12 مامىر كۇنى قازاقستان جانە الەمنىڭ 141 ەلى مەيىرگەرلەردىڭ كاسىبي مەرەكەسىن اتاپ وتەدى. ناۋقاستىڭ الدىنان الدىمەن شىعاتىن مەيىرگەرلەر ءومىر مەن ءولىم اراسىنداعى نازىك شەپتە قىزمەتىن اتقارادى. تاۋلىكتىك اۋىسىمداردا ەمىمەن دەم بەرىپ, قولداۋىمەن ناۋقاستىڭ ءحالىن جاقسارتۋدا جان ايامايتىنداردىڭ ەڭبەگىن تەك ماماندىق قالىبىندا مولشەرلەۋ ولشەمگە سىيمايدى, بۇل ەڭبەك ادامدىق سەزىممەن استاسىپ جاتادى, دەپ جازادى Egemen.kz.
قازاقستاندا مەيىرگەرلەردى 94 مەديتسينالىق كوللەدج دايارلايدى, ونىڭ ىشىندە 22-ءسى – مەملەكەتتىك, 72-ءسى – جەكەمەنشىك. ولاردىڭ 39-ى – جوعارى مەديتسينالىق كوللەدج مارتەبەسىنە يە.
بۇگىندە ەلىمىزدىڭ دەنساۋلىق ساقتاۋ جۇيەسىندە 190 مىڭنان استام ورتا بۋىن مەديتسينا قىزمەتكەرى جۇمىس ىستەيدى. 146 مىڭنان استامى – مەيىرگەر. ال اۋىلدىق جەرلەردە شامامەن 55 مىڭ مامان تەر توگىپ ءجۇر. ولاردىڭ اراسىندا 33 جىلدان بەرى مەيىرگەرلىك مىندەتىن اتقارىپ جۇرگەن ءاليا تۋلەكوۆا مەن 8 جىلدان بەرى مەديتسينا مايدانىندا مەيىرگەر اتانعان بانۋ ءتاجىباي دا بار.
كاسىبي مەرەكەگە وراي جۇرەك قالاۋى مەن بالالىق ارمانىن ادام ءومىرىن اراشالاۋمەن ۇشتاستىرعان ميسسيا يەلەرىنىڭ جۇمىس مازمۇنىمەن تانىستىق.
ءاليا تۋلەكوۆا بۇگىندە استانا قالالىق №8 ەمحانادا قىزمەت ەتەدى. الياعا جۇكتەلگەن 42-ايماقتا 1793 ادام تىركەلگەن. ول كۇن سايىن ونداعان تىركەلۋشىنىڭ مەديتسينالىق دەرەكتەرىمەن جۇمىس ىستەپ, جوسپارلى شاقىرتۋ, سالا ماماندارىنا جولداما بەرۋ سىندى ىستەردى اتقارادى.
ء«بىزدىڭ ايماقتا تىركەلگەن حالىق سانى كوپ. سوعان ساي اتقارىلار شارۋا دا ارتا تۇسەدى. قازىر مەديتسينا سالاسى تسيفرلانىپ, جەتىلىپ جاتىر. دەسە دە مەيىرگەرلەر جۇكتەمەسى جەتكىلىكتى. ماسەلەن, دارىگەردىڭ كەلۋشىلەردى قابىلداۋىنا 5 ساعات بەرىلسە, سول ۋاقىتتا 15 ادام ءبىزدىڭ الدىمىزدان دا وتەدى. بۇل كورسەتكىشتەن تىس اۋىرىپ شۇعىل مەديتسينالىق كومەككە مۇقتاجدار مەن جوسپارلى ەكپە الۋشىلار دا بار. سونىمەن قاتار وتا مەرزىمى بەلگىلى ناۋقاستاردىڭ الدىن الا اناليزدەرى مەن مامان كەڭەسىن الۋ سىندى جۇمىستارىن ۇيلەستىرەمىز», دەگەن مەيىرگەر ەمحانادا قابىلداۋدان بولەك جاڭا تۋعان نارەستەلەر مەن مەديتسينا مەكەمەسىنە جەتۋى قيىن سوعاتىن ناۋقاستاردىڭ ۇيىنە دارىگەرمەن بىرگە كومەككە جەتەدى.
«كۇندەلىكتى ەمحانادا كەلۋشىلەردى 5 ساعات قابىلدايمىز. ودان بولەك جوسپارلى تۇردە ايماعىمىزداعى ۇيلەردى ارالاپ, كاسىبي كەڭەس بەرىپ, ەم-دوم جۇرگىزەمىز. مەن 1989 – 1992 جىلدار ارالىعىندا تسەلينوگراد تەمىر جول مەديتسينا ۋچيليششەسىندە ءبىلىم الدىم. سول جىلدارى, شىنىندا دا ءومىرىمدى وسى سالامەن بايلانىستىراتىنىمدى جەتە تۇسىنگەم. سوندىقتان كۇندەلىكتى جۇمىس بارىسىنداعى قيىندىقتار - مەن ءۇشىن ەڭبەگىمنىڭ ءبىر بولشەگى. باستى نازارىمدى كەدەرگىلەرگە ەمەس, جۇمىسىم بەرەتىن مۇمكىندىكتەرگە قويامىن», دەيدى ءاليا اقجانقىزى.
