UFC-ءدىڭ ەكى سالماقتاعى بۇرىنعى چەمپيونى, قازىرگى ۇيىم كوممەنتاتورى دانيەل كورمە كامارۋ ۋسمان مەن حواكين باكلي اراسىنداعى الداعى جەكپە-جەككە قاتىستى ءوز ويىن ءبىلدىردى. ايقاس 15 ماۋسىم كۇنى تاڭەرتەڭ اقش-تىڭ اتلانتا قالاسىندا وتەتىن UFC on ESPN 69 تۋرنيرىندە وتەدى, دەپ حابارلايدى Egemen.kz.
15 ماۋسىم كۇنى اتلانتادا وتەتىن UFC on ESPN 69 تۋرنيرىندە كامارۋ ۋسمان مەن حواكين باكلي اراسىنداعى جەكپە-جەككە قاتىستى ۇيىمنىڭ ەكس-چەمپيونى دانيەل كورمە پىكىر ءبىلدىردى. ونىڭ ايتۋىنشا, بۇل كەزدەسۋ ۋسمان ءۇشىن شەشۋشى ءسات بولماق.
- مەنىڭشە, بۇل وتە جاقسى ايقاس جانە ول كامارۋ ۋسماننىڭ ءالى دە نەگە قاۋقارلى ەكەنىن كورسەتەدى. باكليدى جەڭۋ ۋسمانعا جاڭا سەرپىن بەرۋى مۇمكىن. ۋسمان ءالى دە ديۆيزيونداعى ەڭ تانىمال ەسىم. ەگەر ول جەڭسە, اشىق ايتىپ تالاپ قويا الادى: 'بەلال مۋحاممەد, دجەك دەللا ماددالەنا, ماعان مۇمكىندىك بەرىڭدەر!' اسىرەسە, ەگەر شاۆكات راحمونوۆ جاراقاتىنان ايىقپاعان بولسا – وندا ولار مىندەتتى تۇردە ونى ەستيدى. بۇل ۋسمان ءۇشىن سوڭعى مۇمكىندىك دەۋگە بولادى, – دەدى كورمە چەيل سوننەنمەن بىرگە جۇرگىزەتىن Good Guy/Bad Guy شوۋىندا.
حواكين باكلي سوڭعى جەكپە-جەگىن 2024 جىلدىڭ جەلتوقسانىندا UFC on ESPN 63 تۋرنيرىندە كولبي كوۆينگتونعا قارسى وتكىزدى. ول تەحنيكالىق نوكاۋتپەن جەڭىسكە جەتىپ, كاسىبي مانسابىنداعى 21-ءشى جەڭىسىنە قول جەتكىزدى. ونىڭ ەنشىسىندە – 6 جەڭىلىس بار.
كامارۋ ۋسمان بولسا, وكتاگونعا سوڭعى رەت 2023 جىلدىڭ قازانىندا شىققان. UFC 294 تۋرنيرىندە ول حامزات چيماەۆپەن تولىق ءۇش راۋندتىق ايقاس وتكىزىپ, تورەشىلەر شەشىمىمەن جەڭىلىپ قالعان ەدى. ۋسماننىڭ رەكوردى – 20 جەڭىس, 4 جەڭىلىس.
اتالمىش كەزدەسۋ – تيتۋلدىق جەكپە-جەككە اپارار ماڭىزدى باسپالداقتاردىڭ ءبىرى. UFC-ءدىڭ بۇل سالماعىنداعى جاعداي شاۆكات راحمونوۆتىڭ جاراقاتىنا بايلانىستى بەلگىسىز كۇيدە تۇرعان شاقتا, ۋسمان مەن باكليدىڭ جەڭىسى ۇلكەن مانگە يە بولماق.