ەل استاناسىندا «وپەراليا» حالىقارالىق مۋزىكا فەستيۆالى باستالدى. «استانا وپەرا» تەاترىندا سالتاناتتى قىزىل كىلەم جايىلىپ, الداعى قويىلىمداردان ۇزىندىلەر ۇسىنىلدى. رولان پەتيدىڭ ءۇش تۋىندىسىنىڭ پرەمەراسى قويىلدى.
مادەني كەشتە كورەرمەن فرانتسۋز حورەوگرافىنىڭ تانىمال ءبىر اكتىدەن تۇراتىن بالەتتەرىن تاماشالادى. اتاپ ايتساق, «ارلەزيانكا», «بوزبالا جانە ءولىم», «كارمەن» – ساحنانىڭ بار ءسان-سالتاناتىمەن كورىنىس بەردى. قويىلىمدار «استانا وپەرا» بالەت ترۋپپاسىنىڭ كوركەمدىك جەتەكشىسى التىناي اسىلمۇراتوۆانىڭ باستاماسىمەن ساحنالاندى. بۇل بالەتتەردى جاڭعىرتۋ زور كۇشتى تالاپ ەتكەنى ءسوزسىز. ر.پەتي حورەوگرافياسىن تەاترعا الىپ كەلۋمەن لۋيدجي بونينو اينالىستى. تاريحي دەكوراتسيالار مەن كوستيۋمدەردى تۇپنۇسقا سىزبالارعا ساي ەتىپ قالپىنا كەلتىرۋ فرانتسۋز سۋرەتشىسى جان-ميشەل دەزيرە ۇيلەستىرگەن قازاقستاندىق سۋرەتشىلەردىڭ اسسيستەنتتەرىنە جۇكتەلدى. سونداي-اق مۋزىكالىق پارتيتۋرالارمەن تياناقتى جۇمىس اتقارىلدى. ايتا كەتەيىك, ەلمار بورىباەۆ پەن رۋسلان ءبايمۋرزيننىڭ باسقارۋىنداعى وركەستر شەبەر ويناپ, ءۇننىڭ تاماشا قۋاتى مەن مۋزىكاعا دەگەن ايقىن ادالدىقتى پاش ەتتى.
پرەمەرادا بالەت جۇلدىزدارى, ترۋپپانىڭ جەتەكشى سوليستەرى مەن كوردەبالەت ارتىستەرى ونەر كورسەتتى.
ايتا كەتەيىك, ءداستۇرلى فەستيۆال ەكى ايعا جالعاسادى. كورەرمەنگە 6 ماۋسىم كۇنى رەسەيلىك تەنوردىڭ قاتىسۋىمەن ج.بيزەنىڭ «كارمەن» وپەراسى ۇسىنىلادى. ودان بولەك وسى ايدا ەكى بىرەگەي پرەمەرا – پ.چايكوۆسكيدىڭ «ۇيقىداعى ارۋى» مەن ۆ.بەللينيدىڭ «كاپۋلەتتي مەن مونتەكيى» قويىلادى. ال 29 ماۋسىمدا قىتاي مەن رەسەيدىڭ بالەت جۇلدىزدارى قاتىساتىن گالا-بالەت وتەدى. شىلدەدە ەلوردالىقتار مەن قالا قوناقتارى دج.ءپۋچچينيدىڭ «بوگەما» وپەراسىن تاماشالاي الادى. وندا يتاليا مەن قىتايدان شاقىرىلعان سوليستەر ونەر كورسەتەدى. سونداي-اق XXI عاسىر بالەتى ر.رەبەكتىڭ «قازىرگى ءسات قانشا ۋاقىتقا سوزىلادى؟» جانە ۆ.تسۋكەتتيدىڭ «Souvenir de danse» قويىلىمدارى ۇسىنىلادى. دج.ءپۋچچينيدىڭ «تۋراندوت» گراند-وپەراسى قازاقستان مەن رەسەي جۇلدىزدارىنىڭ قاتىسۋىمەن وتەدى.
بۇدان بولەك ك.بايسەيىتوۆا اتىنداعى كامەرالىق زالدا بىرقاتار كونتسەرت ۇيىمداستىرىلادى. اتاپ ايتساق, بولگاريالىق سكريپكاشى پاۆەل مينەۆتىڭ كەشى, سالاۋات كاريباەۆ پەن اليار وتەتىلەۋ قاتىساتىن ۆيولونچەل كونتسەرتى, ماسكەۋدەن كەلگەن ەلمان ەرنۇردىڭ فورتەپيانولىق سولوسى, قازاقستاندىق كومپوزيتورلارعا ارنالعان ۆوكال كەشتەرى كوپشىلىك نازارىنا ۇسىنىلادى. جالپى, مادەني فەستيۆال اياسىندا كورەرمەن ءۇشىن 30-دان استام ءىس-شارا جوسپارلانعان.