا اينالدى. بۇل «brainrot» دەپ اتالاتىن جاڭا ينتەرنەت-كونتەنتتىڭ ءتۇرى. اعىلشىن تىلىنەن اۋدارعاندا, بۇل «مي ءشىرۋ» دەگەندى بىلدىرەدى. ءتىپتى وكسفورد سوزدىگى «brainrot» ءسوزىن 2024 جىلى جىلدىڭ ءسوزى دەپ اتاعان. ونىڭ ماعىناسى اقپاراتتىق قۇندىلىعى تومەن, بىراق ەموتسيا تۋدىراتىن مازمۇندى بىلدىرەدى. سوندا بۇگىنگى ينتەرنەت قولدانۋشىسىنىڭ تالعامى دا وسى باعىتقا اۋىسقانى ما؟ ماعىنا ەمەس – كۇتپەگەندىك, لوگيكا ەمەس – حاوس, سيۋجەت ەمەس – اسەر ماڭىزدى بولىپ تۇر ما؟

مەمدەر نەگە ماعىناسىز بولعان سايىن قىزىقتى بولا باستادى؟

TikTok-تاعى ابسۋرد الەم تەك ترالالەلومەن شەكتەلمەيدى. بىرىنەن-ءبىرى وعاش كەيىپكەرلەر تۋىپ جاتىر. اتاپ ايتساق:

بومبارديرو كروكوديلو – كروكوديل مەن ۇشاقتىڭ گيبريدى; بالەرينا كاپۋچينو – باستىڭ ورنىندا كاپۋچينو شىنىسى تۇرعان بالەرينا. ول – كاپۋچينو اسساسينونىڭ بۇرىنعى جارى. ال كاپۋچينو اسساسينو كاتانا ۇستاعان قاھارلى ستاكان-كيللەر. بومبومبيني گۋسيني – ۇشاق پەن قازدىڭ گيبريدى. ول ادەتتە بومبارديروعا كومەككە كەلەدى. تۋنگ تۋنگ تۋنگ ساحۋر – بەيسبول تاياعىن ۇستاعان اعاش پولەنو. ەگەر دە ونىڭ اتىن ءۇش رەت اتاساڭ, سوڭىنان قالماي ىلەسىپ جۇرەدى. تريپپي تروپپي – ايۋدىڭ قولى بار, سەمىز ەركەك-بالىق. ول سۋ استى پاتشالىعىن باسقارادى. ليريلي لاريلا – كاكتۋس پەن ءپىلدىڭ قوسىندىسى. ول ۋاقىتتى باسقارۋعا قابىلەتتى جانە بولاشاقتى بولجاي الادى. شپيونيو گولۋبيو – جاسىرىن كامەرامەن جۇرگەن كوگەرشىن. بوبريتو بانديتو – مافيامەن بايلانىسى بار قاراپايىم عانا بوبەر.

مامانداردىڭ ايتۋىنشا, بۇگىندە ادام كۇنىنە مىڭداعان حابارلاما, سۋرەت, ۆيدەو كورەدى. ولار ميعا سالماق تۇسىرەدى. ماعىنالى, لوگيكاعا نەگىزدەلگەن كونتەنتتى قابىلداۋعا كۇش كەرەك. ال ماعىناسىز, بىراق ەموتسيونالدى كونتەنت ميعا دەمالىس بەرەدى. ونى تۇسىنۋگە تىرىسپايسىڭ, جاي قابىلدايسىڭ.

كەيبىر زەرتتەۋشىلەر بۇل ترەندتى كاپيتاليستىك, مازمۇنعا تولى, اۋىر الەمگە قارسىلىق رەتىندە كورەدى. ماعىنالى كونتەنت ءتارتىپ پەن جۇيەگە نەگىزدەلەدى. ال ماعىناسىز مەمدەر – تسيفرلىق ەركىندىكتىڭ سيمۆولى رەتىندە قاراستىرالادى.