كەلەسى كەيىپكەرىمىز بانۋ ءتاجىباي الماتى قالاسىنداعى №2 بالالار اۋرۋحاناسىنداعى قابىلداۋ بولىمىندە قىزمەت اتقارادى. بانۋ كاسىبي مىندەتىنىڭ اياسىندا كۇنىنە شامامەن 300-400 بالانىڭ ساۋىعۋىنا ارىپتەستەرىمەن بىرگە كۇش بىرىكتىرەدى. بالا ارمانى جەتەلەگەن ماماندىعىنا ماحاباتى دا ايرىقشا.
ء«ار مەديتسينا مەكەمەسىنىڭ قابىلداۋ ءبولىمى تىنىمسىز تىرشىلىك ەتەدى. مەن قىزمەت اتقاراتىن №2 بالالار اۋرۋحاناسى ەلىمىزدەگى ءىرى المالى شاھار بالالارىنىڭ اماندىعى جولىندا ەڭبەكتەنەدى. سوندىقتان مەديتسينالىق كومەككە قول سوزۋشىلار دا كوپ. ەسكەرەتىنى, ءبىزدىڭ اۋرۋحاناعا بالالار پنەۆمونيا, تراۆموتولوگيالىق, كارديولوگيالىق, اللەرگيالىق اۋرۋلارمان قاتار, قانت ديابەتى, ۆيرۋستىق اۋرۋلارمەن دە جۇگىنىپ جاتادى. قابىلداۋ ءبولىمى ناۋقاستارعا العاشقى كومەك كورسەتەدى. دارىگەرلەردىڭ تاعايىنداۋىمەن ەم-شارانى جالعاستىرامىز. ناۋقاستاردىڭ اياقتان تۇرۋى ءارى قارايعى تىنىسى وسى قابالداۋ ءبولىمىنىڭ جەدەل كومەگىنە بايلانىستى بولعاندىقتان بارلىق جاعدايعا دەر كەزىندە دەن قويامىز. ماسەلەن, دەمىكپەمەن تۇسكەن بالانى دەرەۋ كيسلورود اپپاراتىنا قوسساق, اللەرگيا بويىنشا كەلگەن كىشكەنتاي ناۋقاسقا ينەكتسيانى جەدەل سالامىز. قاجەتتى اناليزدەردى الامىز. كۇندەلىكتى كەلۋشىلەردىڭ 70-80-ءى اۋرۋحاناعا جاتقىزىلادى. وسىدان-اق, قابىلداۋ ءبولىمىنىڭ قانشالىقتى قيىن جاعدايداعى بالالاردىڭ وڭالۋىنا ۇلەس قوساتىنىن اڭعارۋعا بولادى», دەيدى مەيىرگەر مامان. ول اۋرۋحاناداعى تاۋلىكتىك كەزەكشىلىككە تۇسكەن كەزدەردە جۇمىستىڭ قاربالاسىمەن ۋاقىتتىڭ قالاي وتكەنىن بايقاماي قالاتىنىن دا اتاپ ءوتتى.
«كەزەكشىلىگىمىز كۇن-تۇنگە بولىنبەيدى. سوندىقتان ءبىر كۇندىك جۇمىس ۋاقىتىمىز – 24 ساعات. جۇرەكپەن تاڭدالعان جۇمىستىڭ اۋىرلىعى سەزىلمەيدى. ءبىزدىڭ باستى تىلەگىمىز بالالاردىڭ اماندىعى, اۋرۋحانادان تاي-ق ۇلىنداي ويناپ, ساۋ شىعۋى», دەدى بانۋ ءتاجىباي.
قازاقستان حالقىنىڭ ساۋلىعى كۇندەلىكتى وسى سالادا تەر توگەتىن مەيىرگەر مامانداردىڭ قولىندا. سوندىقتان سالا مينيسترلىگى مەيىرگەرلەر مارتەبەسى مەن قىزمەتىن جۇيەلۋگە نازار اۋدارىپ كەلەدى. دەنساۋلىق ساقتاۋ مينيسترلىگى كەيىنگى جىلدارى ەلىمىزدىڭ دەنساۋلىق ساقتاۋ جۇيەسىندە مەيىرگەرلەردىڭ ءرولى ەداۋىر ارتقانىنا نازارىمىزدى اۋداردى. قىزمەت اياسىن كەڭەيتۋ جانە وكىلەتتىكتەردى بەرۋ ارقىلى مەيىرگەرلەر مەديتسينالىق كومەكتى كوماندالىق ۇلگىدە كورسەتۋ جۇيەسىنىڭ اجىراماس بولىگىنە اينالعان. بۇل ءوز كەزەگىندە دارىگەرلەردىڭ جۇكتەمەسىن ازايتىپ, پاتسيەنتتەر اعىنىن ءتيىمدى ۇيلەستىرۋگە, سونداي-اق مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋعا تىڭ مۇمكىندىك بەرگەن.