وقيعا اتىراۋ قالاسىنا قاراستى ەركىنقالا اۋىلىندا ورىن العان. بىرنەشە ءجاسوسپىرىمنىڭ ەكى بالاعا شابۋىل جاساۋى قوعامدا الاڭداۋشىلىق تۋدىردى, دەپ حابارلايدى Egemen.kz.
زارداپ شەككەن وقۋشىنىڭ اناسىنىڭ ايتۋىنشا, شابۋىلعا كەمىندە سەگىز ءجاسوسپىرىم قاتىسقان. ولاردىڭ ءبىرى — قۇقىق قورعاۋ ورگانىنىڭ قىزمەتكەرىنىڭ ۇلى.
« ۇلىمنىڭ دەنەسى تۇگەل كوگەرگەن, قان كەتىپ جاتىر, ول قاتتى پسيحولوگيالىق كۇيزەلىستە. بالالاردى «ەگەر بۇل تۋرالى بىرەۋگە ايتساڭدار, تاعى دا ۇرامىز» دەپ قورقىتقان. مەن ءۇنسىز قالا المايمىن. ۇلىم ءۇشىن قورقامىن, بىراق وزگەلەردىڭ بالالارى دا زارداپ شەگىپ كەتە مە دەپ تىپتەن قاتتى الاڭدايمىن», دەدى جابىرلەنۋشى بالانىڭ اناسى.
وتباسى وقيعا بويىنشا پوليتسياعا ارىز تۇسىرگەنىمەن, ءىستىڭ ءادىل تەرگەلەتىنىنە كۇمانمەن قاراپ وتىر. وسىعان بايلانىستى اتا-انالار وقۋ-اعارتۋ مينيسترلىگى مەن قۇقىق قورعاۋ ورگاندارىنان وقيعانى مۇقيات باقىلاۋعا الۋدى جانە ءىستىڭ جابۋلى كۇيدە قالماۋىن تالاپ ەتۋدە.
اتىراۋ وبلىستىق پوليتسيا دەپارتامەنتىنە جولداعان ساۋالىمىزعا بەرىلگەن جاۋاپتا قازىرگى ۋاقىتتا كۇدىكتى جاسوسپىرىمدەردىڭ بارلىعى انىقتالىپ, بولىمشەگە جەتكىزىلگەنى ايتىلعان. ولاردىڭ كامەلەتكە تولماعاندىعىنا بايلانىستى زاڭدى وكىلدەرىنىڭ قاتىسۋىمەن جاۋاپ الۋ جوسپارلانعان.
«اتالعان دەرەك بويىنشا قىلمىستىق ءىس تىركەلىپ, جان-جاقتى تەرگەۋ امالدارى جۇرگىزىلىپ جاتىر. وقيعانىڭ تولىق ءمان-جايى انىقتالۋ ۇستىندە. تەرگەۋ مۇددەسىنە سايكەس وزگە اقپارات جاريالاۋعا جاتپايدى. قۇقىق بۇزۋشىلىق جاساعان جاسوسپىرىمدەر ىشكى ىستەر ورگاندارىنىڭ ارنايى ەسەبىنە الىنىپ, ماتەريالدار كامەلەتكە تولماعاندار ءىسى جونىندەگى كوميسسياعا جولداناتىن بولادى», دەپ جاۋاپ بەردى پوليتسيا دەپارتامەنتى.