الماتى وبلىسىنىڭ تالعار اۋدانىندا ەلىمىزدەگى ەڭ اۋقىمدى يندۋستريالىق جوبالاردىڭ ءبىرى – «قايرات» يندۋستريالىق ايماعىنىڭ كەڭەيتىلگەن قۇرىلىسى باستالدى. جوبا مەملەكەت باسشىسىنىڭ جەدەل يندۋستريالاندىرۋ, وڭىرلىك وندىرىستىك كلاستەرلەردى دامىتۋ جانە تىكەلەي ينۆەستيتسيا تارتۋ جونىندەگى تاپسىرمالارى اياسىندا ىسكە اسىرىلىپ جاتىر.
جوبا الەمدەگى ەڭ ءىرى قۇرىلىس كورپوراتسيالارىنىڭ ءبىرى — China State Construction Engineering Corporation (CSCEC) كومپانياسىمەن بىرلەسىپ جۇزەگە اسىرىلۋدا. 177 گەكتار اۋماقتا 20-دان استام جاڭا ءوندىرىس ورىندارىن ورنالاستىرۋ جوسپارلانعان. جالپى, ينۆەستيتسيا كولەمى 1 ملرد دوللاردى قۇرايدى. بۇل «قايراتتى» ەلىمىزدە ەڭ ءىرى كولەمدەگى قارجى مەن كاسىپورىندى ءبىر مەزگىلدە تارتۋعا قول جەتكىزگەن بىرەگەي يندۋستريالىق ايماققا اينالدىرىپ وتىر.
ءبىر ايتا كەتەرلىگى, جوبانىڭ ىشكى ينجەنەرلىك ينفراقۇرىلىمى تولىقتاي ينۆەستورلار ەسەبىنەن سالىنادى. ال سىرتقى جەلىلەردى تارتۋ وبلىس اكىمدىگىنىڭ مىندەتىنە جاتادى. بۇل ءتاسىل مەملەكەتتىك بيۋدجەتتى ايتارلىقتاي ۇنەمدەۋگە مۇمكىندىك بەرەدى. مۇنداعى ماقسات – Geely اۆتوكونتسەرنىنىڭ قاتىسۋىمەن ماشينا جاساۋ كلاستەرىن قۇرۋ. اۆتوموبيل كومپونەنتتەرى مەن توراپتارىن جەرگىلىكتى جەردە ءوندىرۋ جوسپارلانعان.
«قايرات» جوباسى – مەملەكەت باسشىسى ايقىنداعان ستراتەگيالىق ماقساتتارعا تولىق سايكەس كەلەدى. ءبىز زاماناۋي يندۋستريالىق پلاتفورما قالىپتاستىرىپ, جاڭا جۇمىس ورىندارىن اشىپ, ەكسپورتتى ارتتىرىپ, تۇراقتى ەكونوميكالىق ءوسىمدى قامتاماسىز ەتۋدەمىز. 1 ميلليارد دوللارلىق ينۆەستيتسيا – جۇيەلى جۇمىستىڭ جانە حالىقارالىق ارىپتەستەردىڭ سەنىمىنىڭ ناتيجەسى. بۇگىن 20 كومپانيانىڭ العاشقىسى ءوز جۇمىسىن باستادى. بۇدان ءارى ولاردىڭ ارقايسىسىنىڭ جۇمىسىن باقىلاپ, اكىمدىك تاراپىنان قۇجاتتامالىق كومەك كەرەك بولسا قولداۋ كورسەتەمىز», دەپ اتاپ ءوتتى الماتى وبلىسىنىڭ اكىمى مارات سۇلتانعازيەۆ.
بۇگىندە «قايرات» يندۋستريالىق ايماعىندا بىرنەشە كاسىپورىن, اتاپ ايتساق, جىلۋ وقشاۋلاعىش ماتەريال وندىرەتىن «تەحنونيكول ورتالىق ازيا», قۇيما ونىمدەر شىعاراتىن «Safa Industrial», مەتيز ونىمدەرىن وندىرەتىن «QazMetProduct», تاۋ-كەن سالاسىنا ارنالعان كومپونەنتتەر جاسايتىن «Sunlong» جانە سۇيىق شىنى شىعاراتىن «Hong Shun» كومپانيالارى جۇمىس ىستەيدى. جالپى, ينۆەستيتسيا كولەمى 146,7 ملرد تەڭگەدەن اسىپ, 3600-دەن استام جاڭا جۇمىس ورنى اشىلدى.
يندۋستريالىق ايماقتىڭ باسشىسى ەربول شوقاەۆ ءوز سوزىندە: «قايرات» – بۇل جاي عانا وندىرىستىك الاڭ ەمەس, تولىققاندى يندۋستريالىق ەكوجۇيە. ءبىز ينۆەستورلار ءۇشىن جوبالاردى جەدەل ىسكە اسىرۋعا بارىنشا قولايلى جاعداي جاساپ وتىرمىز. اكىمشىلىك كەدەرگىلەردى ازايتىپ, جان-جاقتى قولداۋ كورسەتەمىز», دەدى.
جوبا الماتى وبلىسىنداعى جالپى كولەمى 1786,7 گەكتاردى قۇرايتىن التى يندۋستريالىق ايماقتى دامىتۋ باعدارلاماسى اياسىندا ىسكە اسىپ جاتىر. سونىمەن قاتار 96,6 مىڭ گەكتار اۋماقتا ورنالاسقان «الاتاۋ» ارنايى ەكونوميكالىق ايماعىن دامىتۋ جالعاسۋدا. مۇندا 3,7 ترلن تەڭگە ينۆەستيتسيا تارتىلىپ, 34 مىڭ جۇمىس ورنى اشىلادى دەپ جوسپارلانعان.
الماتى وبلىسى