ۇكىمەت وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانباەۆ جاز ايلارىنا ارنالعان اۋا رايى بولجامىن ءمالىم ەتتى, دەپ حابارلايدى Egemen.kz.
ءمينيستردىڭ ايتۋىنشا, ماۋسىم ايىندا قازاقستاننىڭ باسىم بولىگىندە ورتاشا ايلىق اۋا تەمپەراتۋراسى كليماتتىق نورمانىڭ شەگىندە بولادى — سولتۇستىكتە جانە ورتالىقتا 17-20 گرادۋس شاماسىندا, ال باتىس وڭىرلەردە 23-25 گرادۋسقا دەيىن.
وڭتۇستىك-باتىستا جانە ەلىمىزدىڭ قيىر وڭتۇستىگىندە ادەتتەگىدەن ىستىق بولادى – جازىق ايماقتاردا ورتاشا تەمپەراتۋرا 24-28 گرادۋس, ال ەڭ جوعارى تەمپەراتۋرا 45 گرادۋسقا دەيىن جەتۋى مۇمكىن.
جاۋىن-شاشىن مولشەرى باتىس جانە سولتۇستىك-شىعىس وڭىرلەردە نورماعا ساي بولادى, ال باسقا ايماقتاردا نەگىزىنەن نورمادان تومەن بولادى دەپ كۇتىلەدى.
شىلدە ايىندا ۇزاق مەرزىمدى بولجامعا سايكەس, اۋا تەمپەراتۋراسى كليماتتىق نورما شەگىندە بولادى, ال شىعىس جانە وڭتۇستىك-شىعىس وڭىرلەردە ورتاشا ەسەپپەن نورمادان 1 گرادۋس جوعارى بولادى.
جاۋىن-شاشىن كولەمى نەگىزىنەن كوپجىلدىق نورمالار شەگىندە بولجانۋدا, تەك ەلىمىزدىڭ قيىر سولتۇستىك-باتىسىندا, سولتۇستىگىندە, وڭتۇستىگى مەن وڭتۇستىك-شىعىسىندا نورمادان جوعارى بولۋى مۇمكىن.
الدىن الا بولجام بويىنشا, تامىز جانە قىركۇيەك ايلارى ءونىم قالىپتاستىرۋ مەن ەگىن جيناۋ جۇمىستارى ءۇشىن قولايلى بولماق. اۋا رايى تۇراقتى بولادى, كوپ مولشەردە جانە ۇزاققا سوزىلاتىن جاۋىن-شاشىن كۇتىلمەيدى. ەلدىڭ باسىم بولىگىندە ورتاشا ايلىق اۋا تەمپەراتۋراسى كليماتتىق نورمادان 1 گرادۋس جوعارى بولادى.
مينيستر جازعى ايلارعا ارنالعان بۇل الدىن الا بولجام اي سايىنعى ناقتى بولجامدارمەن تولىقتىرىلىپ, ناقتىلاپ وتىراتىنىن اتاپ ءوتتى.