كوكشەتاۋدا كەڭەس وداعىنىڭ باتىرى, اكادەميك, جازۋشى مالىك عابدۋلليننىڭ 110 جىلدىعى مەن باتىر اتىنداعى مۋزەيدىڭ 30 جىلدىعىنا جانە حالىقارالىق مۋزەيلەر كۇنىنە وراي تۇڭعىش رەت «ماڭگىلىك تۇلعالار» اتتى ءبىرىنشى رەسپۋبليكالىق تۇلعالىق مۋزەيلەر فەستيۆالى وتكىزىلدى.
شاحمەت قۇسايىنوۆ اتىنداعى اقمولا وبلىستىق قازاق مۋزىكالىق-دراما تەاترىندا مالىك عابدۋللين مۋزەيىنىڭ ۇيىتقى بولۋىمەن وتكىزىلگەن, رۋحاني رەڭى وزگەشە شارانىڭ نەگىزگى ماقساتى ەلىمىزدەگى تۇلعالىق مۋزەيلەردىڭ ءوزارا بايلانىسىن نىعايتۋ, ۇلى تۇلعالاردىڭ ءومىرى مەن شىعارماشىلىعىن, ۇلتقا سىڭىرگەن ەڭبەگىن ناسيحاتتاۋ. ءىس-شاراعا قوستاناي وبلىسىنداعى ىبىراي ءالتىنساريننىڭ, «جانگەلدين مۇراجايلار كەشەنى», احمەت بايتۇرسىن ۇلى مەن مىرجاقىپ دۋلات ۇلىنىڭ, الماتى وبلىسىنان جامبىل جاباەۆتىڭ, مۇقاعالي ماقاتاەۆتىڭ, اقتوبەدەن كەڭەس وداعىنىڭ باتىرى ءاليا مولداعۇلوۆانىڭ, اقمولا وبلىسىنداعى ءىلياس ەسەنبەرليننىڭ, سولتۇستىك قازاقستان وبلىسىنان ابىلاي حان رەزيدەنتسياسىنان ۇجىمدارى كەلدى.
–الاش ارداقتىلارىنىڭ ەسىمدەرىمەن اتالاتىن مۋزەيلەردەگى قۇندى جادىگەرلەر, تىڭ دەرەكتەردەن جاس تولقىن مول ماعلۇمات الىپ, كوكىرەگىندەگى تانىم كوكجيەگىن كەڭەيتەدى, – دەدى سالتاناتتى جيىندا وبلىس اكىمىنىڭ ورىنباسارى دوسۇلان ايتباەۆ.
فەستيۆال-بايقاۋدىڭ ەرەجەسىنە سايكەس العاشقى اينالىمدا ساحنالىق قويىلىم كورسەتىلىپ, تۇلعالاردىڭ وبرازى سومدالسا, ەكىنشى اينالىمدا ەر مالىكتىڭ ءومىرى مەن شىعارماشىلىعىنا قاتىستى سانالۋان سۇراقتارعا جاۋاپ بەردى. سوڭعى كەزەڭدە تۇلعالىق مۋزەيلەردە ساقتالعان ەڭ قۇندى جادىگەرلەردىڭ تاريحى باياندالدى. فەستيۆال اياسىندا وتكەن ءباسپاسوز ءماسليحاتىندا قالام ۇستاعان قاۋىم ەلىمىزدەگى مۋزەيلەردىڭ جۇمىسىنا, ونىڭ مەنەدجمەنتىنە, شالعايداعى شاعىن اۋىلدارعا جىلجىمالى كورمە اپارۋ جايى تۋرالى سۇراقتارىن قويدى. شىنتۋايتىندا كوپتەگەن مۋزەيلەر قالادا. قالا بالالارى رۋحاني ازىق الا الادى, ال, اۋىلداعى جەتكىنشەكتەر شە؟ مىنە, وسىنداي ماڭىزدى ماسەلەلەر كوتەرىلدى. ۇلتتىق بولمىس, ار-نامىس, ادامگەرشىلىك قاسيەتتەر انىق قىلاڭ بەرگەن وسىنداي رۋحاني الەمىمىزدى نۇرلاندىراتىن ادەمى مادەني وقيعالاردىڭ ءجيى بولعانى جاراسىمدى. ايتپەسە الەۋمەتتىك جەلىگە جانارى بايلانعان جۇرت ەلىمىزدىڭ وتكەنىن, ۇلت ءۇشىن قۇربان بولعان ەرلەردىڭ قايراتكەرلىگىن بىلە الا ما؟ وسى جولعى كەشتە مول ماعلۇمات ايتىلدى.
قازىلار القاسىنىڭ شەشىمىمەن الماتى وبلىسىنىڭ م.تىنىشباەۆ اتىنداعى تاريحي-ولكەتانۋ مۋزەيىنىڭ فيليالى, جامبىل جاباەۆتىڭ ادەبي-مەموريالدى مۋزەيى ءبىرىنشى ورىنعا يە بولسا, اقتوبەدەن كەلگەن ءاليا مولداعۇلوۆا اتىنداعى وبلىستىق مۋزەي ۇجىمى ەكىنشى ورىنعا يە بولدى. قوستاناي وبلىسىنداعى «جانگەلدين مۇراجايلار كەشەنىنە» قاراستى احمەت بايتۇرسىن ۇلى مەن مىرجاقىپ دۋلات ۇلىنىڭ مۋزەيى ءۇشىنشى ورىنعا لايىق دەپ تانىلدى. فەستيۆالگە قاتىسۋشىلاردىڭ بارلىعىنا ىنتالاندىرۋ سىيلىقتارى تابىس ەتىلدى.
كوكشەدەگى كەنجەباي مۇقىشەۆ باسشىلىق ەتەتىن مالىك عابدۋللين اتىنداعى مۋزەي ۇجىمى مازمۇنى مول شارانى تەك قانا دەمەۋشىلەردىڭ كومەگىمەن ءساتتى وتكىزدى.
كوكشەتاۋ