ورال قالاسىنداعى «جايىق ارەنا» سپورت كەشەنىندە كەڭەس وداعىنىڭ باتىرى مانشۇك مامەتوۆانى ەسكە الۋعا ارنالعان X حالىقارالىق «Akzhaiyk Open» WKF ءتۋرنيرى باستالدى, دەپ حابارلايدى Egemen.kz.
حالىقارالىق دەڭگەيدەگى ايتۋلى دوداعا ءازىربايجان, قىرعىزستان, وزبەكستان جانە رەسەي فەدەراتسياسىنان, سونىڭ ىشىندە باشقۇرتستان جانە تاتارستان رەسپۋبليكالارىنان سپورتشى كەلدى. سونداي-اق قازاقستاننىڭ بارلىق وڭىرلەرىنەن, اتاپ ايتقاندا استانا, الماتى, شىمكەنت قالالارىنان, اقمولا, اقتوبە, الماتى, اتىراۋ, جامبىل, جەتىسۋ, قاراعاندى, قىزىلوردا, ماڭعىستاۋ, پاۆلودار, تۇركىستان, باتىس قازاقستان وبلىستارىنان جانە بايقوڭىر قالاسىنان دا كوماندالار بار. تۋرنيرگە بارلىعى 1000-عا جۋىق سپورتشى قاتىسىپ جاتىر.
حالىقارالىق جارىستىڭ سالتاناتتى شىلۋى راسىمىنە باتىس قازاقستان وبلىسىنىڭ اكىمى ناريمان تورەعاليەۆ, «قازاقستان كاراتە فەدەراتسياسىنىڭ وداعى» زتب ۆيتسە-پرەزيدەنتى بولات حاۋلاحات, فەدەراتسيانىڭ باس حاتشىسى اسقار مولداعالي, كاراتە WKF-تەن قر مەملەكەتتىك جاتتىقتىرۋشىسى مايا بايماعانبەتوۆا, قر جاستار قۇراماسىنىڭ باس جاتتىقتىرۋشىسى, قر ەڭبەك سىڭىرگەن جاتتىقتىرۋشىسى, ازيا ويىندارىنىڭ ەكى دۇركىن جەڭىمپازى, قاجىمۇقان مۇڭايتپاسوۆتىڭ ۇرپاعى شاتتىق قاجىمۇقان سەكىلدى تانىمال تۇلعالار قاتىستى.
«بۇل حالىقارالىق تۋرنير سپورتتىق ماڭىزىمەن قاتار, ەل قورعاعان ەرجۇرەك باتىر قىز — مانشۇك مامەتوۆانى ەسكە الۋ ارقىلى جاس بۋىنعا پاتريوتتىق تاربيە بەرۋدى, دوستىق پەن ىنتىماقتاستىقتى نىعايتۋدى ماقسات ەتەدى» دەيدى جارىستى ۇيىمداستىرۋشىلار.
Akzhaiyk Open WKF ءتۋرنيرى «سامۇرىق-قازىنا» ۇلتتىق ءال-اۋقات قورىنىڭ قولداۋىمەن ءوتىپ جاتىر. ءتۋرنيردىڭ العاشقى كۇنى بقو سپورتشىلارى تاماشا ناتيجە كورسەتىپ, 55 كگ سالماقتا — الىشەر جادىگەروۆ, -60 كگ سالماقتا — دارحان تيمراليەۆ كۇمىس جۇلدە السا, +84 كگ سالماقتا — تايجان الىشەر چەمپيون اتاندى.
تۋرنير الداعى كۇندەرى جاسوسپىرىمدەر مەن كادەتتەر اراسىندا كۋميتە جانە كاتا باعدارلامالارى بويىنشا جالعاسادى. جارىس 18 مامىردا قورىتىندىلانادى.
باتىس قازاقستان وبلىسى