ەلىمىزدە كەڭ تارالعان كيبەرقىلمىس تۇرلەرى قانداي؟

استانا قالاسى پوليتسيا دەپارتامەنتىنىڭ كيبەرقىلمىسپەن كۇرەس باسقارماسىنىڭ باستىعى تالعات بولەگەنوۆ ينتەرنەت الاياقتىقتىڭ كەڭ تاراعان تۇرلەرىن اتادى, دەپ حابارلايدى inbusiness.kz سايتى.

- ەگەر كۇماندى سىلتەمەلەردى بايقاساڭىز, سىلتەمەگە وتپەڭىز, ءتىپتى ول جەكە تانيتىن ادامنان كەلسە دە. سەبەبى پاراقشا نەمەسە سايت بۇزىلعان بولۋى مۇمكىن. سونداي-اق ەشكىمگە sms ارقىلى كەلگەن كودتى, بانك كارتاسىنىڭ قۇپياسوزدەرىن نەمەسە جەكە دەرەكتەردى بەرۋگە بولمايدى, اسىرەسە ءوزىن بانك نەمەسە مەملەكەتتىك ورگان وكىلى رەتىندە تانىستىرعان ادامعا, - دەدى تالعات بولەگەنوۆ استانا قالاسى كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.

الاياقتىقتىڭ كەڭ تاراعان 5 ءتاسىلى:

1. الاياقتار وزدەرىن بانك قىزمەتكەرى رەتىندە تانىستىرىپ, كۇماندى ترانزاكتسيا سىلتەمە جاساپ, جەكە دەرەكتەردى سۇرايدى;

2. ونلاين ساۋدا: جوق تاۋار جارناماسىن جاريالاپ, الدىن الا تولەم العان سوڭ, حابارسىز كەتەدى;

3. فيشينگ سايتتارى: رەسمي سايتتارعا ۇقساس جالعان رەسۋرستار ارقىلى قولدانۋشىلاردىڭ لوگين, قۇپيا سوزدەرىن يەمدەنەدى;

4. ينۆەستيتسيالىق الاياقتىق: قولايلى ينۆەستيتسيالىق مۇمكىندىك رەتىندە ۇسىنىلعان الاياقتىق پلاتفورمالار سالىم جيناپ, قاراجاتتى شەشۋگە كەلگەندە الاياقتىق ارەكەت بولىپ شىعادى;

5. مەسسەندجەرلەردى بۇزۋ: پاراقشالاردى بۇزىپ, تانىس ادامىڭىزدىڭ اتىنان اقشا سۇراپ حابارلاما جىبەرەدى.