پرەزيدەنتتىڭ جانىنداعى ۇلتتىق كوميسسيانىڭ قولداۋىمەن مامىر ايىنىڭ 12-16 ارالىعىندا قازاقستاندا رەسپۋبليكالىق رەپرودۋكتيۆتى دەنساۋلىق اپتاسى وتپەك. بۇل باستاماعا الماتى دا قوسىلدى. بۇگىن وڭىرلىك كوممۋنيكاتسيالار قىزمەتىندە الماتى ءماسليحاتىنىڭ دەپۋتاتى, اكىمنىڭ گەندەرلىك ماسەلە جونىندەگى شتاتتان تىس كەڭەسشىسى ايگۇل شالباەۆا الماتى بۇل اكتسيانى قولداپ قانا قويماي, ۇلكەن ءىس-شارالار دا وتكىزەتىنىن اتاپ ايتتى, دەپ حابارلايدى Egemen.kz.
«قازىر مەكتەپتەردە, كوللەدجدەر مەن وقۋ ورىندارىندا ءارتۇرلى كەزدەسۋ مەن اشىق ەسىك كۇندەرى ءوتىپ, دارىگەرلەر قاراپ, لەكتسيالار ءوتىپ, جاسوسپىرىمدەرمەن, ولاردىڭ اتا-اناسىمەن, مۇعالىمدەرمەن سويلەسىپ جاتىرمىز. بۇل قۇلاقتاندىرۋ جۇمىسى عانا ەمەس, دەنساۋلىققا جاۋاپتى قاراۋعا شاقىرىپ, وسىعان قوعامنىڭ نازارىن اۋدارماقپىز», دەيدى ايگۇل شالباەۆا.
ەكسپەرتتەر مۇنداي ءىس-شارانى وتكىزۋدىڭ پايداسى كوپ ەكەنىنە توقتالدى. زەرتتەۋلەرگە جۇگىنسەك, ايتۆ تۋرالى جاسوسپىرىمدەردىڭ 9 پايىزى عانا تولىق بىلسە, اركىمنىڭ ايتقانىنا سەنىپ, اداسىپ جۇرگەن 60 پايىزى ودان قالاي ساقتانىپ, جۇكتىلىكتەن قالاي قورعانۋ كەرەكتىگىن مۇلدەم بىلمەيدى.
ء«بىز وسىنى اشىق ايتىپ, قوعامنىڭ كوزىن اشقىمىز كەلەدى. بۇل جۇمىسقا مامانداردى, دارىگەرلەردى, جۇرگىزۋشىلەردى, ەرىكتىلەردى, باق وكىلدەرى مەن اتا-انالاردى دا تارتىپ جاتىرمىز. چات-بوتتار, تسيفرلىق رەسۋرستار ارقىلى, حالىقپەن بەتپە-بەت كەزدەسىپ, باق ارقىلى دا وسىنى جان-جاقتى ءتۇسىندىرۋدى قولعا الدىق», دەدى دەپۋتات. جاستار دەنساۋلىعى ورتالىقتارىندا اشىق ءىس-شارالار, لەكتسيالار ءوتىپ, جاسوسپىرىمدەرمەن اڭگىمەلەسىپ, ولارعا وسى جۇكتىلىك جاسى, پسيحيكالىق كوڭىل-كۇيى تۋرالى جان-جاقتى اقپارات بەرىلەدى. بۇگىندە قالادا تەراپەۆت, گينەكولوگ, ۋرولوگ, دەرماتولوگ, الەۋمەتتىك قىزمەتكەر, زاڭگەر سياقتى 128 مامانى بار وسىنداي 14 ورتالىق جۇمىس ىستەپ جاتىر. «ورتالىقتار «4-د» نەگىزدەمەسىمەن جۇمىس ىستەيدى. ياعني, بارىنشا اشىق بولىپ, ءبىر-بىرىنە دەگەن سەنىم قالىپتاسادى. بۇل – ءمامس اياسىندا تەگىن قىزمەت كورسەتۋ, سىر اقتارىپ, جاستاردى مازالاعان ماسەلە تۋرالى وي ءبولىسىپ, سۇقباتتاسۋ دەگەن ءسوز», دەيدى, الماتىنىڭ قوعامدىق دەنساۋلىق باسقارماسىنىڭ جدو-نى دامىتۋ جونىندەگى ۇيلەستىرۋشىسى دينا قۇسايىنوۆا.
جاستار دەنساۋلىعى ورتالىعىندا مىناداي قىزمەت كورسەتىلەدى: - كونتراتسەپتسيا, وتباسىن جوسپارلاۋ, ايتۆ, جججي تۋرالى كەڭەس بەرەدى;- جۇقپالى اۋرۋدى انىقتاپ, ونى ەمدەۋدى; - زورلىققا ۇشىراعاندارعا قولداۋ كورسەتۋدى; - ادامنىڭ كوڭى-كۇيىنە قاراي كەڭەس بەرىپ, الەۋمەتتىك بەيىمدەۋدى; - زاڭگەردىڭ كومەگى; - اۋرۋدىڭ الدىن الۋ, لەكتسيالار مەن ترەنينگتەر وتكىزۋ, ونىڭ ىشىندە ءسوس بايلانىستى ماسەلەلەر دە بار.
جاستار دەنساۋلىعى ورتالىعىندا ارت-تەراپيانىڭ, وزىنە قول جۇمساۋعا بەيىم تۇراتىن ادامدارعا قول ۇشىن بەرەتىندەردىڭ, جۇكتىلەرگە ترەنينگ جاسايتىندار مەن كوپشىلىككە كەڭەس بەرەتىن پسيحولوگتاردىڭ ورنى ەرەكشە. «ورتالىقتا بۇدان بولەك 4-ءشى بۋىنداعى جاڭا تەست-جولاقپەن ايتۆ-عا دا تەست تاپسىرادى. تەستىلەۋ ءۇش كەزەڭنەن تۇرادى. ولار – باسىندا, ءىس-شارادان كەيىن, سوسىن سپيد ورتالىعىنا جىبەرگەندە», دەيدى دينا قۇسايىنوۆا. جاستار جاعى ناقتى ءبىر ەمحاناعا بەكىتىلمەي-اق, ورتالىققا كەلىپ قارالا بەرسە بولادى. ءبارىن قۇپيا ۇستاعىسى كەلگەندەردىڭ جەكە باسى تۋرالى مالىمەتتەر ەش جەردە جاريالانبايدى.