ءاربىر ۇجىمدا ادال ەڭبەگىمەن, جۇمىسىنا دەگەن قۇنتتىلىعىمەن ابىروي, بەدەل جيناپ, اينالاسىنداعىلاردىڭ قۇرمەتىنە بولەنگەن جاندار بولادى. سول تۇرعىدا, بيىلعى جۇمىسشى ماماندىقتار جىلى اسقار ۋاليەۆ سىندى قاراپايىم ەڭبەك ادامدارىن كەڭىنەن ناسيحاتتاۋ ءلازىم.
دەنساۋلىق ساقتاۋ مينيسترلىگىنە قاراستى كۋرورتولوگيا جانە مەديتسينالىق وڭالتۋ عىلىمي-زەرتتەۋ ينستيتۋتىنىڭ فيليالى – «بۋراباي» ەمدەۋ-ساۋىقتىرۋ كەشەنىنىڭ اۆتوبۋس جۇرگىزۋشىسى اسقار ۋاليەۆ 43 جىلدىق تاجىريبەسى بار ەڭبەك مايتالمانى. سونداي-اق ول – ۇلكەن ۇجىمنىڭ, قوعامنىڭ تۇراقتى, ۇيلەسىمدى دامۋ ىرعاعىنا ۇلەس قوسىپ جۇرگەن جانداردىڭ ءبىرى.
ونىڭ كاسىپورىنمەن بايلانىسى تانكشى رەتىندە اسكەري بورىشىن وتەپ كەلگەننەن كەيىن, بىردەن باستالدى. 1982 جىلى «بۋراباي» ءساناتوريىنىڭ كولىگىن تىزگىندەدى. قىرىق جىلدان استام ۋاقىتتان بەرى وسى كاسىبى مەن جۇمىس ورنىنان مىزعىماي ەڭبەك ەتىپ كەلەدى. ۇجىمىمەن بىتە قايناسقان ءومىرى – تۇراقتىلىقتىڭ دا كەپىلى.
بۇگىندە اسقار قىزمەتكەرلەردى تاسىمالداۋعا جاۋاپتى. بالالاردى وڭالتۋ بولىمىنەن ەكسكۋرسياعا اپارادى, مۇنى شاقىرىمدارمەن ولشەنبەيتىن جان جىلۋىمەن قۇلشىنا اتقارادى. ونىڭ اۆتوبۋسى تەك كولىك قۇرالى عانا ەمەس, اركىم ءوزىن قاۋىپسىز سەزىنەتىن كىشكەنتاي قامقورلىق ارالى.
«بۇل – مەنىڭ ءۇيىم. تاڭەرتەڭ جۇمىسقا تويعا باراتىنداي بولىپ جينالامىن, اسىعامىن. اسىرەسە كىشكەنتاي بالالاردى الىپ جۇرگەنىمە قۋانىشتىمىن, ولاردىڭ ارقاشان جاقسى كوڭىل كۇيدە جۇرگەنىن قالايمىن», دەيدى اسقار.
قىرىق جىلدان استام كولىك جۇرگىزىپ كەلە جاتسا دا, ءالى دە سەرگەك, جىگەرلى, قايراتتى ازاماتتىڭ كوپ جىلعى ادال ەڭبەگى «ەڭبەك ارداگەرى» اتاعىمەن باعالاندى. جالپى, كۋرورتولوگيا جانە مەديتسينالىق وڭالتۋ (عزي) مەكەمەسى تاجىريبەلى دە تۇراقتى قىزمەتكەرلەرىن لايىقتى باعالاپ, قۇرمەت كورسەتىپ وتىرۋدى داستۇرگە اينالدىرعان. ۇجىمدا ەڭبەك ارداگەرلەرىنە قامقورلىق جاساۋمەن قاتار, جاس مامانداردىڭ كاسىبي وسۋىنە دە بارلىق جاعداي قاراستىرىلعان. لاۋازىمىنا قاراماستان, ينستيتۋتتاعى ءاربىر قىزمەتكەر ورتاق ىستە ماڭىزدى ءرول اتقاراتىنىنا سەنىمدى بولعاندىقتان, اركىم ءوز مىندەتىنە جاۋاپكەرشىلىكپەن قارايدى. عالىم, دارىگەر, مۇعالىم, تەحنيكالىق قىزمەتكەر, جۇرگىزۋشى بولسىن, بارلىعى ازاماتتاردىڭ دەنساۋلىعى ءۇشىن جۇمىس ىستەيتىن ءبىرتۇتاس ءتىرى ازعا ىسپەتتى.
اسقار ۋاليەۆتىڭ تاعىلىمدى ءومىر جولى جاي عانا جۇمىس كۇندەرىنىڭ, تابىس تابۋدىڭ شەجىرەسى ەمەس, بۇل – ءوز كاسىبىن شەبەر مەڭگەرۋدىڭ, ادامدارعا دەگەن شىنايى سۇيىسپەنشىلىكتىڭ جارقىن كورىنىسى. مۇنداي ادامدار قاراپايىم, ادال ەڭبەك پەن ادامگەرشىلىكتىڭ قالىپتى قۇندىلىعىن دالەلدەي وتىرىپ, جاستارعا دا ونەگە دارىتادى.