جەنەۆادا دۇنيەجۇزىلىك دەنساۋلىق ساقتاۋ ۇيىمىنىڭ (ددۇ) 78-ءشى اسسامبلەياسىندا پاندەمياعا قارسى العاشقى حالىقارالىق كەلىسىم قابىلداندى. بۇل شەشىم – COVID-19 ىندەتىنەن كەيىنگى ءۇش جىلعا سوزىلعان كەلىسسوزدەردىڭ ناتيجەسى, دەپ جازادى Egemen.kz.
قۇجات الەم ەلدەرىنىڭ بولاشاق پاندەميالارعا دايىن بولۋىن, سونداي-اق ۆاكتسينالار مەن دارىلىك قۇرالدارعا ءادىل ءارى جەدەل قول جەتكىزۋىن قامتاماسىز ەتۋدى كوزدەيدى.
«بۇل كەلىسىم – كوپجاقتى ىنتىماقتاستىق پەن عىلىم سالاسىنداعى ماڭىزدى جەتىستىك. ول جاھاندىق دەنساۋلىق ساقتاۋ جۇيەسىن نىعايتۋعا جول اشادى», دەيدى ددۇ باس ديرەكتورى تەدروس ادانوم گەبرەيەسۋس.
فيليپپين وكىلى, اسسامبلەيا توراعاسى تەودورو حەربوسا كەلىسىمنىڭ تاريحي ماڭىزىن اتاپ ءوتىپ:
«COVID-19 – عاسىرلىق سىناق بولسا, بۇگىن قابىلدانعان كەلىسىم – ونداي قاتەرگە الدىن الا قام جاساۋعا بەرىلگەن بىرەگەي مۇمكىندىك», – دەدى.
كەلىسىم اياسىندا ددۇ ەلدەردىڭ ىشكى زاڭناماسىنا ارالاسپايتىنى ناقتى كورسەتىلگەن. بۇل مەملەكەتتەردىڭ ەگەمەندىگىن ساقتاۋعا باسا نازار اۋدارىلعانىن بىلدىرەدى.
الداعى ۋاقىتتا قۇجاتتى ىسكە اسىرۋ ءۇشىن پاتوگەندىك ۇلگىلەرمەن الماسۋ جانە ونىڭ پايداسىن ءبولىسۋ تەتىكتەرى ازىرلەنەدى. سونداي-اق, عالامدىق جەتكىزۋ جانە لوگيستيكا جۇيەسى قۇرىلىپ, پاندەميا كەزىندە قاجەت مەديتسينالىق ونىمدەرگە بارلىق ەلدىڭ تەڭدەي ءارى جەدەل قول جەتكىزۋى قامتاماسىز ەتىلەدى.
ددۇ كەلىسىمىن 60 مەملەكەت راتيفيكاتسيالاعاننان كەيىن, ول زاڭدى كۇشىنە ەنەدى.