بۇل جولى استانالىق تەاتر الماتىلىقتارعا روك-بالەتتەگى تانگو مانەرىندە «جىل ماۋسىمى» اتتى اۋقىمدى باعدارلاماسىندا كلاسسيكالىق, ۇلتىق حورەوگرافيا مەن زاماناۋي بالەت پەن سيمفونيالىق مۋزىكانى ۇسىنعالى وتىر. بۇگىن الماتى وڭىرلىك كوممۋنيكاتسيالار ورتالىعىندا وتكەن كونفەرەنتسيادا وسى كونتسەرتتىڭ جاي-جاپسارى باياندالدى.
«الماتىداعى «استانا بالەت» تەاترىنىڭ گاسترولدىك قويىلىمدارى مامىر ايىنىڭ 10-18 ارالىعىندا «Almaty Theatre ساحناسىندا وتەدى. بۇل قالاداعى ۇلكەن مادەني جاڭالىق بولعالى تۇر. باعدارلامادا – پرەمەرالار, ايگىلى قويىلىمدار, الەمگە تانىمال ونەر جۇلدىزى ەرجان ق ۇلىباەۆتىڭ ءوزى قاتىساتىن سيمفونيالىق مۋزىكا كەشى مەن قازاق مادەنيەتى تۋرالى ەلدى ەلەڭ ەتكىزەر سپەكتاكل دا قويىلماق.
«الماتى – ءبىز جىلدا اتتاناتىن ەڭ ءبىرىنشى قالا. ءبىز سۇيىكتى قالامىزعا جىل سايىن كەلىپ تۇرامىز. ودان كەيىن تارازدا, اقتوبەدە, تالدىقورعان, پاۆلودار مەن تۇركىستاندا بولدىق. شەتەلگە دە شىعىپ تۇرامىز. سوڭعى جىلدارى جەنەۆادا, تبيليسيدە, افينا مەن انتاليادا دا ونەر كورسەتە باستادىق. سونىمەن بىرگە, ءبىزدىڭ توپ كىشىگىرىم قۇراممەن پاريجدە, دەلي مەن مۋمبايدا دا ونەر كورسەتىپ قايتتى», دەيدى ۆالەري كۇزەمباەۆ.
گاسترولدىك ساپار مامىر ايىنىڭ 10-11 كۇنى ونەردى مودەرنمەن, تەاتر دراماتيزمىمەن ۇشتاستىرعان كيريل رادەەۆتىڭ حورەوگرافياسىنداعى «Blind Forgiveness» دەيتىن قويىلىمىمەن اشىلادى. ارسەني سميرنوۆتىڭ مۋزىكاسىنىڭ دەمەۋىمەن, وندا جان-دۇنيەڭدەگى ارپالىسپەن كۇرەسۋ, كەشىرە ءبىلۋ سياقتى عيبارتتى اڭگىمە ايتىلماق.
ء«بىزدىڭ تەاتردىڭ ەرەكشە شىعارماشىلىق ستاتۋسى بار. ءوزىمىزدى ەشقانداي اكادەميالىق شەڭبەرمەن شەكتەگەن ەمەسپىز. رەپەرتۋارىمىزدا ءارتۇرلى شىعارما بار. سوڭعى جىلدارى قازىرگى حورەوگرافيانىڭ شەدەۆرى سانالاتىن تالاي دۇنيەنى ساحنالاپ ۇلگەردىك. كەشە, ارعى كۇندەرى وتكەن قازىرگى روك-بالەت «Blind Forgiveness»-ءتى الماتىعا اكەلگەنىمىز دە سودان. الماتىلىقتار وتە جاقسى قابىلدادى», دەدى ۆالەري كۇزەمباەۆ.
مامىردىڭ 13 كۇنى كورەرمەندەر – قازىرگى زاماننىڭ ەڭ ايگىلى سكريپكا شەبەرلەرىنىڭ ءبىرى ەرجان ق ۇلىباەۆتىڭ سيمفونيالىق وركەسترىمەن قاۋىشادى. «جىل ماۋسىمىنداعى» انتونيو ۆيالديدىڭ كلاسسيكاسى مەن ارگەنتينالىق ماەسترو استور پياتستسوللانىڭ تسيكلىن ورىندايدى وندا. ەرجان ق ۇلىباەۆ زامانداستارىنا اتى ءماشھۇر سوليست, Washington Award پرەمياسىنىڭ لاۋرەاتى, حالىقارالىق بايقاۋلاردىڭ جەڭىمپازى, الەمنىڭ ەڭ ۇزدىك ساحنالارىندا ونەر كورسەتىپ, ەلىمىزدىڭ اتىن شىعارىپ جۇرگەن جەرلەسىمىز.
«الماتىعا گاسترولدىك ساپارمەن بارۋ – ۇلكەن جاۋاپكەرشىلىك. الماتىلىق كورەرمەننىڭ تالعامى قانداي ەكەنىن بىلەمىز. سوندىقتان وسىندا كەلەردە, ءبىز باعدارلامانى قىزىقتى ەتىپ دايارلاۋعا تىرىسامىز. ەرجان ق ۇلىباەۆ قاتىساتىن سيمفونيالىق وركەستردىڭ باعدارلاماسىنا كەلسەك, ەرجان بۇكىل الەم بىلەتىن دارىندى سكريپكا شەبەرى. ول وتە قىزىقتى باعدارلاما الىپ كەلدى وسى جولى. وندا پياتستسوللانىڭ دا, ۆيۆالديدىڭ دا مۋزىكاسى بار. كورەرمەن جالىقپاس دەپ ويلايمىن», دەدى «استانا بالەت» تەاترىنىڭ كوركەمدىك جەتەكشىسى نۇرلان قانەتوۆ.
سونىمەن ەلوردا ارتيستەرى مامىر ايىنىڭ 15-16 ارالىعىندا, تەاتر يۋريا گريگوروۆيچتىڭ حورەوگرافياسىنداعى «ماحاببات تۋرالى اڭىز» دەيتىن اتىشۋلى قويىلىمىن ۇسىنباق. ارپالىسقان سەزىم مەن تەرەڭ ويدان تۇراتىن بۇل سپەكتاكل بالەت ونەرىن جاڭا ساتىعا كوتەرگەن. نازىم حيكمەتتىڭ پالساپالىق پەساسىن نەگىزگى العان سپەكتاكلدىڭ مۋزىكاسىن اريف مەليكوۆ جازىپ, ۆيزۋالدىق ەستەتيكا جاعىن سيمون ۆيرسالادزە وڭدەپ شىعىپتى.
حورەوگرافيا ونەرىمەن قازاق مادەنيەتىن ناسيحاتتاپ جۇرگەن قازاقستاننىڭ ونەر قايراتكەرى ايگۇل ءتاتيدىڭ « ۇلى دالانىڭ مۇراسى» دەگەن قويىلىمى مامىردىڭ 18 كۇنى وسى گاسترولدىك ساپاردىڭ سوڭعى نۇكتەسىن قويادى. ەتنوگرافيالىق وبرازدار, قازاقتىڭ بىرەگەي مادەنيەتى مەن بالەت ونەرىنىڭ ەرەكشە قولتاڭباسى ۇشتاسقان وسى سپەكتاكل «استانا بالەت» تەاترىنىڭ ەڭ ۇزدىك ءونىمى سانالادى.
قر مادەنيەت جانە اقپارات مينيسترلىگىنىڭ قولداۋىمەن وتەتىن بۇل گاسترول ونەردى قادىر تۇتاتىندارعا, ۇلتىمىزدىڭ بالەت ونەرىن باعالايتىندارعا توسىن سىي بولماق.