مەملەكەت باسشىسى قاسىم-جومارت توقاەۆ 7 مامىر – ۇلى جەڭىستىڭ 80 جىلدىعىنا وراي قازاقستاندىقتاردى قۇتتىقتاپ, حالقىمىزدىڭ ەكىنشى دۇنيەجۇزىلىك سوعىس جىلدارىنداعى جانقيار ەرلىگى مەن ەڭبەگىن جوعارى باعالادى, دەپ حابارلايدى Egemen.kz.
پرەزيدەنتتىڭ ايتۋىنشا, سوعىس جىلدارىندا قازاقستاننان مايدانعا 1 ميلليون 200 مىڭنان استام ادام اتتانعان. ولاردىڭ جارتىسى ۇرىس دالاسىندا ەرلىكپەن قازا تاپتى.
«كەلەر ۇرپاقتىڭ جارقىن ءارى بەيبىت كەلەشەگى ءۇشىن ءوز ومىرلەرىن قۇرباندىققا شالدى. داڭقتى ۇل-قىزدارىمىز ەرلىكتىڭ وزىق ۇلگىسىن كورسەتتى. قازاقتىڭ جاۋجۇرەك ۇلت ەكەنىن پاش ەتتى», دەدى مەملەكەت باسشىسى.
ۇلى وتان سوعىسىندا 500-دەن استام قازاقستاندىق كەڭەس وداعىنىڭ باتىرى اتاندى. ولاردىڭ قاتارىندا تالعات بيگەلدينوۆ, باۋىرجان مومىش ۇلى, مانشۇك مامەتوۆا, ءاليا مولداعۇلوۆا, راقىمجان قوشقارباەۆ, حيۋاز دوسپانوۆا سەكىلدى ەسىمدەرى ەل جادىندا ماڭگى قالعان ەرلەر مەن ەرجۇرەك ارۋلار بار.
سونىمەن قاتار, تىل ەڭبەككەرلەرىنىڭ جانكەشتى ەڭبەگى دە ەرەكشە اتالىپ ءوتتى. سوعىس جىلدارى قازاقستاننان مايدانعا ءبىر جارىم مىڭ ۆاگون كيىم-كەشەك پەن ازىق-ت ۇلىك جونەلتىلىپ, جۇزدەگەن زاۋىت پەن فابريكا كوشىرىلىپ, مايدانعا قاجەتتى ءونىم شىعاراتىن ءوندىرىس ورىندارى قىسقا مەرزىمدە ىسكە قوسىلدى.
«جۇرتىمىز جۇدىرىقتاي جۇمىلىپ, كۇنى-ءتۇنى جۇمىس ىستەپ, قارۋ-جاراق پەن وق-ءدارى دايىندادى, اسكەري كيىم تىكتى. سوعىستاعى ون وقتىڭ توعىزى قازاقستاندا جاسالدى. ۇلى جەڭىستى ۇلىقتاۋ دەگەنىمىز, بۇل – ەڭ الدىمەن, ەرجۇرەك باتىرلارىمىزدى جادىمىزدا ماڭگى ساقتاۋ دەگەن ءسوز. ولاردىڭ ەرلىگى مەن ەڭبەگىن جاس ۇرپاق ءبىلىپ وسۋگە ءتيىس», دەدى مەملەكەت باسشىسى.