استانادا ورتالىق ازيانىڭ ءىى ەندوسكوپيالىق فورۋمى باستالدى. ءىس-شارانى قازاقستان ەندوسكوپيالىق قوعامى مەن ۇلتتىق عىلىمي ونكولوگيا ورتالىعى دەنساۋلىق ساقتاۋ مينيسترلىگىنىڭ قولداۋىمەن ۇيىمداستىردى, دەپ جازادى Egemen.kz.
ەكى كۇندە فورۋمعا ەلىمىزبەن قاتار رەسەي, بەلارۋس, ۋكراينا, موڭعوليا, ءۇندىستاننان كەلگەن شامامەن 400 قاتىسۋشى مەن 40 سپيكەر قازىرگى دياگنوستيكا مەن ەمدەۋدىڭ زاماناۋي تاسىلدەرىن تالقىلادى. بىرەگەي ەندوسكوپيالىق ارالاسۋ ادىستەرىن كورسەتىپ, ونكولوگيا, ەندوسكوپيا, گاستروەنتەرولوگيا, پۋلمونولوگيا جانە وسى سالالارعا جاقىن باعىتتار بويىنشا وزىق تەحنولوگيالاردى ەنگىزۋ تاجىريبەسىن ءبولىستى.
فورۋمنىڭ اشىلۋىندا دەنساۋلىق ساقتاۋ ۆيتسە-ءمينيسترى ەرجان نۇرلىباەۆ ەندوسكوپيالىق دياگنوستيكالاۋ مەن ەمدەۋ ادىستەرىن دامىتۋدىڭ ماڭىزىن اتاپ ءوتتى. ول بىلتىر ونكولوگيالىق قىزمەت ماسەلەلەرى جونىندەگى ۇيلەستىرۋ كەڭەسىندە وبلىستىق ونكوديسپانسەرلەر بازاسىندا مامانداندىرىلعان جوعارى تەحنولوگيالىق ەندوسكوپيالىق ورتالىقتار قۇرۋ تۋرالى ستراتەگيالىق شەشىم قابىلدانعانىن ەسكە سالدى.
«كونفەرەنتسيانىڭ باستى ماقساتى – كۇشتى بىرىكتىرىپ, جوعارى بىلىكتى مامانداردى تارتۋ. ءدال وسى ورتالىقتاردا كلينيكالىق تاجىريبە جيناقتالىپ, ءينۆازيۆتى دياگنوستيكا مەن ەمدەۋ ادىستەرى داميدى. بۇگىندە مۇنداي ەندوسكوپيالىق ورتالىقتار تەك ونكوديسپانسەرلەردە عانا ەمەس, سونداي-اق بەيىندى ستاتسيونارلار بازاسىندا دا ەلىمىزدىڭ بارلىق وڭىرلەرىندە دەرلىك اشىلدى. جوعارى تەحنولوگيالى, از ءينۆازيۆتى دياگنوستيكا ادىستەرى ەڭ الدىمەن حالقىمىزدىڭ ءومىر ساپاسىن ارتتىرۋعا باعىتتالعان. فورۋم ۇزدىك تاجىريبەلەر الماسۋعا ارنالعان ماڭىزدى الاڭعا اينالاتىنىنا سەنىمدىمىن. مۇنداي كاسىبي كەزدەسۋلەردىڭ قۇندىلىعىن اسىرا باعالاۋ قيىن – ولار كاسىبي بايلانىستاردى نىعايتىپ, ەندوسكوپيالىق مەديتسينانىڭ بولاشاعىنا اسەر ەتە الاتىن جاڭا يدەيالاردىڭ كوزىنە اينالادى», دەدى ۆيتسە-مينيستر.
فورۋمنىڭ باستى سپيكەرلەرىنىڭ قاتارىندا ەندوسكوپيا سالاسىنىڭ الەمگە ايگىلى ساراپشىلارى بار. وڭەشتىڭ زاماناۋي ەندوسكوپيالىق حيرۋرگياسىنىڭ نەگىزىن قالاۋشىلاردىڭ ءبىرى, پروفەسسور حارۋحيرو ينوە (جاپونيا), اسقازان وبىرىن ەرتە دياگنوستيكالاۋ جونىندەگى مامان, پروفەسسور توموحيكو مورياما (جاپونيا), توق ىشەك ديسسەكتسياسى سالاسىنىڭ ساراپشىسى, پروفەسسور چون سون ۋ (وڭتۇستىك كورەيا), ينتەرۆەنتسيالىق برونحولوگ دوكتور حاري كيشان گونۋگۋنتلا ء(ۇندىستان), اسقازان-ىشەك جولىنىڭ تومەنگى بولىمدەرىندەگى ەندوسكوپيا بويىنشا الەمدىك دەڭگەيدەگى ساراپشى پروفەسسور حيروشي كاشيدا (جاپونيا) سىندى بىلگىرلەر باس قوستى.
فورۋم اياسىندا زاماناۋي ەندوسكوپيالىق جابدىقتار, ونىڭ ىشىندە جاساندى ينتەللەكتى بار جۇيەلەر, از ءينۆازيۆتى ارالاسۋلارعا ارنالعان قۇرىلعىلار, ەرتە كەزەڭدەگى وبىردى دياگنوستيكالاۋ مەن ەمدەۋگە ارنالعان ارنايى قۇرالدار ۇسىنىلعان كورمە دە جۇمىس ىستەپ تۇر.
«ونكولوگياداعى ەندوسكوپيانىڭ ورنى ەرەكشە: ول قاتەرلى دە, قاتەرسىز دە ىسىكتەردىڭ بار-جوعىن انىقتاپ قانا قويماي, ىسىكتەردى از ءينۆازيۆتى تاسىلمەن الىپ تاستاۋعا مۇمكىندىك بەرەدى. قازىرگى تاڭدا باستاپقى كەزەڭدەگى قاتەرلى ىسىكتەردى ولار تەرەڭ ينۆازياعا جەتپەي تۇرىپ الىپ تاستاۋ بويىنشا جوعارى تەحنولوگيالىق وپەراتسيالار جۇرگىزىلۋدە. ءبىز ەندوسكوپيانىڭ بۇكىل مۇمكىندىكتەرىن كورسەتكىمىز كەلەدى»,– دەدى قازاقستان ەندوسكوپيالىق قوعامىنىڭ توراعاسى, ۇعوو ەكسپەرتتىك ەندوسكوپيا ءبولىمىنىڭ مەڭگەرۋشىسى قانات باتىربەكوۆ.
فورۋمنىڭ پراكتيكالىق بولىگى بۇگىن, 16 مامىردا جالعاستى. باعدارلامادا حالىقارالىق مەنتورلاردىڭ قاتىسۋىمەن سيمۋلياتسيالىق ستانتسيالارداعى ترەنينگتەر جانە live-سەسسيالار, وپەراتسيا زالدارىنان تىكەلەي ترانسلياتسيالار ۇيىمداستىرىلدى.