قوعام پىكىرى ەكىگە ءبولىندى

ينتەرنەتتى شارلاپ كەتكەن «ترالالەرو ترالالا» بەينەسى كۇلكىلى, وعاش ءارى تارتىمدى بولعانىمەن, وعان قاتىستى قوعام پىكىرى ەكىۇشتى. جەلى قولدانۋشىلارى بۇل ءان مەن كەيىپكەردىڭ مازمۇنىن, ىقپالىن, ءتىپتى جاسىرىن ماعىناسىن تالقىلاپ, الاڭداۋشىلىق ءبىلدىردى.

«مەن بۇل ءاندى 30 سەكۋند ەستىدىم دە, 3 ساعات بويى توقتاۋسىز ايتا بەردىم. نە ءۇشىن, نەگە ەكەنىن بىلمەيمىن. بۇل نە سيقىر ءوزى؟!» «مەن ءوزىمدى اقىماق سەزىنەم, بىراق كۇلە بەرەم. مۇمكىن, وسى ءاننىڭ ماقساتى دا سول شىعار – ميىڭدى ءوشىرىپ, كۇلدىرىپ تاستاۋ.» «مەن بالالارىمنىڭ تەلەفونىنان TikTok-تى ءوشىرىپ تاستادىم. وسى «اكۋلا» كەلگەننەن بەرى ولار مازاسىز بولىپ كەتتى.» «جاي عانا اكۋلا عوي. ءۇش اياقتى. كوڭىلدى. نە ءۇشىن قاتتى ۋايىمداۋ كەرەك؟ مەن وعان ك ۇلىپ, ارى قاراي جىلجي بەرەم.» «مۇعالىم رەتىندە ايتام: سوڭعى كەزدە وقۋشىلاردىڭ زەيىنى مەن كوڭىل-كۇيى وزگەرىپ بارادى. ءار ساباقتان كەيىن TikTok قاراپ, وسىنداي ماعىناسىز كونتەنت كورەدى.»

ءبىرى ءدال وسى ءاندى جاساندى ينتەللەكت داۋىرىندەگى شىعارماشىلىقتىڭ كورىنىسى دەسە, ەندى ءبىرى اقپاراتتىق ۋلانۋدىڭ سيمۆولى دەپ قابىلدادى.

بۇل رەتتە قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى ينتەرنەت كەڭىستىگىندە تارالىپ جاتقان دەسترۋكتيۆتى مازمۇنداعى مۋلتفيلمدەرگە قاتىستى اتا-انالارعا ەسكەرتۋ جاسادى. كوميتەتتىڭ مالىمدەۋىنشە, سىرت كوزگە بالالارعا ارنالعان سەكىلدى كورىنەتىن كەيبىر بەينەماتەريالدار شىن مانىندە اگرەسسيانى ناسيحاتتايتىن جانە ادامگەرشىلىك قۇندىلىقتارعا كەرى اسەر ەتەتىن بۇرمالانعان اقپاراتتى قامتۋى مۇمكىن.

«قۇرمەتتى اتا-انالار! بالالارىڭىزدىڭ الەۋمەتتىك جەلىلەردە قانداي كونتەنت كورىپ جۇرگەنىنە, كىمدەرمەن سويلەسەتىنىنە جانە ينتەرنەتتە نە تالقىلايتىنىنا ەرەكشە نازار اۋدارىڭىز. بالاڭىزبەن اشىق اڭگىمەلەسىپ, سىني ويلاۋ قابىلەتىن دامىتۋعا كومەكتەسىڭىز. ەگەر كۇماندى نەمەسە زياندى كونتەنت بايقاساڭىز – بۇل تۋرالى بىردەن قۇزىرلى ورگاندارعا حابارلاڭىز. سانالى اتا-انا رەتىندە بالاڭىزدىڭ ومىرىنە بەلسەندى ارالاسۋىڭىز – ونىڭ تسيفرلىق قاۋىپسىزدىگىنىڭ باستى كەپىلى», دەلىنگەن حابارلامادا.