وبلىستا 41 مىڭنان استام بالا ءۇشىن 31 جازعى ساۋىقتىرۋ لاگەرلەرى جاساقتالعان. جازعى دەمالىس تەك تىنىعۋ ەمەس, سونىمەن قاتار تۇلعالىق, شىعارماشىلىق جانە رۋحاني دامۋعا باعىتتالعان ماڭىزدى كەزەڭ بولماق, دەپ حابارلايدى Egemen.kz.
بيىل وڭىردە العاش رەت ءمودۋلدى لاگەر قولعا الىندى. وبلىستىڭ 5 اۋدانىنداعى جازعى ساۋىقتىرۋ لاگەرلەرىندە 54 مودۋلدىك جاتىن بولمە, 2 اسحانا, 4 اجەتحانا ورناتىلادى. وسىلايشا وڭىردەگى بالالار دەمالىسىن ۇيىمداستىرۋ ىسىندەگى باستى تۇيتكىل – ورىن تاپشىلىعى مەن سانيتارلىق تالاپتاردىڭ ساقتالماۋى ماسەلەلەرى شەشىمىن تاپپاق.
مودۋلدىك كونسترۋكتسيالار – زامان تالابىنا ساي, اسىرەسە, جازدا بالالاردى جىلدام ءارى ساپالى تۇردە جايعاستىرۋ ءۇشىن وتە قولايلى. «تولەبي نۇرى», «تاۋ شىڭى», «بالاۋسا», «تاۋ بارىسى» جانە «بالداۋرەن» لاگەرلەرىنە ورناتىلاتىن مودۋلدەر ءبىر اۋىسىمدا مىڭنان استام بالانى قابىلداۋعا مۇمكىندىك بەرەدى. جالپى جازعى ماۋسىمدا بۇل لاگەرلەردە 10 مىڭعا جۋىق بالا دەمالادى دەپ جوسپارلانىپ وتىر. قازىرگى تاڭدا جاتىن ورىندارمەن قاتار, سانيتارلىق توراپتار مەن اسحانالار دا دايىندالىپ جاتىر.
سونداي-اق, جازعى ساۋىقتىرۋ كەشەندەرىندە اعىمداعى جوندەۋ جۇمىستارى قارقىندى جۇرگىزىلۋدە. مىسالى, وڭىردەگى «سامال» جازعى ساۋىقتىرۋ لاگەرى 20 جىلدان بەرى العاش رەت كۇردەلى جوندەۋدەن ءوتتى. تەرەزەلەر مەن ەسىكتەر جاڭارتىلىپ, ىشكى اجەتحانالار ورناتىلىپ, عيماراتقا سىرلاۋ جانە اكتەۋ جۇمىستارى ۇيىمداستىرىلدى.