احمەت بايتۇرسىن ۇلى اتىنداعى قوستاناي وڭىرلىك ۋنيۆەرسيتەتىنىڭ بازاسىندا ينجەنەرلىك ءبىلىم بەرۋ سالاسىنداعى وقۋ-ادىستەمەلىك بىرلەستىكتىڭ كەڭەيتىلگەن كوشپەلى وتىرىسى ءوتتى. ءىس-شارا تاقىرىبى – «ينجينيرينگ 4.0: ستراتەگيالار, وزەكتى ماسەلەلەر جانە سەرىكتەستىك».
جيىنعا قازاقستان رەسپۋبليكاسى عىلىم جانە جوعارى ءبىلىم مينيسترلىگىنىڭ وكىلدەرى, جوو-نىڭ ماماندارى, يندۋستريالىق جانە شەتەلدىك سەرىكتەستەر, سونداي-اق وقۋ-ادىستەمەلىك بىرلەستىكتىڭ مۇشەلەرى قاتىستى.
ءىس-شارا ارالاس فورماتتا ءوتتى: 80-نەن استام قاتىسۋشى ۋنيۆەرسيتەت بازاسىنداعى وڭىرلىك Smart-ورتالىقتا جانە يندۋستريالىق سەرىكتەستەردىڭ (Allur, Kia Qazaqstan, KamLIT KZ جانە اگروماشحولدينگ) الاڭدارىندا وفلاين قاتىستى. سونىمەن قاتار 70-تەن استام قاتىسۋشى ونلاين قوسىلدى, بۇل فورمات شەتەلدىك وكىلدەردىڭ قاتىسۋىن قامتاماسىز ەتتى.
كەڭەيتىلگەن وتىرىستىڭ باستى ماقساتى – ينجەنەرلىك ءبىلىم بەرۋ سالاسىنداعى جاڭا ستراتەگيالاردى تالقىلاۋ, ينجينيرينگ 4.0 ءداۋىرىنىڭ وزەكتى ماسەلەلەرىنە دەن قويۋ جانە ارىپتەستىك قاتىناستاردى نىعايتۋ.
العى ءسوز سويلەگەندەر: احمەت بايتۇرسىن ۇلى اتىنداعى قوۋ رەكتورى سەيتبەك قۋانىشباەۆ, قر جوعارى جانە جوعارى وقۋ ورنىنان كەيىنگى ءبىلىم كوميتەتى توراعاسىنىڭ ورىنباسارى گۇلجان جاراسوۆا, ابىلقاس ساعىنوۆ اتىنداعى قتۋ رەكتورى ساۋلە ساعىنتاەۆا جانە قوستاناي وبلىسى اكىمدىگىنىڭ قوعامدىق دامۋ باسقارماسى باسشىسىنىڭ ورىنباسارى قايرات قازەز.
پلەنارلىق وتىرىس اياسىندا ينجەنەرلىك كادرلاردى دايارلاۋ ماسەلەلەرى, ۋنيۆەرسيتەت پەن ونەركاسىپتىك كاسىپورىندار اراسىنداعى ءتيىمدى ىنتىماقتاستىق فورمالارى, سونداي-اق قازاقستانداعى ينجەنەرلىك ءبىلىم بەرۋدىڭ ۇلتتىق مودەلىن ىسكە اسىرۋ ماسەلەلەرى قارالدى.
ۋنيۆەرسيتەتتەردىڭ يندۋستريالىق سەرىكتەستەرمەن ءوزارا ارەكەتتەستىگى, دۋالدى ءبىلىم بەرۋدى دامىتۋ جانە ۋنيۆەرسيتەتتەر بازاسىندا وزىق ينجەنەرلىك مەكتەپتەردى (BES) قۇرۋ ماسەلەلەرىنە ەرەكشە كوڭىل ءبولىندى. Allur كومپانياسى توبىنىڭ وكىلى ايگۇل احمەتوۆا يندۋستريالىق وزەكتى ماسەلەلەرگە قارسى تۇرۋ تاجىريبەسىمەن ءبولىسىپ, ۋنيۆەرسيتەتتەرمەن بىرلەسكەن ءبىلىم بەرۋ باعدارلامالارىنىڭ ماڭىزدىلىعىنا, دۋالدى وقىتۋدى ەنگىزۋگە جانە كادرلىق ستراتەگيالاردى ازىرلەۋگە جوعارى وقۋ ورىندارىنىڭ قاتىسۋىنا نازار اۋداردى.
Kia Qazaqstan جانە KamLIT KZ كومپانيالارىنىڭ وكىلدەرى ءوز باياندامالارىندا ينجەنەرلىك ءبىلىم بەرۋدى دامىتۋدىڭ نەگىزگى باعىتتارىنا توقتالىپ, سونىڭ ىشىندە تسيفرلىق تەحنولوگيالاردى بەلسەندى ەنگىزۋ, حالىقارالىق ىنتىماقتاستىقتى كەڭەيتۋ جانە تۇلەكتەردىڭ باسەكەگە قابىلەتتىلىگىن ارتتىرۋ ماسەلەلەرىن اتاپ ءوتتى.
ستۋدەنتتەرگە ترانسۇلتتىق كورپوراتسيالاردا سۇرانىسقا يە وزەكتى ينجەنەرلىك قۇزىرەتتەردى قالىپتاستىرۋعا ەرەكشە ءمان بەرىلدى. شەتەلدىك جوعارى وقۋ ورىندارىمەن اكادەميالىق ىنتىماقتاستىقتى كەڭەيتۋ جانە جوعارى تەحنولوگيالىق سالالاردىڭ تالاپتارىنا بارىنشا بەيىمدەلگەن ءبىلىم بەرۋ باعدارلامالارىن ازىرلەۋ باستامالارى تانىستىرىلدى. بۇل رەتتە تەوريالىق ءبىلىمدى وندىرىستىك تاجىريبەمەن ۇشتاستىرۋعا مۇمكىندىك بەرەتىن ءتيىمدى قۇرال رەتىندە دۋالدى وقىتۋعا باسىمدىق بەرىلدى.
كۇننىڭ ەكىنشى جارتىسىندا «BES Connect: تەحنولوگيالىق ديالوگ كۇنى» كوممۋنيكاتسيالىق الاڭى ءوتتى. قاتىسۋشىلار زاۋىتتاردى ارالاپ, وندىرىستىك وزىق تەحنولوگيالارمەن تانىستى. Allur, KamLIT KZ جانە اگروماشحولدينگ كومپانيالارى زاماناۋي ماتەريالداردى ەنگىزۋ, وندىرىستىك پروتسەستەردى وڭتايلاندىرۋ جانە ينجەنەرلىك مامانداردىڭ بىلىكتىلىگىن ارتتىرۋدىڭ ماڭىزدىلىعىنا نازار اۋدارا وتىرىپ, وزدەرىنىڭ ەڭ جاڭا ازىرلەمەلەرى مەن شەشىمدەرىن ۇسىندى.
ءىس-شارا قورىتىندىسى بويىنشا تەحنولوگيالىق باعىتتاعى سالالارعا ارنالعان جوعارى بىلىكتى ينجەنەر ماماندارىن دايارلاۋعا باعىتتالعان بىرلەسكەن باستامالاردى ودان ءارى دامىتۋ تۋرالى كەلىسىمدەرگە قول جەتكىزىلدى.