جۇمىسشى ماماندىقتار جىلى اياسىندا تۇركىتىلدەس ەلدەر اراسىنداعى تۇڭعىش TurkicSkills كاسىبي شەبەرلىك چەمپيوناتى وسى جىلدىڭ كۇزىندە وتەدى, دەپ جازادى Egemen.kz.
چەمپيوناتقا 16 مەن 22 جاس ارالىعىنداعى 100-دەن استام جاس مامان مەن 80-گە جۋىق جوعارى بىلىكتى ساراپشى قاتىسادى دەپ جوسپارلانىپ وتىر. TurkicSkills-2025-كە تۇركيا, ازەربايجان, ماجارستان, وزبەكستان, قىرعىزستان, تۇرىكمەنستان جانە موڭعوليانىڭ جۇمىسشى ماماندارى قاتىسادى.
وقۋ- اعارتۋ مينيسترلىگىنىڭ مالىمەتىنشە, جارىس اقپاراتتىق تەحنولوگيالار, قۇرىلىس جانە قۇرىلىس تەحنولوگيالارى, وندىرىستىك جانە ينجەنەرلىك تەحنولوگيالار, الەۋمەتتىك جانە جەكە قىزمەتتەر سىندى 15 نەگىزگى قۇزىرەتتىلىكتى قامتيدى. ءموبيلدى روبوتوتەحنيكا جانە ۇشقىشسىز ۇشۋ اپپاراتتارىن (درونداردى) باسقارۋ سياقتى بولاشاعى زور باعىتتارعا ەرەكشە كوڭىل بولىنەدى.
چەمپيوناتتى قازاقستان رەسپۋبليكاسى وقۋ-اعارتۋ مينيسترلىگى ۇيىمداستىرادى. جوبانى قر وم جانىنداعى «Talap» كەاق جانە ماڭعىستاۋ وبلىسىنىڭ اكىمدىگى جۇزەگە اسىرادى.
ايتا كەتەيىك, بۇل – جۇمىسشى ماماندىقتارىنىڭ بەدەلىن ارتتىرۋعا, كاسىبي كەڭىستىك قۇرۋعا جانە تۇركىتىلدەس ەلدەردىڭ جاس ماماندارى اراسىندا تاجىريبە الماسۋدى ىنتالاندىرۋعا باعىتتالعان اۋقىمدى باستاما. چەمپيونات جاستاردىڭ الەۋەتىن اشۋعا, زاماناۋي تەحنولوگيالاردى ىلگەرىلەتۋگە جانە ۋاقىت تالابىنا ساي بىلىكتى جاڭا بۋىن كادرلارىن دايارلاۋعا ارنالعان ماڭىزدى الاڭ بولماق.