7 مامىر – وتان قورعاۋشىلار كۇنىنە وراي شىمكەنتەگى «قىزعالداق سارايىندا» وتكەن «ەگەمەن ەلدىڭ قورعانى» اتتى مەرەكەلىك كونتسەرت تۋ كوتەرۋ راسىمىمەن باستالدى. ەلىمىزدىڭ ءانۇرانى شىرقالىپ, پاتريوتتىق اندەر ورىندالدى, دەپ حابارلايدى Egemen.kz.
حالىقارالىق بايقاۋلاردىڭ جۇلدەگەرى «قازىنا» بي ءانسامبلى «دالا ساربازدارى» جاۋىنگەرلىك ءبيىن بيلەدى. وپەرا جانە بالەت تەاترىنىڭ سوليستەرى تۋعان جەر وتان انا تۋرالى ءان شىرقاپ كەش مازمۇنىن اشا ءتۇستى. مەكتەپ وقۋشىلارىنان قۇرالعان حور الەمدە سوعىس بولماسىن دەگەن رەپەرتۋاردا ءان سالىپ كورەرمەننىڭ ىستىق ىقىلاسىنا بولەندى.
ودان بولەك ەلىمىزدىڭ ەستاراداسىندا ونەرىمەن تانىمال بوپ جۇرگەن ارتىستەر دە ساحنا كوركىن قىزدىردى. ولاردىڭ اراسىندا ءانشى ايگەرىم قالاۋباەۆا مەن پاتريوتتىق اندەرىمەن تانىمال «الاش ۇلى» توبى جانە «ابىروي» انسامبلى ونەر كورسەتتى. قالا اكىمىنىڭ ورىنباسارى سارسەن قۇرانبەك مەرەكەلىك كەشتە ساحنا تورىنەن تابىلىپ, اسكەري, قۇقىق قورعاۋ سالاسىندا تەر توگىپ جۇرگەن ءبىر توپ ازاماتتى قالا اكىمىنىڭ العىس حاتىمەن ماراپاتتادى.
سولاردىڭ قاتارىندا شىمكەنت قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ اسا ماڭىزدى ىستەر جونىندەگى جەدەل ۋاكىلى ساپارعالي بايبوتاەۆ تا بار.
«7 مامىر – وتان قورعاۋشىلار كۇنىمەن قالامىزدىڭ تۇرعىندارى مەن قوناقتارىن شىن جۇرەكتەن قۇتتىقتايمىن. اسپانىمىز اشىق, ءومىرىمىز تىنىش بولسىن. وتباسىمىز امان بولسىن. قالا اكىمىنىڭ اتىنان العىس حات الىپ وتىرمىن. بۇل دا ەڭبەكتىڭ ەسكەرىلۋى شىعار. سول ءۇشىن مەرەكەنى ۇيىمداستارعان بارشا ازاماتتارعا شىن جۇرەكتەن العىس ايتامىن» دەدى س.بايبوتاەۆ.
ماراپات يەسىنىڭ قۇقىق قورعاۋ سالاسىنداعى ەڭبەك ءوتىلى جيىرما جىلدان اسقان. سونىڭ ءۇش جىلى ەكونوميكالىق قىلمىستاردى تەرگەپ-تەكسەرۋ قىزمەتىندە ءوتىپ جاتىر. ماماننىڭ ايتۋىنشا بۇل قىزمەتتىڭ مىندەتى مەملەكەت قارجىسىن تالان-تاراجعا تۇسىرمەۋ, ونى قاداعالاۋ. ەكونوميكالىق قىلمىستارمەن كۇرەس سونىسىمەن قيىن ءارى جاۋاپكەرشىلىگى جوعارى قىزمەت بوپ سانالادى.
مەرەكەلىك كەشتە «قىزعالداق سارايىنىڭ» كىرەبەرىس زالىندا قارۋ-جاراق كورمەسى ءوتتى. ونى ۇيىمداستىرعان ارنايى ماقساتتاعى وپەراتسيا قىزمەتى. ول 2022 جىلى قاڭتار وقيعاسىنان كەيىن پرەزيدەنت تاپسىرماسىمەن قۇرىلعان بولاتىن. ارنايى جاساق جاۋىنگەرىنىڭ ايتۋىنشا كورمەگە يزرايل, تۇركيا, امەريكا قۇراما شتاتتارىنىڭ وزىق ۇلگىدەگى ءارتۇرلى كاليبردەگى اتىس قارۋلارى قويىلدى. ولاردىڭ اراسىندا ماسەلەن يزرايلدىك GLX گرانامەتى, تۇركيالىق مر-5 شابۋىلداۋشى پيستولەت-اۆتوماتى, امەريكاندىق بارەت سنايپەر قارۋى, سونداي-اق تۇنگى-كۇندىزگى دالدەۋشى قۇرال اگوپ-پەن جابدىقتالعان اك-74 اۆتوماتى بار. ايتا كەتۋ كەرەك ارنايى ماقساتتاعى وپەراتسيا قىزمەتى ەلدىڭ تىنىشتىعىن كۇزەتۋ, لاڭكەستىكپەن كۇرەس ماقساتىندا قۇرىلعان جاساق توبى.
قالالىق مادەنيەت تىلدەردى دامىتۋ جانە ارحيۆتەر باسقارماسى باسشىسىنىڭ ورىنباسارى ءمولدىر وڭداسىنوۆانىڭ ايتۋىنشا 7 مامىر–وتان قورعاۋشىلار كۇنىندەگى ءىس-شارالار 9 مامىر–جەڭىستىڭ 80 جىلدىعى مەرەكەسى اياسىندا ۇيىمداستىرىلعان. سالا وكىلىنىڭ مالىمدەۋىنشە 80 جىلدىق مەيرام قارساڭىندا شىمكەنتتە كوزى ءتىرى 2 ۇوس ارداگەرى مەن تىل ارداگەرلەرى ماراپاتتالدى. سونىمەن بىرگە مادەنيەت باسقارماسى ارنايى كونتسەرتتىك باعدارلاما ازىرلەپ, استانا الاڭىندا مەرەكەلىك دۋماندى كەش وتكىزۋدى جوسپارلاپ وتىر. كونتسەرتتىك ءىس-شارادا وڭتۇستىكتەن تۇلەپ ۇشقان ەلىمىزدىڭ تانىمال ەسترادا جۇلدىزدارى ونەر كورسەتپەك.