ءۇرىمشى قالاسىندا قىتاي حالىق رەسپۋبليكاسى مەن ورتالىق ازيا ەلدەرىنىڭ ءبىلىم مينيسترلەرى, ءتيىستى ۆەدومستۆولار مەن ديپلوماتيالىق كورپۋس وكىلدەرىنىڭ قاتىسۋىمەن وتكەن كەڭەسكە قر وقۋ-اعارتۋ ءمينيسترى عاني بەيسەمباەۆ تا قاتىستى, دەپ حابارلايدى Egemen.kz.
كەڭەستىڭ باستى ماقساتى – ءبىلىم بەرۋ سالاسىنداعى ينتەگراتسيا مەن ورنىقتى ارىپتەستىكتى نىعايتۋ, ايماقتىق جانە حالىقارالىق دەڭگەيدە ءبىلىم بەرۋ ساپاسىن ارتتىرۋعا باعىتتالعان ورتاق باستامالاردى تالقىلاۋ بولدى.
عاني بەيسەمباەۆ ءوز سوزىندە ايماق ەلدەرى اراسىنداعى ىنتىماقتاستىقتى ارتتىرۋدىڭ ماڭىزدىلىعىن اتاپ ءوتىپ, اسىرەسە تەحنيكالىق جانە كاسىپتىك ءبىلىم بەرۋ سالاسىنداعى ارىپتەستىك باعىتتارىنا باسىمدىق بەردى.
«قازاقستاندا مەملەكەت باسشىسى قاسىم-جومارت توقاەۆتىڭ باستاماسىمەن 2025 جىل جۇمىسشى ماماندىقتار جىلى دەپ جاريالاندى. قازىرگى ۋاقىتتا تەحنيكالىق جانە كاسىپتىك ءبىلىم بەرۋ جۇيەسىندە اۋقىمدى وزگەرىستەر جۇزەگە اسۋدا. ينتەرناتسيونالداندىرۋ اياسىندا الەمنىڭ جەتەكشى كوللەدجدەرى مەن وندىرىستىك كاسىپورىندارىمەن سەرىكتەستىك ورناتىلىپ, بيزنەس قاۋىمداستىقپەن ىنتىماقتاستىق كەڭەيۋدە, پەداگوگتەر مەن ستۋدەنتتەر ءۇشىن اكادەميالىق ۇتقىرلىق جەتىلدىرىلۋدە. قازاقستان ىنتىماقتاستىققا اشىق جانە جاھاندىق ەڭبەك نارىعىندا سۇرانىسقا يە كادرلاردى دايارلاۋعا باعىتتالعان ورتاق تاسىلدەردى ازىرلەۋدى قولدايدى», دەدى مينيستر.
كەڭەس قورىتىندىسىندا قاتىسۋشى ەلدەر ءبىلىم مينيسترلەرىنىڭ كەڭەسى مەحانيزمىنىڭ جارعىسىن جانە ء«ۇرىمشى دەكلاراتسياسىن» قابىلدادى. بۇل قۇجاتتار مەملەكەتتەر اراسىنداعى ءبىلىم سالاسىنداعى ۇزاق مەرزىمدى ارىپتەستىكتىڭ قۇقىقتىق جانە ينستيتۋتسيونالدىق نەگىزىن قالىپتاستىرادى. سونىمەن قاتار, جوعارى بىلىكتى ماماندار دايارلاۋعا قاتىستى باسىم باعىتتاردى بەكىتەدى.
ايتا كەتەيىك, كەلەسى مينيسترلەر كەڭەسى قازاقستاندا وتەدى. روتاتسيا تارتىبىنە سايكەس, ورتالىق ازيا ەلدەرى مەن قىتايدىڭ ءبىلىم مينيسترلەرىنىڭ ەكىنشى كەڭەسىن وتكىزۋ قۇقىعى مەن توراعالىق ءبىزدىڭ ەلگە بەرىلدى.