ۇلى جەڭىستىڭ 80 جىلدىعى قارساڭىندا قر ءىىم ۇلتتىق ۇلانى استانادا ۇلكەن پاتريوتتىق اكتسيا وتكىزدى. مەرەيلى داتاعا وراي 80 اسكەري قىزمەتشى ەرەكشە قويىلىم ۇيىمداستىرىپ, ونەر مەن اسكەري راسىمدەردى بىرىكتىردى. اكتسيانىڭ باستى بولىگى رەتىندە قۇرمەت قاراۋىل روتاسىنىڭ جاۋىنگەرلەرى باتىرلىق پەن ەرلىكتىڭ سيمۆولى - جۇلدىزدى بەينەلەپ, ونى «80» سانىمەن الماستىرىپ, اسكەري مارش ىرعاعىمەن ساپتىق ونەر كورسەتتى, دەپ حابارلايدى Egemen.kz.
ۇلتتىق ۇلاننىڭ وركەسترى مەن ەرلەر حورى جاندى داۋىستا «جەڭىس كۇنى» ءانىن ورىنداپ, استانا بريگاداسىنىڭ ساپتىق الاڭىن اسقاق رۋح پەن وتانسۇيگىشتىككە تولتىرعان.
اسكەري قىزمەتشىلەرى بۇل شارانى باتىر بابالارىمىزعا جانە ارداگەرلەرگە قۇرمەت كورسەتۋ ماقساتىندا ۇيىمداستىرعان.
ء«بىز باتىر بابالارىمىز بەن ارداگەر اتالارىمىزعا بەيبىت كۇن ءۇشىن قۇرمەت كورسەتەمىز. ولاردىڭ ەرلىگى جۇرەگىمىزدە ماڭگى ساقتالادى. ۇلتتىق ۇلان اسكەري قىزمەتشىلەرى ءۇشىن ەلگە قىزمەت ەتۋ — ءجاي عانا مىندەت ەمەس, وتان قورعاۋشىلاردىڭ ۇلى ءداستۇرىن جالعاستىرۋ», دەيدى شاراعا قاتىسۋشىلار.
بۇل پاتريوتتىق اكتسيا ۇلى جەڭىس پەن ۇرپاقتار بىرلىگىن, قۇندىلىقتار ساباقتاستىعىن دارىپتەۋدىڭ جارقىن ۇلگىسىنە اينالدى. قر ءىىم ۇلتتىق ۇلانى باتىرلار تۋرالى ەستەلىكتەردى ساقتاپ, ولاردىڭ ەرلىك جولىن جاستارعا ناسيحاتتاۋدى جالعاستىرۋدى جوسپارلاپ وتىر.