قارادالا وڭىرىندەگى شونجى اۋىلىندا قازاقتىڭ اقيىق اقىنى مۇقاعالي ماقاتاەۆ پەن ۇيعىر ەتنوسىنىڭ تالانتتى اقىنى يليا باحتياعا (مولوتوۆ) ارنالعان «ولەڭ مەن دوستىق – ەسكەرتكىشكە اينالعان رۋح» اتتى كومپوزيتسيالىق ەسكەرتكىشتىڭ سالتاناتتى اشىلۋ ءراسىمى ءوتتى.
شاراعا ۇيعىر اۋدانىنىڭ اكىمى بوتا ەلەۋسىزوۆا, الماتى وبلىسى مادەنيەت, ارحيۆتەر جانە قۇجاتتاما باسقارماسىنىڭ باسشىسى دانيار اليەۆ, مۇقاعالي ماقاتاەۆتىڭ ۇلى جۇلدىز ماقاتاەۆ پەن يليا مولوتوۆتىڭ تۋعان باۋىرى سۋنيات پالتۋشاەۆ, سونىمەن بىرگە الماتى وبلىسىنىڭ قۇرمەتتى ازاماتى, ارداگەر ىزعاربەك بەكتۇرسىنوۆ, اقىن, دراماتۋرگ باقىت بەدەلحان قاتىستى.
سالتاناتتى جيىندا ءسوز العان مەيماندار مۇقاعالي مەن يليانىڭ دوستىعىن, قوس اقىننىڭ پوەزيا مەن رۋحانيات جولىنداعى ۇلى ميسسياسىن ەرەكشە اتاپ ءوتتى. دوستىق پەن بىرلىكتى جانە رۋحاني ۇندەستىكتى ايقىنداعان مادەني شارادا ەسكەرتكىشتىڭ لەنتاسى قيىلىپ, گۇل شوقتارى قويىلدى.
بۇدان كەيىن قارادالا حالىق تەاترىنىڭ قاتىسۋىمەن «دوسىم, ساعان ايتامىن...» اتتى شاعىن پرولوگ قويىلىپ, مۇقاعالي مەن يليا بەينەلەرى كورەرمەننىڭ جۇرەگىن تەبىرەنتتى.
قوس اقىننىڭ اجىراماس دوستىعى تۋرالى از ايتىلماعان. ولار ماسكەۋدە بىرگە وقىپ, ودان كەيىنگى جىلداردا دا اينىماس دوسقا اينالعانى اقيقات. سول سەبەپتى, قوس اقىنعا قارادالا تورىنەن ەڭسەلى ەسكەرتكىش قويۋ كوپتەن بەرى كوتەرىلىپ كەلگەن. بۇل ەسكەرتكىش – پوەزياعا, ادال دوستىق پەن باۋىرلاستىققا قويىلعان تاعزىم, بولاشاق ۇرپاق ءۇشىن رۋحاني مۇرا سانالادى.
الماتى وبلىسى.