اۋىل شارۋاشىلىعى ءمينيسترى ايداربەك ساپاروۆ جامبىل وبلىسىنا جۇمىس ساپارى اياسىندا وڭىردە شەگىرتكەگە قارسى جۇرگىزىلىپ جاتقان قورعاۋ شارالارىمەن تانىستى, دەپ حابارلايدى Egemen.kz.
بولجامعا سايكەس, 2025 جىلى جامبىل وبلىسىندا ءۇيىرلى شەگىرتكەلەردىڭ تارالۋى 107,63 مىڭ گەكتار اۋماقتى قامتۋى مۇمكىن. اۋىل شارۋاشىلىعىنا كەلەتىن زالالدى بولدىرماۋ ماقساتىندا وڭىردە حيميالىق وڭدەۋ جۇمىستارى قارقىندى جۇرگىزىلۋدە.
بۇگىنگى تاڭدا 14 مىڭ گەكتار جەر وڭدەلدى. جۇمىسقا 36 ارنايى تەحنيكا جۇمىلدىرىلعان, ونىڭ ىشىندە 2 ۇشاق پەن 3 ۇشقىشسىز اۆياتسيالىق جۇيە بار.
ايداربەك ساپاروۆ جاعدايدى ءجىتى باقىلاۋدا ۇستاۋ قاجەتتىگىن اتاپ ءوتىپ, درونداردى پايدالانۋ ارقىلى اتقارىلىپ جاتقان جۇمىستاردىڭ ساپاسىن تەكسەردى.
«بارلىق قاجەتتى پرەپاراتتار ساتىپ الىندى. تەحنيكا جەتكىلىكتى. مەردىگەرلەر ءوز مىندەتتەمەلەرىن ساپالى ءارى ۋاقىتىلى ورىنداپ, وڭدەۋدىڭ جوعارى تيىمدىلىگىن قامتاماسىز ەتۋى ءتيىس», دەدى مينيستر.
ايتا كەتەيىك, 2024 جىلى جامبىل وبلىسىندا 131 مىڭ گەكتاردان استام اۋماق وڭدەلىپ, اۋىل شارۋاشىلىعى داقىلدارىنىڭ زاقىمدانۋى مەن زيانكەستەردىڭ باسقا وڭىرلەرگە تارالۋىنىڭ الدىن الۋعا مۇمكىندىك بەرىلدى.