7 مامىر كۇنى استانادا ەكىنشى دۇنيەجۇزىلىك سوعىستاعى جەڭىستىڭ 80 جىلدىعى مەن وتان قورعاۋشى كۇنىنە ارنالعان اسكەري پاراد وتەدى. سالتاناتتى شارا ەلوردانىڭ باستى الاڭدارىنىڭ ءبىرى تاۋەلسىزدىك الاڭىندا ۇيىمداستىرىلادى, دەپ حابارلايدى Egemen.kz.
قر قورعانىس مينيسترلىگىنىڭ حابارلاۋىنشا, پارادقا 4000-نان استام اسكەري قىزمەتشى, 200-دەن استام زاماناۋي اسكەري تەحنيكا, سونداي-اق 66 بىرلىك مايداندىق, ارميالىق جانە كولىكتىك اۆياتسيا قاتىسادى. اۋە شەرۋى كەزىندە ۇشاقتار مەن تىكۇشاقتار اسپاندى اسەم كورىنىستەرمەن كومكەرەدى.
مەرەكەلىك شەرۋدى رەسپۋبليكا كولەمىندە تەلەارنالاردان, بارلىق قالاداعى LED ەكرانداردان جانە قورعانىس مينيسترلىگىنىڭ YouTube ارناسىنان تىكەلەي ەفير ارقىلى تاماشالاۋعا بولادى.
بۇل اسكەري شەرۋ قازاقستان قارۋلى كۇشتەرىنىڭ كاسىبي دايىندىعى مەن تەحنيكالىق الەۋەتىن كورسەتەتىن ماڭىزدى وقيعا. ەل مەرەيىن ۇستەم ەتىپ, حالىقتىڭ پاتريوتتىق رۋحىن كوتەرەتىن شارا تاۋەلسىز قازاقستان تاريحىنداعى ايتۋلى كۇندەردىڭ ءبىرى بولاتىنى ءسوزسىز.