الماتى قالاسىندا مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان «تازا قازاقستان» باعدارلاماسى اياسىندا كوگالداندىرۋ جانە اباتتاندىرۋ جۇمىستارى قارقىندى جۇرگىزىلۋدە. بۇل تۋرالى الماتى قالاسىنىڭ اكىمى ەربولات دوساەۆتىڭ 2025 جىلعى 1-30 ءساۋىر ارالىعىنداعى قر پرەزيدەنتى قاسىم-جومارت توقاەۆتىڭ تاپسىرمالارىن ورىنداۋ جونىندەگى ەسەبىندە ايتىلدى, دەپ حابارلايدى Egemen.kz.
ناۋرىز-ءساۋىر ايلارىندا قالادا بيىكتىگى 6 مەتردەن اساتىن 2 مىڭنان استام ءىرى اعاش وتىرعىزىلعان. بۇل كوشەتتەر گەرمانيا (ليپا), تۇركيا (كۇل, قاراعاش, ۇيەڭكى) جانە رەسەي (شىرشا, قاراعاي) ەلدەرىنەن ارنايى جەتكىزىلگەن. سونىمەن قاتار, وتەمدىك ەكپەلەر شەڭبەرىندە بيىكتىگى 2,5 مەتردەن اساتىن 15 مىڭ كوشەت وتىرعىزىلدى.
قالادا اباتتاندىرۋ جۇمىستارى اياسىندا دوستىق داڭعىلى مەن پۋشكين كوشەسى «قاسبەتتەن قاسبەتكە دەيىن» قاعيداتى بويىنشا تولىق اباتتاندىرىلادى. بۇل جوبا الماتىدا العاش رەت جۇزەگە اسىپ وتىر. قۇرىلىس جۇمىستارىن جۇرگىزەتىن مەردىگەر ۇيىمدى انىقتاۋ ءۇشىن كونكۋرستىق راسىمدەر 30 ساۋىردە باستالىپ, 2025 جىلدىڭ قاراشاسىندا اياقتالادى دەپ جوسپارلانعان.
سونداي-اق ءساۋىر ايىندا ۇزىندىعى 33,6 شاقىرىم بولاتىن 16 كوشە ۋچاسكەسىندە كەشەندى اباتتاندىرۋ جۇمىستارى اياقتالعان. اۋلالاردى جاڭارتۋ جۇمىستارى دا قولعا الىنىپ, 1 ساۋىردەن باستاپ باستالعان جوبا بويىنشا جىل سوڭىنا دەيىن جوسپارلانعان 470 اۋلانىڭ 426-سىن اباتتاندىرۋ كوزدەلگەن.
جالپى الماتىدا 4 316 اۋلا بار, ونىڭ ىشىندە سوڭعى ءۇش جىل ىشىندە 1 176 اۋلا رەتكە كەلتىرىلگەن. بۇل جۇمىستار قالانىڭ ەكولوگيالىق جاعدايىن جاقسارتۋعا جانە تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان.